Mark 14 — Kamba (MBIVILIA ŨVOO MŨSEO)

1Vatiele mĩthenya ĩlĩ mũthenya wa Mboka ya Vasaka na wa Mĩkate ĩte Mbota ũvike, athembi anene na amanyĩsya ma Mĩao nĩmamanthaa ũndũ matonya kũmũkwata Yesũ kwa ũseleke na kũmũtw'ĩĩa kũawa.

2Nĩmaneenanisye masya atĩĩ, “Tũikeke ũu mũthenya wa mboka, andũ maikese kũkĩlya ituu.”

3Ĩvinda yĩmwe Yesũ nĩwaendie Mbethani mũsyĩ kwa Simioni ũla navu ĩtina wawaĩte mangũ. Aendee na kũathĩw'a, mũndũ mũka ũmwe nĩwookie akuĩte sũva ũseũvĩtw'e na ĩvia yĩtawa alambasita, wusũĩte mauta me mũuke mũseo na ma mbesa mbingĩ metawa nando. Nĩwaũkunũie na etĩkĩsya Yesũ mauta asu onthe mũtwe.

4Andũ amwe maĩ vau nĩmathatie mũno na makũlany'a atĩĩ, “Yu wanango ũũ wa mauta nĩ wakĩ?

5Mauta aa meĩ matewa mbee wa ndinalĩ maana atatũ na iinengwa ngya.” Nĩmambĩĩie kũtavya mũndũ mũka ũsu ndeto nthũku.

6Ĩndĩ Yesũ nĩwameie atĩĩ, “Ekanai nake; mwĩmũthĩnĩsya kĩ? Ambĩka nesa mũno.

7Mũkekalaa na ngya mavinda onthe, na no mũitethasye o yĩla mũkwenda, ĩndĩ nyie ndyĩkalaa nenyu mavinda onthe.

8Mũndũ mũka ũũ eeka ũndũ ũtonya. Etĩkĩsya mwĩĩ wakwa mauta awũmbany'e kwondũ wa mathiko makwa.

9Nĩmũtavya w'o, kũndũ kw'onthe ĩũlũ wa nthĩ kũla Ũvoo Mũseo ũkatavanw'a, o naw'o ũndũ ũũ mũndũ mũka ũũ weeka, ũkawetawa nĩ kana andũ mamũlilikanae.”

10Nĩvo ĩndĩ Yutasi Ĩsikalioti, nake nĩ ũmwe wa ala amanyĩw'a ĩkũmi na elĩ, waendie kwa athembi anene nĩ kana athoosye Yesũ kũla maĩ.

11Namo meew'a ũu matana na mamwatha kũmũnenga mbesa. Kuma vau Yutasi nĩwambĩĩie kũmantha mwanya mũseo wa kũmũthoosya Yesũ kũla maĩ.

12Mũthenyanĩ wa mbee wa Mboka ya Mũkate ũte Mbota, na now'o mũthenya ũla Ayuti mathĩnzaa kalondu ka Mboka ya Vasaka, amanyĩw'a ma Yesũ nĩmamũkũlilye atĩĩ, “Wĩenda tũkaũseũvĩsye Mboka ya Vasaka va?”

13Nake atũma elĩ moo amea atĩĩ, “Endai mũsyĩnĩ mũnene wa Yelũsalemu, na nĩmũũkomana na mũndũ-ũme akuĩte kĩw'ũ na kĩkuu. Mũatĩĩei,

14na nyũmba ĩla ũkũthi kũlika mũyĩa mwene wayo atĩĩ, ‘Mũmanyĩsya aũkũlya: Ĩĩva nyũmba ĩla nyie na amanyĩw'a makwa tũkũĩĩa Mboka ya Vasaka?’

15Nũkũmwony'a nyũmba nene yĩ ngolovanĩ na nzeũvye yĩna kĩla kĩndũ; seũvĩsyai vau.”

16Amanyĩw'a asu nĩmaumaalile mathi mũsyĩnĩ mũnene wa Yelũsalemu na meethĩa kĩla kĩndũ kĩilyĩ o ũndũ Yesũ wamatavĩtye, na maseũvya Mboka ya Vasaka.

17Kwavika wĩoo, Yesũ nĩwookanisye na amanyĩw'a make me ĩkũmi na elĩ.

18Maendee na kũathĩw'a, Yesũ nĩwameie atĩĩ, “Ekai nĩmũtavye, ũmwe wenyu tũũya ĩmwe vaa, nũkũnthoosya kũla kwĩ amaitha.”

19Amanyĩw'a nĩmeewie woo na mambĩĩa kũmũkũlya ũmwe kwa ũmwe, “No kwĩthĩwa ne inyie?”

20Nake amea atĩĩ, “Nĩ ũmwe wenyu mwĩ ĩkũmi na elĩ, na ũkũvokanĩa nakwa ĩsaaninĩ yĩmwe.

21Kwa w'o Mwana wa Mũndũ ekw'a o kwĩanana na ũndũ Maandĩko Matheu maĩtye, ĩndĩ kyeva nĩ kwa mũndũ ũsu ũkũmũthoosya Mwana wa Mũndũ kwa amaitha. Nĩ kavaa kethĩwa mũndũ ũsu ndaasyawa.”

22Maendee na kũathĩw'a, Yesũ nĩwoosie mũkate na atũnga mũvea kwa Ngai; nĩwaũtilangile na aũnenga amanyĩw'a make ayasya atĩĩ, “Kwatai mũye, ũũ nĩ mwĩĩ wakwa.”

23O ta ũu nĩwoosie kĩkombe kĩ ndivai, atũnga mũvea kwa Ngai na amanenga onthe manyw'a.

24Nĩwameie atĩĩ, “Ĩĩ nĩ nthakame yakwa ya ũtianĩo mweũ, ĩla ĩkwĩtĩkw'a kwondũ wa andũ aingĩ.

25Nĩmũtavya w'o, ndikanyw'a ĩngĩ ndivai ĩno kũvika mũthenya ũla nganyw'a ndivai nzaũ ũsumbĩnĩ wa Ngai.”

26Nĩvo ĩndĩ mainie wathi na maumaala mathi Kĩĩmanĩ kya Mĩthata.

27Yesũ nĩweeie amanyĩw'a make atĩĩ, “Inyw'onthe nĩmũũndia mũthi, nũndũ nĩkũandĩkĩtwe Maandĩkonĩ Matheu: ‘Ngai akooaa mũĩthi na malondu mainyaĩĩkĩa kĩthekanĩ.’

28Ĩndĩ ĩtina wa kũthayũũka kwakwa, ngaenda mũkambĩthĩae mbikie Kalilii.”

29Vetelo amwĩa atĩĩ, “O na ethĩwa ala angĩ nĩmeũkũtia mathi, nyie ndikaũtia o na ĩndĩĩ.”

30Nake Yesũ amwĩa atĩĩ, “Nĩkũtavya w'o, ũtukũ ũũ nzamba ĩtanamba kwasya ya kelĩ, nũũkaĩa katatũ wasye ndũmbĩsĩ.”

31Vetelo amwĩa atĩĩ, “O na ethĩwa no nginya nĩkw'e vamwe naku, ndiasya kana ndikwĩsĩ.” Amanyĩw'a ala angĩ onthe nĩmaisye oou.

32Yesũ na amanyĩw'a make nĩmaendie vandũ vetawa Ngethisemani, na amea atĩĩ, “Ĩkalai vaa nambe kũvoya.”

33Nĩwaendanisye na Vetelo, Yakovo na Yoana, na akwatwa nĩ kĩmako na kĩũũyũ kingĩ,

34na kwoou amea atĩĩ, “Nĩna kĩmako kingĩ ngoonĩ yakwa, o na kĩĩw'a kũmbũaa; ĩkalai vaa na mũikakome.”

35Yesũ nĩwaendangie mbee vanini, eevalũkya nthĩ na avoya nĩ kana ĩvinda yĩu ya thĩna yĩmũvĩtũke ethĩwa nĩvatonyeka.

36Nĩwavoyie ayasya atĩĩ, “Nau, Asa, we nũtonya maũndũ onthe. Mbetangĩe kĩkombe kĩĩ kya mathĩna, ĩndĩ ndũkeke ũndũ ngwenda nyie, ĩka ũndũ ũkwenda we.”

37Yesũ nĩwasyokie vala ve ala amanyĩw'a atatũ na amethĩa makomete. Nĩwamũkũlilye Vetelo atĩĩ, “Simioni, ko ũkomie? O na ndwĩkala ĩsaa yĩmwe ũsalukĩtye?

38Ĩkalai mũsalukĩtye na mũivoya mũikalike matatwanĩ. Nĩmũkwenda kwĩka ũla waĩlu ĩndĩ mwĩ onzu.”

39Yesũ nĩwaendie ĩngĩ akavoye, na atũngĩlĩĩla o ĩla mboya.

40Nĩwasyokie ĩngĩ vala ve amanyĩw'a na amethĩa makomete, nũndũ maĩ na too mwingĩ, namo mayaamanya memwĩa ata.

41Yĩla wasyokanĩisye ya katatũ nĩwamakũlilye atĩĩ, “O nayu nomũkomete na kũthũmũa? Nĩmweany'a ĩndĩ! Aaya, saa nĩwavika wa Mwana wa Mũndũ kũnenganwe ũtonyinĩ wa andũ athũku.

42Ũkĩlai tũthi; mũndũ ũla ũkũnthoosya kwa amaitha nĩwavika.”

43Yesũ o aendee na kũneena, Yutasi, ũmwe wa ala amanyĩw'a ĩkũmi na elĩ nĩwavikie. Ookanisye na andũ angĩ aingĩ makuĩte mbyũ na nzũma, matũmĩtwe nĩ athembi anene na amanyĩsya ma Mĩao na atumĩa.

44Yutasi ũla wamũthooisye Yesũ nĩwamatavĩtye akamea atĩĩ, “Mũndũ ũla ngũthi kũkethya na ngethi ya wendo, mũndũ nĩwe ũsu; mũkwatei mũmũtwae mũmũsungĩte mũno.”

45Mavika oou, Yutasi nĩwaendie ĩmwe kwa ĩmwe vala ve Yesũ na amwĩta, “Mũmanyĩsya!” Na amũkethya na ngethi ya wendo.

46Nĩvo ĩndĩ ala andũ mamwĩkũmbĩlile Yesũ na mamũkwata.

47Ĩndĩ ũmwe wa ala maũngeme vakuvĩ na Yesũ nĩwakũie ũvyũ wake na atema mũthũkũmi wa Mũthembi Mũnene, amũtila kũtũ.

48Nake Yesũ amakũlya atĩĩ, “Mwooka kũngwata mũkuĩte mbyũ na nzũma ko nĩ kĩng'endilĩ?

49Mbona kĩla mũthenya nĩnatindanasya nenyu ngĩmanyĩsya Ĩkalũnĩ na mũyaangwata? Ĩndĩ ekai yu Maandĩko Matheu meanĩw'e.”

50Nĩvo ĩndĩ amanyĩw'a make onthe masembie mamũtia.

51No mwanake ũmwe wamũatĩĩie Yesũ, na eevotoete suka yoka mwĩĩnĩ wake. Andũ asu nĩmamũkwatie,

52ĩndĩ eetithũkany'a, amatiĩa ĩla suka na asemba athi e mũthei.

53Yesũ nĩwatwaiwe mũsyĩ kwa Mũthembi Mũnene, navo nĩvo athembi anene onthe, vamwe na atumĩa na amanyĩsya ma Mĩao, moombanĩĩte.

54Vetelo nĩwamumĩte Yesũ ĩtina ĩndĩ e kũasa. Yĩla wavikie kĩwanzanĩ kĩla kĩ nza kwa Mũthembi ũsu Mũnene nĩwekalile nthĩ ote mwaki na asikalĩ.

55Athembi anene na andũ ala angĩ ma nzama nĩmatatie kũmantha andũ matonya kũsikata Yesũ nĩ kana mamũtw'ĩĩe kũawa, ĩndĩ mayaaona mũndũ o na ũmwe.

