Jeremiah 7

Jinghpaw Common Language Bible © Bible Society of Myanmar, 2009

← Chapter 6 Jump to: Chapter 8 →

1Dai Madu gaw ngai hpe Yuda amyu masha ni sa nawku na matu du sa nga ai Nawku Htingnu chyinghka lam de shangun dat wu ai. Shi gaw ngai hpe dai shara hta tsap nga nna Chyahtum Chyalai N-gun rawng ai Madu Karai Kasang shanhte hpe ning ngu nna tsun shana shangun wu ai: “Na a asak hkrun lam hte nang galaw nga ai amu ni hpe galai kau u, shaloi ngai gaw nang hpe ndai shara hta shanu nga shangun na nngai.

4‘Anhte gaw shim lum ga ai! Ndai gaw dai Madu a Nawku Htingnu rai nga ai! Ndai gaw dai Madu a Nawku Htingnu rai nga ai! Ndai gaw dai Madu a Nawku Htingnu rai nga ai!,’ nga nna masu magaw ga tsun ai ni hpe hkum kam nga et.

5“Na a asak hkrun lam hpe galai kau nna nang galaw nga ai amu ni hpe tawn kau u. Langai hte langai a lapran e na a shinggyim nau na myit rawng ai hta rap ra teng man nga u.

6Malet nhprang manam, jahkrai nmai hte gaida gaina ni hpe zai hku adip arip hkum galaw et; Ndai lamu ga hta nga ai mara n kap ai masha ni hpe sat ai lam hkum galaw et. Kaga karai ni hpe nawku ai majaw nang jahten shaza kau ai n hkrum u ga, dai hpe tawn kau u.

7Nang galai shai ai rai yang, na a nji nwa ni prat tup jaw lup a matu ngai jaw da sai ndai lamu ga hta ngai nang hpe shanu nga shangun na nngai.

8“Yu u, nang gaw masu magaw ga hta kam hpa nga ndai.

9Nang gaw arai lagu ai, masha sat ai, numshaw lashaw amu shut hpyit ai, masu ga tsun nna dagam ai, Bala hpara hpe shagu hkungga nawng jau ai, shawng de nang garai n chye yu ai karai ni hpe nawku nga ndai.

10Ngai n dawng ai ndai amu ni hpe nang galaw nhtawm ngai shanu ai nye a Nawku Htingnu kata hta nang sa shang tsap let, ‘Anhte shim lum ga ai!,’ nga nna tsun myit dai.

11Nye a Nawku Htingnu gaw hpya lu hpya sha ai damya ni a matu makoi shara rai nga ai ngu, nang myit nawn da wu ni? Nang hpa galaw nga ai hpe ngai mu se ai.

12Nawku na matu ngai lata san da ai shawng na shara ngu ai Shilo de sa wa mu; dai shara hta nye a amyu masha Israela ni a shut hpyit ai yubak ni a majaw ngai kaning di kau ai hpe mada yu mu.

13Nang gaw ndai yubak mara ni yawng hpe shut hpyit kau nit dai; ngai nang hpe lang hte lang tsun shadum yu ti mung, nang n madat ndai. Ngai nang hpe shaga yang, nang n htan ndai.

14Dai rai nna, ngai gaw Shilo shara hpe di kau we ai zawn nang kam hpa nga ai ndai nye a Nawku Htingnu hpe mung di kau na we ai. Na a nji nwa ni hte nang hpe jaw ai ndai shara hpe mung Shilo shara e ngai di kau ai zawn di na we ai.

15Na a makyin jinghku ni rai nga ai Israela amyu masha ni hpe ngai shaden kau we ai zawn nang hpe mung nye a myi man kaw nna shaden kau na we ai. Dai Madu ngai nan tsun ni ai.”

16Dai Madu gaw, “Yeremia e, ndai amyu masha ni a matu akyu hkum hpyi ya nga et; shanhte a matu hkum jahtau, hkum hpyi nem nga et; ngai hpe hkum lajin et, ngai gaw na a ga hpe madat ya na nngai n rai.

17Yuda mare ni hte Yerusalem mare lam ni hta shanhte hpa galaw nga ma ai hpe nang n mu n ni?

18Shanhte shamying ai Sumsing Lamu a Hkawhkam jan ngu ai hpara num a matu ma kaji ni gaw hpun hta, lasha ni gaw wan htung galaw, numsha ni gaw muk kabaw na matu muk shadung ni hpe kayau gumchya ma ai. Shanhte gaw ngai hpe nchyi nmu byin shangun na matu kaga karai ni hpe sabyi hkungga ni ru jaw nga ma ai.

19Rai ti mung, shanhte nchyi nmu byin shangun ai gaw teng teng ngai hpe chyu sha rai ni? N rai law, shanhte hkum nan mung nchyi nmu hkam sha ai hte shanhte sha kaya kahpa hkrum nga ma ai.

