Haggai 1

Kamba (Mbivilia) 1956

Jump to: Chapter 2 →

1Mwaka wa kelĩ wa kũsumbĩka kwa mũsumbĩ Ndalio, mwei wa thanthatũ, mũthenya wa mbee wa mwei, ndeto ya Yeova yamũkĩa Nzeluvaveli mwana wa Sealitieli, ngavana wa Yuta, na Yosua mwana wa Yeosataki, mũthembi mũnene, na kanyw’a mwathani Akai, ĩkĩmea,

2Yeova wa nguthu eneena ũũ, akyasya, Andũ aa measya, Ĩvinda yĩtinamba kũvika, ĩvinda ya kwaka nyũmba ya Yeova.

3Nĩvo ĩndĩ ndeto ya Yeova yookie na kanyw’a wa mwathani Akai, ĩkĩkũlya,

4Nĩ ĩvinda yenyu ene kwĩkalaa nyũmbanĩ syenyu nzeũvye na mbwaũ nthĩnĩ, yĩla nyũmba ĩno ĩeketwe ĩ mbanangĩku?

5Na yu kwondũ wa ũu Yeova wa nguthu easya atĩĩ: Sũanĩai mĩendele yenyu.

6Inyw’ĩ mũvandĩte mbingĩ, na mũkĩketha nini; nĩmũĩsaa, ĩndĩ mũtivũnaa; nĩmũnyusaa, ĩndĩ mũtilaũkaa; nĩmwĩvw’ĩkaa, ĩndĩ vati wĩw’aa muutĩa, na ũla ũthũkũmaa atuvwe, athũkũmaa ĩtuvi na akĩkĩa ngusunĩ mbũthũkangu.

7Ũũ nĩw’o Yeova wa nguthu ũnũkwasya: Sũanĩai mĩendele yenyu.

8Ambatai kĩĩmanĩ, mũete mĩtĩ, na mũkyaka ĩla nyũmba; na ngendeew’a nĩyo, na ngataĩwa, easya ũu Yeova.

9Mwaasya mũkoona nyingĩ, na, sisya, ikyoneka nini; na mwaiete mũsyĩ, ngivutũkya. Nĩkĩ? Ekũlya ũu Yeova wa nguthu. Nũndũ wa nyũmba yakwa kũekwa ĩ mbanangĩku, yĩla mũũsemba kĩla mũndũ nyũmbanĩ yake mwene.

10Kwondũ wa ũu nũndũ wenyu matu nĩmaleaa kũete ĩmwe, na nthĩ nĩleaa kũete ũsyao wayo.

11Na neeta mũnyao wũke ĩũlũ wa nthĩ, na ĩũlũ wa ĩĩma, na ĩũlũ wa lĩu wa mbaa ngetha, na ĩũlũ wa mbinyu nbĩthĩ, na ĩũlũ wa mauta, na ĩũlũ wa kĩla nthĩ ĩmeasya, na ĩũlũ wa andũ, na ĩũlũ wa indo, na ĩũlũ wa wĩa w’onthe wa moko.

12Nĩvo ĩndĩ Nzeluvaveli mwana wa Sealitieli, na Yosua mwana wa Yeosataki, mũthembi mũnene, vamwe na ũtialo w’onthe wa andũ, meewie wasya wa Yeova Ngai woo, na ndeto sya mwathani Akai, o tondũ Yeova Ngai woo wamũtũmĩte; na andũ meew’a w’ĩa vala ve Yeova.

13Nĩvo ĩndĩ Akai, mũtũmwa wa Yeova, waneenie ũtũme wa Yeova kwa andũ, akĩmea, Nĩ vamwe nenyu, easya ũu Yeova.

14Na Yeova aamũkya veva wa Nzeluvaveli mwana wa Sealitieli, ngavana wa Yuta, na veva wa Yosua mwana wa Yeosataki, mũthembi mũnene, na veva wa ũtialo w’onthe wa andũ; na mooka na matethya wĩa nyũmbanĩ ya Yeova wa nguthu, Ngai woo,

15mũthenya wa mĩongo ĩlĩ na ĩna, mwei wa thanthatũ, mwaka wa kelĩ wa kũsumbĩka kwa mũsumbĩ Ndalio.

Jump to: Chapter 2 →