bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Mark 6
Mark 6
Kamba (MBIVILIA ŨVOO MŨSEO)
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 7 →
1
Yesũ nĩwaumie vau athi ndũanĩ yake ya mũsyĩ e na amanyĩw'a make.
2
Mũthenya wa Savato wavika nĩwaendie nyũmbanĩ ya Ayuti ya kũthaithĩa na kũmbanĩa, na ambĩĩa kũmanyĩsya vo. Andũ aingĩ ala meewie ũmanyĩsyo wake nĩmaseng'iw'e nĩwe na makũlany'a atĩĩ, “Mũndũ ũũ aumĩtye maũndũ aa onthe va? Ũmanyi ũũ ũnengetwe nĩ wa mũthemba mwaũ, na eĩkanga ata syama ii inenevete ũu?
3
Ũũ we tyo ũla vundi wa mbwaũ, mwana wa Meli na mwana-a-inyia wa Yakovo na Yosevu na Yutasi na Simioni? O na eĩtu-a-inyia make tũyĩkalaa o namo kũũ?” Kwondũ wa ũu nĩmamũleile Yesũ.
4
Yesũ nĩwameie atĩĩ, “Mwathani nũnengawe ndaĩa kĩla vandũ, ate o ndũanĩ yake na andũnĩ ma mũsyĩ na ala ma nyũmba yake.”
5
Ndaaĩka kyama vau, eka o andũ avũthũ wavoisye kwa kũmailĩĩla moko.
6
Yesũ nĩwaseng'ie mũno nũndũ wa andũ asu kwĩthĩwa mate na mũĩkĩĩo. Nĩvo ĩndĩ Yesũ waendie kũu motũinĩ aimanyĩsya andũ.
7
Nĩwametie ala amanyĩw'a ĩkũmi na elĩ na amatũma elĩ kwa elĩ, na amanenga ũtonyi wa kũlũngya maimũ.
8
Nĩwameaĩie amea atĩĩ, “Mũikakue kĩndũ kyalonĩ ate o ndata. Mũikakue lĩu kana mũvuko, kana mbesa ngusunĩ syenyu.
9
Ĩkĩai iatũ na mũikakue ngũa sya ũkũany'a.”
10
O ĩngĩ nĩwameie atĩĩ, “Ĩkalai mũsyĩ ũla mwathokw'a kũvika yĩla mwĩuma ndũanĩ ĩsu.
11
Vandũ vonthe vala mwĩthi na andũ mailea kũmũthokya kana kũmwĩthukĩĩsya, mwĩuma vo na mũitia mwatuanga kĩtoo kĩla kĩ maũũnĩ menyu; ũu ũkamony'a kana makasilĩlwa.”
12
Kwoou amanyĩw'a nĩmaendie maitavya andũ nĩmelile kwondũ wa naĩ syoo.
13
Nĩmalũngilye maimũ maingĩ na mavaka andũ aingĩ awau mauta na kũmavosya.
14
Mũsumbĩ Elote nĩweewie maũndũ ala Yesũ weekaa, nũndũ nguma yake nĩyanyaĩĩkĩte kĩla vandũ. Andũ amwe maasya atĩĩ, “Nĩ Yoana Mũvatisi ũsyũkĩte kuma kwa akw'ũ, na nĩkyo kĩtumi wĩ na ũtonyi ũũ wa kwĩka syama.”
15
Andũ angĩ namo maasya atĩĩ, “Nĩ Eliya.” O na angĩ mayasya atĩĩ, “Nĩ mwathani ta ala angĩ ma tene.”
16
Yĩla Elote weewie ũndũ andũ mekwasya ĩũlũ wa Yesũ nĩwaisye atĩĩ, “Ũũ no nginya ethĩwe nĩ Yoana! Nĩnaisye atilwe mũtwe ĩndĩ nũsyũkĩte.”
17
Elote nĩwe waĩtye Yoana akwatwe na ayovwa yela. Eekie ũu nũndũ wa Elotiasi ũla waĩ anamũtwaa, o na kau aĩ mũka wa Vilivũ mwana-a-inyia.
18
Yoana nĩwatindĩaa kũkany'a Elote aimwĩa atĩĩ, “Ti waĩlu kwaku kwosa mũka wa mwana-a-mwenyu na kũmũtwaa.”
19
Elotiasi aĩ na ũthũ na Yoana, na kwoou nĩwendaa kũmũaa, ĩndĩ ndaaĩka ũu nũndũ wa Elote.
20
Elote nĩwakĩaa Yoana na nĩwamũsũvĩaa, nĩkwĩthĩwa nĩweesĩ kana aĩ mũndũ mũlũngalu na mũtheu. Nĩwendeeaw'a nĩ kwĩthukĩĩsya Yoana, o na kau maũndũ ala weew'aa kuma vala ũĩ nĩmamũthĩnasya kĩlĩko mũno.
21
Elotiasi nĩwesie kũkwata mwanya mũseo mũthenyanĩ wa kũlilikana ĩsyawa ya Elote. Mũsumbĩ Elote nĩwaseũvisye mboka nene na athokya atongoi ma silikalĩ na anene ma asikalĩ, na andũ angĩ me nguma ma Kalilii.
22
Mwĩĩtu wa Elotiasi nĩwookie na asũnga. Nĩwatanĩthisye mũsumbĩ mũno vamwe na aeni make, na kwoou Mũsumbĩ amwĩa atĩĩ, “Mbĩtye kyonthe kĩla ũkwenda na nĩngũũnenga.”
23
Mũsumbĩ nĩweevĩtie amwĩa, “Nĩngũũnenga kyonthe kĩla ũũmbĩtya, o na ethĩwa nĩ nyusu ya ũsumbĩ wakwa.”
24
Mwĩĩtu ũsu nĩwaumaalile na athi akũlya nyinyia atĩĩ, “Nĩĩtya kyaũ?” Nake inyia wake amũsũngĩa, “Ĩtya mũtwe wa Yoana Mũvatisi.”
25
O mĩtũkĩ mwĩĩtu ũsu nĩwasyokie ekalaatĩte vala ve mũsumbĩ na amwĩa atĩĩ, “Nĩenda ũnenge oyu mũtwe wa Yoana Mũvatisi wĩ ĩsaaninĩ!”
26
Ũndũ ũsu nĩweew'ĩthisye mũsumbĩ woo mũno, ĩndĩ ndaĩ alea kwĩka ũu nũndũ nĩweevĩtĩte e mbee wa aeni make.
27
O vau kwa vau mũsumbĩ nĩwatũmie mũsikalĩ ũmwe na amwĩaĩa athi akaete mũtwe wa Yoana. Mũsikalĩ ũsu nĩwaendie yela na amũtila Yoana mũtwe.
28
Nĩwaũetie wĩ ĩsaaninĩ na anenga ũla mwĩĩtu, nake mwĩĩtu anenga nyinyia.
29
Yĩla amanyĩw'a ma Yoana meewie ũvoo ũsu, nĩmaendie moosa mwĩĩ wake na maũthika.
30
Atũmwa nĩmasyokie vala ve Yesũ na mamũtavya maũndũ onthe ala mekie na ala mamanyĩisye.
31
Andũ aingĩ nĩmatindĩie kũka na kũthi, kũvika weethĩa Yesũ na amanyĩw'a make mayona mwanya o na wa kũya. Kwoou Yesũ nĩweeie amanyĩw'a make atĩĩ, “Tũendei vandũ vaitũ twĩ ithyoka tũkathũmũange.”
32
Nĩmalikile ĩsiwanĩ na mathi vandũ voo me oka.
33
Andũ aingĩ nĩmamonie maikũsya na mamamanya, na kwoou masemba na maũũ maumĩte kĩla ndũanĩ, mavika vandũnĩ vau mbee wa Yesũ na amanyĩw'a make.
34
Yesũ ayuma ĩsiwanĩ nĩwoonie ĩkomano ĩnene ya andũ, na amew'ĩa ĩnee nũndũ mailyĩ ta malondu mate na mũĩthi, na kwoou ambĩĩa kũmamanyĩsya maũndũ maingĩ.
35
Kũkilĩlye kũtuka, amanyĩw'a nĩmaendie vala va Yesũ na mamwĩa atĩĩ, “Ũkw'a vandũ vaa tũĩ vaitwĩe andũ na nĩkwambĩĩa kũtuka;
36
ekana na andũ aa mathi mĩsyĩnĩ na motũinĩ ala me ũkuvĩnĩ makethooee lĩu maye.”
37
Nake Yesũ amea atĩĩ, “Inyw'ĩ ene manengei kĩndũ maye.” Namo mamũsũngĩa, “Ndinalĩ maana elĩ syĩuma va tũthooee andũ aa onthe mĩkate maye?”
38
Yesũ amakũlya atĩĩ, “Mwĩ na mĩkate yĩana ata? Kwa endai mũsisye.” Masisya nĩmamwĩie, “Twĩ na mĩkate o ĩtano na makũyũ elĩ.”
39
Nake Yesũ amea atĩĩ, “Ĩkalyai andũ nthĩ nyekinĩ mũmaanĩtye ikundi kwa ikundi.”
40
Andũ nĩmekalile nthĩ ikundi sya andũ mĩongo ĩtano na ingĩ sya andũ ĩana.
41
Yesũ nĩwoosie mĩkate ĩsu ĩtano na ala makũyũ elĩ na asyaĩtye ĩtunĩ, atũngĩa Ngai mũvea. Nĩwatilangile mĩkate ĩsu na amanenga amanyĩw'a make maaĩe andũ. O ta ũu, nĩwaanisye ala makũyũ elĩ kĩla mũndũ avikĩwa.
42
Andũ onthe nĩmaĩe mavũna ki.
43
Nĩvo ĩndĩ amanyĩw'a moombanisye ilungu ila syatialile sya mĩkate na makũyũ syausũa ikavũ ĩkũmi na ilĩ.
44
Ũtalo wa aũme ala maĩe lĩu ũsu waĩ ngili itano.
45
O mĩtũkĩ Yesũ nĩwathing'ĩĩisye amanyĩw'a make malike ĩsiwanĩ maendae ndũanĩ ya Mbethisaita, ĩla yĩ mũingo ũla ũngĩ wa ĩia, nake ayamba kũtiwa ombũũkye andũ menũke.
46
Amina kũtaanĩsya na andũ, nĩwambatie kĩĩmanĩ akavoye.
47
Kwaĩ kũnatuka na Yesũ aĩ o ũtumonĩ e weka, nayo ĩsiwa saa ũsu yaĩ ĩianĩ katĩ.
48
Nĩvo ĩndĩ Yesũ woonie amanyĩw'a make maithĩnany'a na ĩsiwa, nĩkwĩthĩwa kĩseve nĩkyauutanaa kyumĩte ngalĩko ĩla meelekele. Kũkilĩlye kũkya, kũtanamba kũtheatheana, Yesũ nĩwookie vala ve amanyĩw'a akinyĩlĩte ĩianĩ ĩũlũ na enda kũmavĩta.
49
Ĩndĩ yĩla amanyĩw'a make mamwonie akinyĩlĩte ĩianĩ ĩũlũ, nĩmasũanĩie nĩ ĩimũ na mambĩĩa kũkayany'a,
50
nĩkwĩthĩwa onthe nĩmamwonie na matelema mũno. Ