James 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Mbaitũ, aingĩ menyu maikendeew'e nĩ kũtw'ĩka amanyĩsya. O tondũ mwĩsĩ, ithyĩ ala tũmanyĩasya tũkasilĩlwa na ũsilĩlo mũnene kwĩ andũ ala angĩ.

2Ithyonthe mavinda maingĩ nĩtũvĩtasya. Ĩndĩ ethĩwa ve mũndũ ũtavĩtasya ndetonĩ syake, mũndũ ũsu nĩ mwĩthĩanu na nũtonya kũsumbĩka mwĩĩ wake w'onthe.

3Twĩkĩaa mbalasi kĩtang'a na mĩkwa nĩ kana yĩke ũndũ tũkwenda, na kũmĩthyũũaa ĩthi kũla tũkwenda.

4Kana kwa twosei ngelekany'o ya meli: O na kau nĩ nene mũno na ĩtwaawa nĩ kĩseve kĩ vinya, ĩkomoawa na kamũtĩ kanini ĩkathi ngalĩko ĩla mũtwai wayo ũkwenda.

5Ũu now'o kũilyĩ kwa ũĩmĩ: No kamutha kanini ka mwĩĩ, ĩndĩ wĩkathaa na maũndũ manene. Kwa sũanĩai ũndũ kĩtheka kĩnene kĩkwataw'a mwaki nĩ kakala ka mwaki.

6Ũĩmĩ o naw'o nĩ ta mwaki. Nĩ ta nthĩ nima ya ũthũku, yĩkĩĩtwe nthĩnĩ wa mĩĩ yaitũ, na ũthũkasya mwĩĩ w'onthe ũkatw'ĩka mũthũku. Wanangaa thayũ witũ vyũ na mwaki ũilyĩ ta wumaa ĩianĩ ya mwaki.

7Mũndũ nũtonya kũvoovya nyamũ sya kĩthekanĩ na nyũnyi, na syĩndũ ila ikungaa na nthĩ ta nzoka, na ila syĩkalaa kĩw'ũnĩ ta makũyũ, syonthe ikekala nake ta sya mũsyĩ na kwa w'o nũvoovetye syĩndũ isu.

8Ĩndĩ vai mũndũ waatonya kũvoovya ũĩmĩ, naw'o nĩ mũthũku na ndũsiĩĩka. Wusũĩte sumu wa kũaa.

9Nĩtũũtũmĩaa kũmũkatha Mwĩai na Asa waitũ, na o ta ũu tũiũtũmĩa kũumanĩa andũ, namo mombĩtwe na kĩtutya kya Ngai.

10Kuma kanyw'anĩ o ũmwe nĩvaumaa ndeto sya kũathima na sya kũumanĩa. Mbaitũ ũndũ ũsu ndwaĩlĩte kwĩthĩwa.

11Vai kĩthima kya kĩw'ũ kyumasya kĩw'ũ kĩseo na kĩyumya kĩw'ũ kĩ mũnyũ.

12O ta ũu mbaitũ, mũkũyũ ndũtonya kũsyaa nzavivũ, kana mũsavivũ ũkasyaa makũyũ? O ta ũu kĩthima kĩ mũnyũ kĩyĩthĩwa kĩw'ũ kĩseo.

13Nũũ ũla mũĩ na ũkũelewa katĩ wenyu? Nĩonany'e ũu kwa kwĩthĩwa na mwĩkalo mũseo, na kwa kwĩkaa maũndũ maseo e na wĩnyivyo wumanĩte na ũĩ.

14Ĩndĩ ethĩwa ngoonĩ syenyu mwĩ na kĩwĩu kĩthũku mũno, ũthatu na kwĩyenda ene, mũikekathĩĩe kana mwĩ oĩ. Kwa kwĩka ũu mwĩĩthĩwa mwaneena ũvũngũ na kũvitha ũw'o.

15Ũĩ wa mũthemba ũsu ndwĩthĩawa wumĩte ĩtunĩ; nĩ wa kũũ nthĩ; ti wa kĩ-veva; nĩ wa kĩ-satani.

16Nũndũ vala ve kĩwĩu na andũ kwĩyenda ene, vau vethĩawa ithokoo na mothũku ma kĩla mũthemba.

17Ĩndĩ ũĩ ũla wumaa ĩtunĩ mbee nĩ mũtheu, wĩ mũuo, na nĩ mũuu; nũsũanĩaa ĩũlũ wa andũ ala angĩ, wĩ tei mwingĩ na wĩ mosyao maseo; ndwĩ wendeesyo kana mĩseũvyo.

18Ũlũngalu wa w'o nĩ ngetha ya mbeũ ĩla ĩvandĩtwe nĩ andũ ma mũuo nthĩnĩ wa mũuo.

← Chapter 2 Jump to: Chapter 4 →