Titus 2

Kamba (Mbivilia) 1956

← Chapter 1 Jump to: Chapter 3 →

1Ĩndĩ we, neena maũndũ ala maĩle ũmanyĩsyo ũla wa w’o;

2atĩ atumĩa akũũ methĩwe na wĩting’o, na kĩkĩo, na kĩlĩko, methĩwe aima mũĩkĩĩonĩ, na wendonĩ, na wũmĩĩsyonĩ:

3na ivetĩ ngũũ nasyo no ta ũu syĩthĩwe na mwĩkalĩle wa ũtheu, ite nzũkani kana ngombo sya mbinyu mbingĩ, syĩthĩwe amanyĩsya ma maũndũ ala maseo;

4nĩ kana imanyĩasye aka ma mũika kwenda aũme moo, na kũsyenda syana syoo,

5methĩwe na kĩlĩko, mate na wathe, atethya ma wĩa mĩsyĩ kwoo, kwĩka angĩ nesa, na kwĩnyivya kwa aũme moo ene, nĩ kana ndeto ya Ngai ndĩkaumwe:

6aũme mate akũũ nao mataae methĩwe na kĩlĩko:

7maũndũnĩ onthe ũkĩyonan’ya mwene wĩ ngelekan’yo ya meko maseo; ũmanyĩsyonĩ waku ũkyonan’ya ũndũ ũla ũtatonya kũthũkya, na kĩkĩo,

8na ndeto syaĩle itatonya kũsilĩlwa; nĩ kana ũla ũkwenda ũkũvinganĩsya atonye kũsonoka, nũndũ ndakethĩwa na ndeto sya kũtũneenea.

9Ngombo syĩnyivye kwa mavwana masyo, na syĩthĩwe ĩkĩmendeesya maũndũnĩ onthe; itikatũngĩthasya;

10na itikethĩwe osangi ma syĩndũ, ĩndĩ ikyonan’ya kĩthito kĩseo kyonthe; nĩ kana syanakavye maũndũnĩ onthe ũmanyĩsyo wa Ngai Mũtangĩĩi waitũ.

11Nũndũ mumo wa Ngai nĩwumĩlĩte, ũkĩetee andũ onthe ũtangĩĩo,

12ũkĩtũmanyĩsya atĩ tũlee maũndũ onthe mate ma kũmũkĩa Ngai na mawendi onthe ma nthĩ, twĩkalasye mathayũ maitũ na kĩlĩko kĩanĩu na ũlũngalu na kũmũkĩa Ngai ĩvindanĩ yĩĩ tũĩ;

13tũkĩsyaĩĩsya wĩkwatyo ũla wĩ na ũathimo na kumĩla kwa ũtheu mũtisu wa Ngai ũla mũnene na Mũtangĩĩi waĩtũ Yesũ Klĩsto;

14ũla wenenganie mwene kwondũ witũ, nĩ kana atwovosye kũtumya mothũkunĩ onthe, na kwĩtheesya andũ methĩwe make mwene, me na ũthangaau mawĩanĩ ala maseo.

15Maũndũ aa neena, noitaa, noikan’ya, na ũkũmũ w’onthe. Mũndũ ndakakũvũthye.

← Chapter 1 Jump to: Chapter 3 →