Haggai 2

Kamba (MBIVILIA ŨVOO MŨSEO)

← Chapter 1 Jump to:

1Mũthenyanĩ wa mĩongo ĩlĩ na ũmwe wa mwei wa mũonza, mwakanĩ wa kelĩ wa kũsumbĩka kwa Ndalio, Mwĩai Ngai nĩwaneenie ĩngĩ kwĩsĩla vala ve mwathani Akai ayasya atĩĩ,

2“Neena na ngavana wa Yuta, ũla nĩ Nzelũvaveli mwana wa Sealitieli, na Mũthembi Mũnene Yosua mwana wa Yeosataki, na o ta ũu ũineena na andũ onthe ala masyokie kuma Mbavilonĩ kũla matwaĩtwe me ove ũmee atĩĩ,

3‘Katĩ wenyu nũũ ũla ũtialĩte na woonie ũndũ Ĩkalũ yĩĩ yaanakavĩte? Mwĩona yĩilyĩ ata yu? Vate nzika mwĩona yĩilyĩ vathei!

4Ĩndĩ yu nyie Mwĩai Ngai nĩasya: Nzelũvaveli ĩthĩwa na ũkũmbaũ; Yosua Mũthembi Mũnene ĩthĩwa na ũkũmbaũ; inyw'ĩ andũ onthe ĩthĩwai na ũkũmbaũ. Nyie Mwĩai Ngai Mwene Ũtonyi W'onthe nĩasya: Thũkũmai, nũndũ nyie nĩ vamwe nenyu.

5Yĩla mwaumaa nthĩ ya Misili nĩnamwathie kana ngeethĩawa vamwe nenyu. Yu nĩ o vamwe nenyu na kwoou ekai kũkĩa.’

6“Nyie Mwĩai Ngai Mwene Ũtonyi W'onthe nĩasya kana kavindanĩ kanini kokĩte nĩngũthingithya ĩtu na nthĩ, ũkanga na nthĩ nyũmũ ĩngĩ.

7Nĩngũthingithya nthĩ syonthe nĩ kana ũthwii w'onthe wa nthĩ ũetwe vaa, na ndyusũsya Ĩkalũ yĩĩ na ũthwii. Nyie Mwĩai Ngai nĩnaneena.

8Nyie Mwĩai Ngai Mwene Ũtonyi W'onthe nĩasya kana silĩva w'onthe nĩ wakwa, na thaavu w'onthe nĩ wakwa.

9Nyie Mwĩai Ngai Mwene Ũtonyi W'onthe nĩasya kana Ĩkalũ yĩĩ yeũ yĩĩthĩwa yĩ yanake mbee wa yĩla ya mbee, na vau nĩvo ngatuma andũ makwa maendeea nesa.”

10Mũthenyanĩ wa mĩongo ĩlĩ na inya wa mwei wa kenda, mwakanĩ wa kelĩ wa kũsumbĩka kwa Ndalio, Mwĩai Ngai Mwene Ũtonyi W'onthe nĩwaneenie ĩngĩ na mwathani Akai.

11Nĩwamwĩie atĩĩ, “Nyie Mwĩai Ngai Mwene Ũtonyi W'onthe nĩasya, ‘Kũlya athembi makũnenge ũsũngĩo wa ĩkũlyo yĩĩ:

12Ethĩwa mũndũ nĩwoosa kĩlungu kya nyama ntheu kuma nthembonĩ na aikĩkua na mũtũlo wa ngũa yake, na aikiita na ngũa ĩsu yake mũkate, kana ũsũũ, kana ndivai, kana mauta, kana lĩu wa mũthemba o na wĩva, syĩndũ isu nitw'ĩkaa ntheu?’ ” Athembi nĩmasũngĩie masya, “Aiee.”

13Nĩvo ĩndĩ Akai wakũlilye atĩĩ, “Ethĩwa mũndũ nĩ mũvuku nũndũ wa kũkiita mũndũ mũkw'ũ, na aikiita ũmwe wa malĩu asu, ũndũ ũsu ũkatuma syĩndũ isu syĩthĩwa syĩ mbuku?” Athembi nĩmasũngĩie masya, “Ĩĩ.”

14Akai nĩwaneenie asya atĩĩ, “Mwĩai Ngai easya, ‘Andũ ma nthĩ ĩno mailyĩ ũu, o na ũsyao wa wĩa woo ũilyĩ ũu na kwoou kyonthe kĩla meũthembea kĩthembeonĩ nĩ kĩvuku.

15Yu nĩngũmũkũlya mũsũanĩe mũno kuma ũmũnthĩ kũthi na mbee, sũanĩai ũndũ kwailyĩ mũtanamba kwambĩĩa kwaka Ĩkalũ yĩĩ ĩngĩ.

16Mũndũ anaendaa vandũ vombanĩw'e ngetha ya mbaa mbeke, aisũanĩa kana eĩthĩa ithimo mĩongo ĩlĩ, ĩndĩ ayĩthĩa ithimo ĩkũmi, na mũndũ aithi vala vaiawa ndivai aisũanĩa ekwata ithimo mĩongo ĩtano, ĩndĩ ayĩthĩa ithimo mĩongo ĩlĩ.

17Nĩnatumie syĩndũ ila mũvandĩte syanangwa nĩ kĩseve kya kwananga, mbuka na mbua ya mavia, ĩndĩ o na neeka ũu mũyaanzyokea. Nĩasya ũu nyie Mwĩai Ngai Mwene Ũtonyi W'onthe.

18Kuma ũmũnthĩ, mũthenya wa mĩongo ĩlĩ na inya wa mwei wa kenda, na kũendeea na mbee, nĩmũkũlya mũsũanĩe nesa, kuma mũthenya ũla mũsingi wa Ĩkalũ yakwa waminie kwakwa, kwa sũanĩai nesa.

19O na vala makũmbĩ yu mai na ngetha ya mbaa mbeke, nayo mĩsavivũ, mĩkũyũ, mĩkũngũmanga na mĩthata ndĩnamba kũsyaa, kuma ũmũnthĩ nyie nĩngũmũathima.’ ”

20Mũthenyanĩ wa mĩongo ĩlĩ na inya wa mwei wa kenda, Mwĩai Ngai nĩwaneenie na Akai ĩvinda ya kelĩ amwĩa,

21“Neena na Nzelũvaveli ngavana wa Yuta ũmwĩe atĩĩ, ‘Nyie Mwĩai Ngai ngilĩlye kũthingithya ĩtu na nthĩ,

22na ndyananga mosumbĩ. Ngilĩlye kwananga ũtonyi wa mosumbĩ ma nthĩ. Nĩngũkulumany'a makasya ma kaũ na ala mamatwaaa; mbalasi niũkw'a, na ala maitũlĩte mayũaana ene kwa ene.

23Mũthenya ũsu, ngakwosa we mũthũkũmi wakwa Nzelũvaveli mwana wa Sealitieli, na ngĩũtw'ĩkĩthya ta mbete ya kwĩkĩa mũulĩ, nũndũ nyie nĩngũnyuvĩte. Nĩasya ũu nyie Mwĩai Ngai Mwene Ũtonyi W'onthe.’ ”

← Chapter 1 Jump to: