Titus 1

Kamba (Mbivilia) 1956

Jump to: Chapter 2 →

1Vaũlo, ngombo ya Ngai, na mũtũmwa wa Yesũ Klĩsto kwĩanana na mũĩkĩĩo wa anyuve ma Ngai, na ũmanyi wa ũla w’o ũla wĩanene na kũmũkĩa Ngai,

2nthĩnĩ wa wĩkwatyo wa thayũ ũtathela, ũla Ngai wathie mbee wa mavinda ma tene tene, nake ndatonya kũneena ũvũngũ;

3ĩndĩ mavindanĩ make nĩwavuanisye ndeto yake nthĩnĩ wa ũtũmane, ũla nyie naĩkĩĩwe nĩthĩwe naw’o kwondũ wa mwĩao wa Ngai Mũtangĩĩi waitũ;

4valũa ũũ wakwa ũmũvikĩe Tito, mwana wakwa wa w’o nũndũ wa mũĩkĩĩo ũmwe ũla twĩ naw’o: Mumo na mũuo kuma kwa Ngai Asa na Klĩsto Yesũ Mũtangĩĩi waitũ.

5Kwondũ wa ũndũ ũũ nakũtiie Kilete, nĩ kana maũndũ ala matiele kwikwa ũmaseũvye, na kwia atumĩa kĩla ndũa, o tondũ nakwĩaĩe;

6ethĩwa mũndũ ndaweteka ũndũ ũthũku, na nĩ mũũme wa kiveti o kimwe, ũla wĩ na syana syĩtikĩlaa, itavinganĩw’a kwĩthĩwa na ngũlũ na wau wa matũ.

7Nũndũ mũsyaĩĩsya nĩwaĩle kwĩthĩwa ataweteka ũndũ ũthũku, ta mũsũvĩi maũndũnĩ ma Ngai; na ndakethĩwe na mĩtavyo, kana kũthata mitũkĩ, ndakethiwe mũnywi wa ũki, kana mũkũni wa andũ, ndakethiwe mwendi wa kũunwa nĩ syĩndũ itamwaĩle;

8ĩndĩ ethĩwe mũthokya wa aeni, na mwendi wa ũseo, ũla wĩ na kĩlĩko, mũndũ mũlũngalu, mũndũ mũtheu, na mwĩting’u;

9ailũmya ndeto ĩla ya kĩthito ĩla yĩanene na ũla ũmanyĩsyo, nĩ kana atonye kũtaa ũmanyĩsyonĩ ũla wa w’o, vamwe na kũmaĩkĩĩthya akananĩi mavĩtyo.

10Nũndũ kwi mbaa matũ mbingĩ, aneenĩ ma ndeto sya mana na akengani, na mũno nĩ ma ala maĩkawa,

11namo mũvaka makanyw’a moo mavindĩthw’e; andũ ala makulumanasya nyũmba nĩma sya andũ, makimanyĩsya maũndũ mataĩle, kwondũ wa kwenda kũunwa nĩ syĩndũ itamaĩle.

12Mũndũ ũmwe wamo, mwathanĩ woo, aisye, Akilete nĩ aneeni ma ũvũngũ mavinda onthe, nyamũ nthũku, ayi matatethasya wĩa.

13Ũkũsĩ ũsu nĩ wa w’o. Kwondũ wa ũu makan’ye na ndeto sya vinya, nĩ kana methĩwe aima mũĩkĩĩonĩ,

14mateũatĩĩa mbano sya Ayuti, na mĩao ya andũ ala mathũkĩaa ũla w’o.

15Kwa atheu maũndũ onthe nĩ matheu; ĩndĩ kwa ala avuku na matetĩkĩlĩte vai kĩndũ kĩtheu; ĩndĩ ĩlĩko syoo vamwe na wasya wa ngoo woo nĩvũkĩtw’e.

16Maasya kana nĩmesĩ Ngai; ĩndĩ mekonĩ moo nĩmeũmũkaĩa, nao nĩmathatasya na matew’aa, na wĩanĩ mũseo o na wĩva maiĩtĩkĩlĩka.

Jump to: Chapter 2 →