2 Thessalonians 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Yu ĩũlũ wa kũka ĩngĩ kwa Mwĩai waitũ Yesũ Klĩsto, na kũmbanw'a kwitũ vamwe tũkekale nake, nĩtũũmwĩsũva mbaitũ,

2mũikathingithw'e na mĩtũkĩ nĩ mũndũ mosũanĩonĩ menyu, kana mũkwatwe nĩ kĩũũyũ ngoonĩ mũkĩwa kana Mũthenya wa kũka ĩngĩ kwa Mwĩai nĩ mũviku. Mũndũ nũtonya kwasya eewie ũu kuma kwa Veva Mũtheu, kana eewie mũndũ ũngĩ ayasya ũu, kana asomie kuma valũanĩ twaandĩkĩte.

3Mũiketĩkĩle mũndũ amũkenge kwa nzĩa o na yĩva, nũndũ Mũthenya ũsu ndũkavika nginya ũthũku ũla mũnene wambe kwĩthĩwa, na ũsu Mũthũku ayumĩla, ũla weteelete kwanangwa tene na tene.

4We akeenenevya na kũleana na kyonthe kĩla andũ metaa ngai kana mathaithaa. O na akalika na kwĩkala nthĩ Ĩkalũnĩ ya Ngai na kwasya we nĩ Ngai.

5Tyo mũlilikene kana nĩnamũtavisye maũndũ aa yĩla naĩ nenyu?

6O na nĩmwĩsĩ kĩla kĩsiĩĩe ũsu Mũthũku yu, nĩ kana eumĩla ĩvinda yake yavika.

7Ũu wĩ o vo, ũsu Mũthũku ũvithĩtwe no ũkũtethya wĩa yu, ĩndĩ ndeumĩla nginya ũla ũmũsiĩĩe avetwe.

8Nĩvo ĩndĩ ũsu Mũthũku ũkaumĩla, ĩndĩ Mwĩai Yesũ akamũaa aitũmĩa mĩthũmũ ya kanyw'a wake. Akaanangwa vyũ nĩ ũtheu wa kũka ĩngĩ kwa Mwĩai.

9Ũsu Mũthũku akooka na mavinya ma Satani, na akeeka syama sya kĩla mũthemba na mawonany'o, na maũndũ ma kũseng'ya ma ũvũngũ,

10na akatũmĩa ũkengani wa kĩla mũthemba kwa ala meteelete kwaa. Meaa nũndũ nĩmaleile kwenda ũla w'o nĩ kana matangĩĩwe.

11Kwoou Ngai nũmaeteae vinya wa kũmasya, nĩ kana maĩkĩĩe kĩla kĩte kya w'o.

12Asu onthe makasilĩlwa nũndũ nĩmaleile kũĩkĩĩa ũla w'o, ĩndĩ matanĩaa naĩnĩ.

13Nĩtwaĩlĩtwe nĩ kũmũtũngĩa Ngai mũvea mavinda onthe, kwondũ wenyu inyw'ĩ mbaitũ mwendetwe nĩ Mwĩai. Nĩkwĩthĩwa Ngai nĩwamũnyuvie kuma mwambĩlĩĩlyonĩ mũtangĩĩwe kwa ũtonyi wa Veva wake, mũtw'ĩke andũ make atheu na kwa kũĩkĩĩa ũla w'o.

14Ngai amwĩtie kwĩsĩla ũtavany'anĩ witũ wa Ũvoo Mũseo kwenyu, nĩ kana mũtonye kũkwata ũkumyo wa Mwĩai waitũ Yesũ Klĩsto.

15Kwoou ĩndĩ mbaitũ, ũngamai na ũlũmu na mũilũma momanyĩsyonĩ ala twamũmanyĩisye kwĩsĩla ũtavany'anĩ witũ na mavalũanĩ maitũ.

16Mwĩai waitũ Yesũ Klĩsto mwene na Ngai Asa waitũ, ũla watwendie na kwa mumo wake atũnenga ũkiakisyo ũtathela na wĩkwatyo mũlũmu,

17namũkiakisye na kũmũlũlũmĩĩlya kĩla ĩvinda mwĩkae na kũneenaa ũla ũseo.

← Chapter 1 Jump to: Chapter 3 →