Haggai 2

Kamba (Mbivilia) 1956

← Chapter 1 Jump to:

1Mwei wa mũonza, mũthenya wa mĩongo ĩlĩ na ũmwe wa mwei, ndeto ya Yeova yooka na kanyw’a wa mwathani Akai, ĩkyasya,

2Neena yu na Nzeluvaveli mwana wa Sealitieli ngavana wa Yuta, na Yosua mwana wa Yeosataki, mũthembi mũnene, na ũtialo wa andũ, ũmakũlye,

3Nũũ ũtiele katĩ wenyu ũla wonie nyũmba ĩno yĩ na ũtheu wayo wa mbee? Na mwĩmyona ata yu? Ti ta mana methonĩ menyu?

4Ĩndĩ yu ĩthĩwa na vinya, we Nzeluvaveli, easya ũu Yeova; na ĩthĩwa na vinya, we Yosua, mwana wa Yeosataki, mũthembi mũnene; na ĩthĩwai na vinya, inyw’ĩ andũ onthe ma nthĩ ĩno, na tethyai wĩa, easya ũu Yeova: nũndũ nĩ vamwe nenyu, easya ũu Yeova wa nguthu,

5o kwĩanana na ndeto ĩla natianĩie nenyu yĩla mwaumie Misili, na Veva wakwa ekalaa katĩ wenyu; mũikakĩe.

6Nũndũ ũu nĩw’o Yeova wa nguthu ũnũkwasya: No ĩmwe, o kavinda kanini, na ngathingithya matu, na nthĩ, na ũkanga, na nthĩ nyũmũ;

7na ngathingithya mbaĩ syonthe; na ũla wendetwe nĩ mbaĩ syonthe ũkooka; na ngausũsya nyũmba ĩno ũtheu mũtisu, easya ũu Yeova wa nguthu.

8Vetha nĩ wakwa, na thaavu nĩ wakwa, easya ũu Yeova wa nguthu.

9Ũtheu wa ĩtina wa nyũmba ĩno ũkeethĩwa wĩ mũnene kwĩ ũla wa mbee, easya ũu Yeova wa nguthu; na nganenganĩa mũuo vandũ vaa, easya ũu Yeova wa nguthu.

10Mũthenya wa mĩongo ĩlĩ na ĩna wa mwei wa kenda, mwaka wa kelĩ wa kũsumbĩka kwa Ndalio, ndeto ya Yeova yooka na kanyw’a wa mwathani Akai, ĩkyasya,

11Ũũ nĩw’o Yeova wa nguthu ũnũkwasya: Kũlyai athembi yu ũndũ wa mĩao, mũkyasya,

12Ethĩwa ũmwe akakua nyama ntheu ovee mũthyanĩ wa ngũa yake, na mũthya wa ngũa yake ũikiita kĩmũtũ, kana ũsũũ, kana mbinyu, kana mauta, kana lĩu o na wĩva, kĩkatw’ĩka kĩtheu? Na athembi masũngĩa na masya, Aiee.

13Nĩvo ĩndĩ Akai wakũlilye, Ethĩwa ũmwe mũvuku nũndũ wa ũkiita kimba akakiita kĩndũ kĩmwe kya isu, kĩkeethĩwa kĩ kĩvuku? Na athembi masũngĩa na masya, Kĩkeethĩwa kĩ kĩvuku.

14Nĩvo ĩndĩ Akai wasũngĩie na asya, Andũ aa mailyĩ ũu, na mbaĩ ĩno ĩilyĩ ũu mbee wakwa, easya ũu Yeova; na no ta ũu kĩla wĩa wa moko moo; na o kĩla mathembaa vo no kĩvuku.

15Na yu, nĩngũmwĩsũva, sũanĩai mũthenya ũũ, na sũanĩai mĩthenya ĩla mĩthelu, mbee wa ĩvia yĩtanailĩĩlwa ĩũlũ wa ĩvia mwakonĩ wa ĩkalũ ya Yeova.

16Kuma ĩvinda yĩu yonthe, yĩla ũmwe waenda mbumbunĩ yĩ ithimo mĩongo ĩlĩ, veethĩwa o ĩkũmi; yĩla ũmwe waenda ĩvivanĩ ya mbinyu kwosa itethi mĩongo ĩtano, veethĩwa o mĩongo ĩlĩ.

17Nĩnamũkũnie na wũmanĩlu na mbuka na mbua ya mavia wĩanĩ w’onthe wa moko menyu; ĩndĩ mũtyaaĩnthyũũĩa, easya ũu Yeova.

18Sũanĩai, nĩngũmwĩsũva, mũthenya ũũ, na sũanĩai mĩthenya ĩla mĩthelu, kuma mũthenya wa mĩongo ĩlĩ na ĩna wa mwei wa kenda, kuma mũthenya ũla mwambĩlĩlyo wa ĩkalũ ya Yeova wakwatiw’e, sũanĩai.

19Mbeũ syĩ o ĩkũmbĩnĩ? Ĩĩ, mũsavivũ, na mũkũyũ, na mũkũngũmanga, na mũthata ndĩsyaĩte, kuma ũmũnthĩ nĩngũmũathima.

20Na ndeto ya Yeova yamũkĩa Akai ĩvinda ya kelĩ mũthenya wa mĩongo ĩlĩ na ĩna wa mwei, ĩkĩmwĩa,

21Neena na Nzeluvaveli, ngavana wa Yuta, ũkĩmwĩa, Ngathingithya matu na nthĩ;

22na ngang’uthũla kĩvĩla kya ũsumbĩ kya mosumbĩ; na ngaananga vinya wa mosumbĩ ma mbaĩ; na ngang’uthũlanga makasya ma kaũ, na ala makuĩtwe nĩmo; na mbalasi na ala maitũlĩte makavalũkangan’ya nthĩ, nũndũ wa kũtemangana na mbyũ, kĩla mũndũ na mwana‐a‐ĩthe.

23Mũthenya ũsu, easya Yeova wa nguthu, ngakwosa, we Nzeluvaveli, mũthũkũmi wakwa, mwana wa Sealitieli, easya ũu Yeova, na ngakũtw’a ta ngome ya ũvana ũsilĩlo; nũndũ nĩnakũnyuvie, easya ũu Yeova wa nguthu.

← Chapter 1 Jump to: