Haggai 1

Kamba (MBIVILIA ŨVOO MŨSEO)

Jump to: Chapter 2 →

1Mwakanĩ wa kelĩ wa kũsumbĩka kwa Ndalio mũsumbĩ wa Velisia, mũthenyanĩ wa mbee wa mwei wa thanthatũ, Mwĩai Ngai nĩwatũmie mwathani Akai akaneene na ngavana wa Yuta, ũla waĩ Nzelũvaveli mwana wa Sealitieli, na Mũthembi Mũnene Yosua mwana wa Yeosataki.

2Mwĩai Ngai Mwene Ũtonyi W'onthe aneenie na Akai amwĩa atĩĩ, “Andũ aa measya kana ĩvinda ya kwaka Ĩkalũ yakwa ĩngĩ yĩinamba kũvika.”

3Nĩvo ĩndĩ Mwĩai Ngai waneenie kwĩsĩla vala ve mwathani Akai asya,

4“Inyw'ĩ andũ makwa, nĩkĩ mũendee kwĩkala nyũmbanĩ syenyu mbake nesa, nayo Ĩkalũ yakwa nĩ ĩomboku?”

5Yu ĩndĩ Mwĩai Ngai Mwene Ũtonyi W'onthe easya atĩĩ, “Kwa sũanĩai kana nĩmũendee nesa!

6Inyw'ĩ nĩmũvandĩte mbeũ mbingĩ, ĩndĩ mũkethĩwa na ngetha nini. Nĩmũĩsaa, ĩndĩ mũyĩsaa kũvũna. Nĩmũnyusaa, ĩndĩ mũyĩsaa kũlaũka. Nĩmwĩkĩaa ngũa, ĩndĩ mũyĩw'aa muutĩa. O na ũla ũthũkũmaa atuvwe, akwata ĩtuvi ayĩkĩaa ngusunĩ mbũthũkangu.”

7Mwĩai Ngai Mwene Ũtonyi W'onthe easya atĩĩ, “Kwa sũanĩai kana nĩmũendee nesa!

8Ambatai kĩĩmanĩ mũkaete mĩtĩ, na mũyaka Ĩkalũ ĩngĩ. Nĩvo ĩndĩ nĩendeew'a nĩyo na ngĩtaĩwa. Nyie Mwĩai Ngai nĩasya ũu.

9“Mũneeteelete ngetha mbingĩ, ĩndĩ mwaketha nini, na yĩla mũnenũkisye kĩla mũnakethie, nyie Mwĩai Ngai Mwene Ũtonyi W'onthe nakĩũlũkya na kĩseve. Nĩneekie ũu nĩkĩ? Nũndũ Ĩkalũ yakwa nĩ ĩombokangu, nenyu kĩla mũndũ akwatene na maũndũ ma mũsyĩ wake mwene.

10Kwa kĩtumi kĩu, nĩmũtumĩte kũtaua na vai kĩndũ kĩtonya kũmea.

11Nĩnatumie nthĩ yĩthĩwa na mũnyao o na iĩmanĩ, mĩũndanĩ ĩla ĩvandawa ngetha ya mbaa mbeke, mĩũndanĩ ya mĩsavivũ na ya mĩthata, kũndũ kw'onthe kũla kũvandawa syĩndũ, andũnĩ na indonĩ. Wĩa wenyu w'onthe ũla mũtethasya ũkeethĩwa wĩ o wa mana.”

12Nĩvo ĩndĩ Nzelũvaveli mwana wa Sealitieli, na Mũthembi Mũnene Yosua mwana wa Yeosataki, vamwe na andũ onthe ala masyokie kuma Mbavilonĩ kũla matwaĩtwe me ove, meanĩisye ũndũ Mwĩai Ngai, Ngai woo wamatavĩtye, na meanĩsya ũtũmani ũla mwathani Akai wamanengie. Meekie ũu me na kĩkĩo kya Mwĩai Ngai.

13Nĩvo ĩndĩ Akai mũtũmwa wa Mwĩai Ngai wanengie andũ ũtũmani wa Mwĩai Ngai amea atĩĩ, “Mwĩai Ngai easya ũũ: ‘Nyie nĩ vamwe nenyu.’ ”

14Mwĩai Ngai Mwene Ũtonyi W'onthe nĩwathangaaisye kĩla mũndũ athũkũme Ĩkalũnĩ; nĩwathangaaisye Nzelũvaveli ngavana wa Yuta, Yosua Mũthembi Mũnene na andũ onthe ala masyokie kuma Mbavilonĩ. Nĩmookie na mambĩĩa kũthũkũma Ĩkalũnĩ ya Mwĩai Ngai Mwene Ũtonyi W'onthe, Ngai woo.

15Mambĩĩie kũthũkũma mũthenyanĩ wa mĩongo ĩlĩ na inya wa mwei wa thanthatũ, mwakanĩ wa kelĩ wa kũsumbĩka kwa Ndalio.

Jump to: Chapter 2 →