Malachi 1

Kamba (MBIVILIA ŨVOO MŨSEO)

Jump to: Chapter 2 →

1Ũũ nĩ ũtw'ĩo wĩ vinya ũla Mwĩai Ngai wanengie Malaki atavye andũ ma Ĩsilaeli:

2Mwĩai Ngai easya atĩĩ, “Nyie nĩnĩmwendete. Ĩndĩ inyw'ĩ mwĩkũlya, ‘Ũtwendete ata?’ Nĩmũkũlya atĩĩ, nĩmwĩsĩ kana Esaũ aĩ mwana-a-inyia wa Yakovo? Ĩndĩ o na ũu wĩ o vo, nyie nĩnendie Yakovo,

3na namena Esaũ. Nĩnatumie nthĩ yĩ iĩma ya Esaũ yĩthĩwa ĩte na ũsyao, na namĩtw'ĩkĩthya wĩkalo wa mbĩwa sya weũnĩ.”

4Mwĩai Ngai Mwene Ũtonyi W'onthe easya atĩĩ, “Ethĩwa Aetomu, nzyawa sya Esaũ makasya, ‘Nĩtwanyaĩĩkiw'e, ĩndĩ nĩtũkwaka ĩngĩ kũla kwaomboangiwe,’ nĩmatonya kwaka, ĩndĩ ngakũomboanga nginya yĩla maketwa, ‘Nthĩ nthũku, andũ ala Mwĩai Ngai ũthatĩĩte tene na tene.’

5Inyw'ĩ ene mũkeeyonea maũndũ asu na mũkaneena mwasye, ‘Mwĩai Ngai nĩ mũnene, o na nza wa nthĩ ya Ĩsilaeli.’ ”

6Mwĩai Ngai Mwene Ũtonyi W'onthe eneena nenyu inyw'ĩ athembi ala mũvũthasya ĩsyĩtwa yake ayasya atĩĩ, “Mwana nũtaĩaa ĩthe, na mũthũkũmi nũtaĩaa mũnene wake. Ethĩwa ĩndĩ nyie nĩ ĩthe wenyu, mwĩlea kũndaĩa nĩkĩ? Na ethĩwa nyie nĩ mũnene wenyu, mwĩlea kũnenga ndaĩa nĩkĩ? Mũneenaa mũkasya, ‘Tũvũthĩtye ĩsyĩtwa yaku ata?’

7Mwĩkĩte ũu kwa kũthembea lĩu mũvuku kĩthembeonĩ kyakwa, ĩndĩ nenyu mwĩkũlya, ‘Ithyĩ tũũvukĩtye ata?’ Nũndũ mwĩasya kana mesa ya Mwĩai Ngai nĩ kĩndũ kya kũvũthw'a.

8Yĩla mwathemba nyamũ ite metho, ũu tyo ũthũku? Na yĩla mwaumya nthembo sya nyamũ ila syĩ maũũ mathũku kana ndwau, mwĩona ũsu ta ũndũ ũte mũthũku? Kwa tatai kũsyumĩsya ngavana wenyu. Mwĩona ta ũkendeew'a ninyw'ĩ? Kana akamwĩtĩkĩla?” Ekũlya ũu Mwĩai Ngai Mwene Ũtonyi W'onthe.

9“Yu mwĩsũvei Ngai nĩ kana atwĩke nesa. Nĩkũlya atĩĩ, mwĩ na nthembo sya mũthemba ũsu, mwĩsũanĩa kana akamwĩtĩkĩla?” Easya ũu Mwĩai Ngai Mwene Ũtonyi W'onthe.

10Mwĩai Ngai Mwene Ũtonyi W'onthe easya atĩĩ, “Nenda kethĩwa ve ũmwe katĩ wenyu ũtonya kũvinga mĩvĩa ya Ĩkalũ nĩ kana mũikakwatye mwaki wa mana kĩthembeonĩ kyakwa. Nyie ndyendeeaw'a ninyw'ĩ na ndyĩtĩkĩla nthembo mũmbumĩsye.

11Nũndũ kuma wumĩlonĩ wa syũa kũvika ũthũĩlonĩ wayo, andũ onthe nĩmanengae ĩsyĩtwa yakwa ndaĩa. Na kĩla vandũ nĩnthembeawa nthembo ya ũvani, na o ta ũu kũthembewa nthembo mbaĩlu. Andũ onthe nĩmanengae ĩsyĩtwa yakwa ndaĩa.” Easya ũu Mwĩai Ngai Mwene Ũtonyi W'onthe.

12“Ĩndĩ nĩmũvukasya ĩsyĩtwa yakwa yĩla mwaneena na kwasya, ‘Mesa ya Mwĩai Ngai nĩ mbuku,’ na yĩla mwathembea ĩũlũ wayo lĩu ũla mũvũthasya.

13Mũneenaa mũyasya atĩĩ, ‘Nĩtwanoiw'e nĩ ũndũ ũũ!’ Nĩmũmbũthasya. Nĩmũmbumĩasya nthembo ya nyamũ sya ũng'ei, kana ila syĩ na maũũ mathũku, kana ila ndwau. Mwĩsũanĩa kana nyie ngasyĩtĩkĩla kuma kwenyu?

14Nĩ mũumanĩe mũkengani ũla ũnthembeaa nyamũ ĩte vata, o yĩla wĩ na katena kaseo kaũme ndĩthyanĩ yake, na nĩwathanie kana akanthembea ko! Nũndũ nyie nĩ mũsumbĩ mũnene na andũ onthe nĩmanengae ĩsyĩtwa yakwa ndaĩa.” Easya ũu Mwĩai Ngai Mwene Ũtonyi W'onthe.

Jump to: Chapter 2 →