2 Thessalonians 3

Kamba (MBIVILIA ŨVOO MŨSEO)

← Chapter 2 Jump to:

1Kũminũkĩlya mbaitũ, tũvoyeei nĩ kana Ũvoo wa Mwĩai ũtonye kũnyaĩĩka kwa mĩtũkĩ, na kũnengwa ndaĩa o tondũ Ũvoo ũsu wanengiwe ndaĩa kwenyu.

2Tũvoyeei o ta ũu Ngai atonye kũtũvonokya kuma kwa andũ athũku na mbaa matũ, nĩkwĩthĩwa ti andũ onthe me na mũĩkĩĩo.

3Ĩndĩ Mwĩai nĩ wa kũĩkĩĩwa, nũkũmwĩkĩa vinya na aimũsũvĩaa kuma kwa Ũla Mũthũku.

4Twĩ na mũĩkĩĩo nthĩnĩ wa Mwĩai kana nĩmũendee kwĩka maũndũ ala twamũtavisye, na nĩmũkũendeea kũmeka.

5Mwĩai namũtongoesye mwĩthĩwe na wendo ta ũla wa Ngai, na wũmĩĩsyo ta ũla wa Klĩsto.

6Mbaitũ nĩtũũmwĩaĩa ĩsyĩtwanĩ ya Mwĩai waitũ Yesũ Klĩsto, mwĩvetane na aĩkĩĩi ala mekalaa mana mateũtethya wĩa, na ala mataatĩĩaa momanyĩsyo ala twamũnengie.

7Inyw'ĩ ene nĩmwĩsĩ nesa kana mwaĩlĩte kũatĩĩa ngelekany'o yaitũ. Tũyekalaa mana yĩla twaĩ kũu kwenyu,

8o na tũyaaya lĩu wa mũndũ tũte kũĩva. Twathũkũmaa na kĩthito na thĩna mwingĩ ũtukũ na mũthenya, nĩ kana tũikethĩwe mũio kwa mũndũ o na wĩva katĩ wenyu.

9Tũyeekaa ũu nĩ kwĩthĩwa tũyaĩlĩtwe nĩ kũtethw'a nĩ inyw'ĩ, ĩndĩ nĩ kana tũmũnenge ngelekany'o mũatĩĩae.

10O na yĩla twaĩ kũu kwenyu, nĩtwamũnengie mwĩao twamwĩa atĩĩ, “Ethĩwa mũndũ ndekwenda kũtethya wĩa, ndakaye.”

11Yu twĩĩw'a ve andũ katĩ wenyu matatethasya wĩa, mekalaa mana, na wĩa woo nĩ kũlikĩlĩĩla maũndũ ma andũ ala angĩ.

12Ĩsyĩtwanĩ ya Mwĩai waitũ Yesũ Klĩsto, nĩtũũmakany'a na kũmataa andũ ma mũthemba ũsu mausye, na maithi mathũkũmĩe lĩu ũla meũya.

13Mbaitũ, mũikaanoe nĩ kwĩka ũla waĩlu.

14Siany'ai na mũndũ ũla ũtekũatĩĩa maũndũ ala tũmũandĩkĩĩte valũanĩ ũũ. Ĩvetanei na mũndũ ũsu nĩ kana ew'e nthoni.

15Ĩndĩ mũikamwosae ta mũmaitha, mũkanasyei o ta mwana-a-asa.

16Mwĩai mwene ũla ũnenganae mũuo, namũnenge mũuo matukũ onthe nthĩnĩ wa kĩla ũndũ. Mwĩai nĩethĩwe nenyu inyw'onthe.

17Nyie Vaũlo nĩmũandĩkĩa ngethi ĩno na kw'oko kwakwa mwene, na nĩyo wonany'o wa valũa syakwa; nĩandĩkaa ũu.

18Mumo wa Mwĩai waitũ Yesũ Klĩsto nĩwĩthĩwe nenyu inyw'onthe.

← Chapter 2 Jump to: