James 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Nĩ kyaũ kĩla kĩtumaa mũkitana na kwĩthĩwa na ĩteta katĩ wenyu? Kũkitana kũu kũendee katĩ wenyu kumanĩte na mawendi menyu mathũku.

2Nĩmwendaa kwĩthĩwa na syĩndũ na mũikwataa, na kwoou o na mũyũaa mũndũ. Nĩmwĩw'ĩaa syĩndũ syeene ĩtomo na mũitonya kũsyosa, na kwoou mũitetany'a na kũkita. Mũleaa kwĩthĩwa na syĩndũ ila mũkwenda nũndũ mũivoyaa Ngai amũnenge.

3Na yĩla mwavoya mũikwataa, nũndũ mũvoyaa na kĩeleelo kĩthũku kya kwenda mũtũmĩe kĩla mũũvoya mwĩtanĩthye inyw'ĩ ene.

4Inyw'ĩ andũ mũte na mũĩkĩĩo, no mwĩsĩ kana kũtuma ndũũ na nthĩ kũtumaa mũndũ atw'ĩka mũmaitha wa Ngai? Kwoou mũndũ ũla wendaa kũtuma ndũũ na maũndũ ma nthĩ etusaa mũmaitha wa Ngai.

5Ko mũkwona Maandĩko Matheu ta maneenete mana ala maĩtye, “Ngai nĩwendete mũno veva ũla weekĩie nthĩnĩ waitũ ũtũae vo.”

6Ĩndĩ mumo ũla Ngai ũtũnengae nĩ mwingĩ mũno. O tondũ Maandĩko Matheu maĩtye, “Ngai nũleanaa na andũ ala menenevasya, ĩndĩ nũnengae mumo andũ ala menyivasya.”

7Kwoou mwĩnyivĩsyei Ngai; mũsiĩĩei Satani na akasemba aume vala mũĩ.

8Thengeanĩai na Ngai, nake nũkũthengeanĩa nenyu. Thambyai moko menyu na mũithesya ngoo syenyu, inyw'ĩ andũ mũaanĩkĩte mawendinĩ menyu.

9Mwaĩlĩte kwĩw'a woo na kũĩa mũno. Vandũ va kũtheka mwaĩlĩte kũĩa, na vandũ va kũtana mwaĩlĩte kũmaka.

10Ĩnyivyei mbee wa Mwĩai, nake akamũnenevya.

11Mbaitũ, mũikaneenanĩe naĩ ũmwe kwa ũla ũngĩ. Mũndũ ũla ũneeneaa Mũklĩsto ũla ũngĩ naĩ kana kũmũsilĩla, ethĩawa aineenea Mĩao na kwasya ti mĩseo. Yĩla mũndũ wasya Mĩao ti mĩseo ethĩawa aeka kũmĩatĩĩa na ayĩtw'ĩkĩthya e ĩũlũ wayo.

12Ngai no we e weka mũnengani wa Mĩao na no we mũsili. We no we ũtonya kũtangĩĩa andũ na kũmananga. Kwoou we nue ũũ ũisilĩla andũ ala angĩ?

13Mbĩthukĩĩsyei yu inyw'ĩ ala mwaasya, “Ũmũnthĩ kana ũnĩ tũkathi vana na vana, tũkekale kw'o vandũ va mwaka ũmwe, na kũkũna vaita tũkwate mbesa mbingĩ.”

14Mũyĩsĩ ũnĩ kũkeethĩwa kũilyĩ ata. Thayũ wenyu nĩ kyaũ? Mũvw'ana ta mũumbĩ ũla wumĩlaa o kwa kavinda na ũyaa.

15Vandũ va ũu mwaĩlĩte kwaasya atĩĩ, “Ethĩwa nĩkw'o kwenda kwa Mwĩai, tũkeethĩwa thayũ na tũkeeka ũna na ũna.”

16Ĩndĩ yu ũndũ kũilyĩ mwĩneena na mĩkathĩĩo. Mĩkathĩĩo ya mũthemba ũsu nĩ mĩthũku.

17Nĩ naĩ kwa mũndũ kwĩthĩwa esĩ ũndũ ũla waĩlĩte kwĩka, ĩndĩ ailea kũwĩka.

← Chapter 3 Jump to: Chapter 5 →