20Shing rai Tsaw Htum ai dai Madu ngai nan ndai Nawku Htingnu ntsa e nye a masin kahtet kang ai hpe ru jaw dat na we ai. Masha hte yam nga ni a ntsa e mung, hpun ni hte nsi naisi ni a ntsa e du hkra pyi ru jaw na we ai. Nye a masin kahtet ai gaw agrung nga ai wan zawn rai nna kadai mung dai hpe krip kau lu na n rai.

21“Nye a amyu masha ni e, nanhte nat nawng ai shagu hkungga nkau mi tawn hkungri ntsa e atsai awai hkru mat ti mung, nkau mi hpe sha na ahkang nanhte lu nga myit dai. Rai ti mung, dai Madu ngai nan tsun mayu ai gaw, dai hkungga shan yawng hpe mung nanhte sha kau nga myit dai.

22Ngai gaw na a nji nwa ni hpe Egutu mung kaw na shapraw wa ai shaloi, wan nat hkungga ni hte kaga shagu hkungga ni a lam hkang da ai tara hpa mung n tawn da ya nngai.

23Rai ti mung, nye a ga madat na matu shanhte hpe ngai hkang da ni ai, ngai gaw shanhte a Karai Kasang tai nna, shanhte gaw nye a amyu masha ni tai na mara ai. Ngai shanhte hpe hkang da sai asak hkrun lam hta hkawm sa na lam ngai tsun ni ai, shaloi, shanhte gaw lam shagu hta ngamu ngamai wa na mara ai.

24Rai ti mung, shanhte gaw madat mara ma ai n rai, hpa zawn mung n nawn ya nga ma ai. Dai zawn hkan sa na malai, shanhte gaw du ja ai hte n hkru ai myit masin shanhte hpe shadut matsun ai hku galaw nga ma ai majaw, shanhte gaw kaja wa na malai n kaja ai masha ni tai wa nga masai.

25Nanhte a nji nwa ni Egutu mung kaw nna pru wa ai shani kaw na dai ni du hkra, ngai gaw nye a shangun ma ni rai nga ai myihtoi ni hpe nanhte hpang de matut manoi shangun dat ya ni ai.

26Rai tim, marai langai mi pyi madat ai n rai, dai lam hpe hpa zawn n nawn ya nga ma ai. Dai zawn madat ya na malai, nanhte gaw du grau ja wa ai hte nanhte a nji nwa ni hta grau nna pyi gumlau nga myit dai.

27“Dai rai nna, Yeremia e, shanhte gaw nang tsun ai ga hpe n madat ya nga ma ti mung, ndai mungga ni yawng hpe nye a amyu masha ni a man e nang tsun dan lu na rai ndai. Shanhte n htan ya ti mung, nang shanhte hpe shaga na rin dai.

28Shanhte a amyu baw gaw dai Madu shanhte a Karai Kasang ngu ai nye a ga hpe n madat, shanhte hpe jaw ai ari kaw na hpa mung n sharin la ngu nna nang shanhte hpe tsun na rai ndai. Kangka ai gaw si mat sai, de a lam loi mi pyi tsun na n rai sai.

29“Yerusalem amyu masha ni e, sharung shayawt nga mu; na a kara zen di nna kabai kau u. Kawng pungding ntsa hkan e makoi mayang mahkawn hkawn mu, hpa majaw nga yang, dai Madu ngai gaw pawt sindawng nngai hte nye a amyu masha ni hpe ningdang kau ni ai.

30“Yuda amyu masha ni gaw n hkru ai amu galaw masai. Shanhte gaw nye a Nawku Htingnu kata hta ngai n dawng ai shanhte a hpara sumla ni hpe tawn da nna, dai hpe matsat shabat di kau manu ai.

31Shanhte gaw Hinom Kadit e Tohpet ngu shamying ai tawn hkungri langai mi hpe gaw ma ai, shanhte gaw shanhte a shadang sha ni hte shayi sha ni hpe wan hta nat nawng lu ma ai. Dai amu galaw na matu, shanhte hpe ngai hkang da ni ai n rai; Dai amu gaw nye a myit masin hta pyi myit ai n rai.

32Dai rai nna, Tohpet hte Hinom Kadit ngu nna galoi mung n shamying na mara ai; rai tim, Masha Sat ai Kadit ngu nna tsun ai aten du wa na ra ai. Dai shara hta lup makoi na shara loi mi pyi n man ai majaw, shanhte gaw amyu masha ni hpe dai yang hkan e lup makoi na mara ai.

33Dai moi mang ni gaw ntsa malen u ni hte nam na matse labye ni a matu lusha tai na ra ai; shanhte hpe gawn jahkrit shari na masha langai mi mung dai shara hta nga na ra ai n rai.

34Mungdan gaw katsi katsang shara tai mat wa na ra ai; Yuda mare ni hte Yerusalem mare lam ni hta kabu gara ai nsen hte hkungran lusha poi galaw ai ni a nsen ni hpe ngai jasim kau na we ai.

← Chapter 6 Jump to: Chapter 8 →