Malachi 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1“Inyw'ĩ athembi ĩthukĩĩsyei; mwĩao ũũ nĩ kwondũ wenyu!

2Nyie Mwĩai Ngai Mwene Ũtonyi W'onthe nĩasya atĩĩ: Mwalea kũmbĩthukĩĩsya, mwalea kwĩkĩa ngoonĩ syenyu kũnenga ĩsyĩtwa yakwa ndaĩa, ngamũumanĩa na o ta ũu ngaumanĩa syĩndũ ila imũeteae ũathimo. Kwa w'o, o na yu nĩnĩminĩte kũiumanĩa nũndũ nĩmũleete kwĩkĩa mĩao yakwa ngoonĩ syenyu.

3Ngakany'a nzyawa syenyu na ngĩvaka mothyũ menyu mũyoo, mũyoo wa nyamũ ila mũkũnthembea na ngamũvetanga vaasa nakwa.

4Nĩvo ĩndĩ mwĩmanya kana nĩnamũnenga mwĩao ũũ nĩ kana ũtianĩo wakwa na athembi, nzyawa sya Livai, ũendee kwĩanĩw'a. Nĩasya ũu nyie Mwĩai Ngai Mwene Ũtonyi W'onthe.

5“Ũtianĩo wakwa namo waĩ ũtianĩo wa kũendeea kwĩthĩwa thayũ na kũendeea nesa, na kĩu nĩkyo namanengie nĩ kana manengae ndaĩa. Ĩvindanĩ yĩu, nĩmanengae ndaĩa na maĩ na kĩkĩo kya ĩsyĩtwa yakwa.

6Nĩmamanyĩasya ũla w'o na mayakenganaa. Nekalanasya namo na mũuo na ũlũngalu, na nĩmatumie andũ aingĩ maeka kwĩka naĩ.

7Athembi nĩmaĩlĩte kũmanyĩsya maũndũ ma ũĩ na andũ nĩmaĩlĩte kũkũlya ũtao kuma kwoo, nũndũ mũthembi nĩ mũtũmwa wa Mwĩai Ngai Mwene Ũtonyi W'onthe.

8Ĩndĩ inyw'ĩ athembi nĩmweelelũkile kuma nzĩanĩ; nĩmũtumĩte aingĩ maluluutĩka nũndũ wa momanyĩsyo menyu. Nĩmwanangĩte ũtianĩo ũla natianĩie na Alivai. Nĩasya ũu nyie Mwĩai Ngai Mwene Ũtonyi W'onthe.

9“Kwoou nyie nakwa nĩnatumie mwĩthĩwa mwĩ andũ ma kũvũthw'a, na kũlea kũnengwa ndaĩa nĩ andũ onthe, nũndũ nĩmwaleile kũatĩĩa kwenda kwakwa, na nĩmwonanĩtye wendeesyo maũndũnĩ ma mĩao.”

10Nĩkũlya, tũi na ĩthe ũmwe ithyonthe? Tyo Ngai ũmwe ũla watũmbie? Nĩ kyaũ kĩtumi twĩthĩĩtwe tũte aĩkĩĩku ũmwe kwa ũla ũngĩ, na kũvũthya ũtianĩo ũla Ngai watianĩie na aaũmae maitũ?

11Andũ ma Yuta nĩmethĩĩtwe mate aĩkĩĩku, na nĩmekĩte maũndũ ma kũthatya nthĩnĩ wa Ĩsilaeli na Yelũsalemu. Nĩmavukĩtye Ĩkalũ ya Mwĩai Ngai yĩla wendete. Aũme ma Yuta nĩmatwaĩte aka mathaithaa ngai ngeni.

12Mwĩai Ngai navetange andũ ala mekĩte ũu kuma andũnĩ ala angĩ ma Ĩsilaeli. Ndakaaeke ĩngĩ andũ asu methĩwe ngwatanĩo na nthembo ila mbaĩ yaitũ ĩthembeaa Mwĩai Ngai Mwene Ũtonyi W'onthe.

13O na ĩngĩ nĩmwĩkaa maũndũ aa: Nĩmusũasya kĩthembeo kya Mwĩai Ngai na methoi. Nĩmũĩaa na kũluma nũndũ ndetĩkĩlaa kana akosa na ũtanu nthembo syenyu ila mumasya.

14Inyw'ĩ mũkũlasya, “Elea kũsyĩtĩkĩla nĩkĩ?” Mwĩai Ngai aleaa nũndũ nĩwĩsĩ kana nĩwaanangie ũtianĩo ũla waseũvisye wĩ na mũka waku ũla watwaie wĩ wa mũika. Aĩ mũka waku naku nũleete kwĩanĩsya ũtianĩo waku nake, o na kau nĩwatianĩie nake mbee wa Ngai kana ũkeethĩawa wĩ mũĩkĩĩku.

15Nĩkũlya, nũndũ Ngai ũtaamũmba mũtw'ĩke mwĩĩ ũmwe na thayũ ũmwe? Avangĩte ata yĩla weekie ũu? Eekie ũu nĩ kana tũsyae syana syĩthĩawe na kĩkĩo kyake. Kwoou mũndũ ndakethĩwe ate mũĩkĩĩku kwa mũka wake ũla watwaie e wa mũika.

16Mwĩai Ngai Mwene Ũtonyi W'onthe, Ngai wa Ĩsilaeli easya atĩĩ, “Nyie nĩnĩmenete mũndũ aitaanĩsya na mũka wake. Ndyendeeaw'a yĩla ũmwe wenyu weeka mũka wake ũndũ ũthũkĩte ta ũsu. Mũikanange ũtianĩo wa kwĩthĩwa mwĩ aĩkĩĩku kwa iveti syenyu!”

17Nĩmũnoetye Mwĩai Ngai na ndeto syenyu ĩndĩ inyw'ĩ mwĩkũlya, “Tũmũnoetye ata?” Mwĩkaa ũu yĩla mwasya, “Mwĩai Ngai onaa mwĩki wa naĩ e mũseo, na nĩwendeeaw'a nĩwe.” Kana yĩla mwakũlya, “Aĩva Ngai ũla wumasya sila wa katĩ?”

← Chapter 1 Jump to: Chapter 3 →