56Andũ aingĩ nĩmaumisye ũkũsĩ wa ũvũngũ ĩũlũ wa Yesũ, ĩndĩ mokũsĩ moo mayaaosana.

57Nĩvo ĩndĩ andũ amwe maũngamie maumya ũkũsĩ wa ũvũngũ masya atĩĩ,

58“Nĩtũneewie mũndũ ũũ ayasya, ‘Ngaananga Ĩkalũ yĩĩ yakĩtwe nĩ andũ, na ĩtina wa mĩthenya ĩtatũ ndyaka yĩngĩ yĩtakĩtwe nĩ andũ.’ ”

59Ĩndĩ o vamwe na ũu, mokũsĩ moo mayaaosana.

60Nĩvo ĩndĩ Mũthembi Mũnene waũngamie e mbee woo na amũkũlya Yesũ atĩĩ, “We ndwĩ na ũndũ ũsũngĩa? Wĩĩw'a andũ aa mayasya ata ĩũlũ waku?”

61Ĩndĩ Yesũ ndaatumũa. Mũthembi Mũnene nĩwamũkũlilye ĩngĩ, “We nue Klĩsto, Mwana wa Ngai ũla Mũathime?”

62Yesũ amwĩa atĩĩ, “Ĩĩ ninyie, na inyw'ĩ mũkamwona Mwana wa Mũndũ ailyĩ nthĩ ngalĩko ya kw'oko kwa aũme kwa Ũla wĩ Ũtonyi, na ayũka kũũ nthĩ akuĩtwe nĩ mathweo ma ĩtunĩ.”

63Mũthembi Mũnene nĩwatembũie ngũa syake nĩ woo na asya atĩĩ, “Vai vata wa ngũsĩ ingĩ.

64Inyw'ĩ nĩmweew'a ayĩuma Ngai; mwĩtw'a ata?” Onthe nĩmamũtw'ĩĩie kana nũvĩtĩtye na aĩlĩtwe nĩ kũawa.

65Amwe nĩmambĩĩie kũmũtw'ĩlanga mata na kũmũmandũlanga mamwovete metho makĩmwĩa atĩĩ, “Tũtavye nũũ ũla wakũmandũla.” Namo asikalĩ mamwosa na mamũlumangya.

66Vetelo e o naku thome, mwĩĩtu ũmwe mũthũkũmi wa Mũthembi Mũnene nĩwaendie vo,

67na yĩla wamwonie Vetelo ayota mwaki, amũketeea na amwĩa atĩĩ, “We ũnaĩ na Yesũ ũla wumĩte Nasaleti.”

68Ĩndĩ Vetelo akaĩa asya atĩĩ, “Ndyĩsĩ, o na ndiũmanya kĩla ũũneena,” na akwata nzĩa aumaala athi mũvĩanĩ, na vau kwa vau nzamba yasya.

69Ũla mwĩĩtu nĩwamwonie Vetelo ĩngĩ na atavya andũ ala maũngamĩte nake amea atĩĩ, “Mũndũ ũũ nĩ ũmwe wa andũ ala maneethĩawa na Yesũ.”

70Ĩndĩ Vetelo asya ĩngĩ ndamwĩsĩ. Ĩtina wa kavinda kanini ala andũ maũngeme vau nĩmeeie Vetelo atĩĩ, “Kwa w'o we wĩ ũmwe wa andũ asu maneethĩawa na Yesũ, nũndũ o naku wumĩte Kalilii.”

71Ĩndĩ Vetelo nĩwambĩĩie kwĩyĩumanĩa na kwĩvĩta ayasya atĩĩ, “Nyie ndimwĩsĩ mũndũ ũsu mũũneena ĩũlũ wake!”

72O vau kwa vau nzamba nĩyaisye ĩvinda ya kelĩ. Vetelo nĩwalilikanile ũndũ Yesũ wamũtavĩtye kana, “Nzamba ĩtanasya ĩvinda ya kelĩ nũũkaĩa katatũ wasye ndũmbĩsĩ,” na kwoou ambĩĩa kũĩa.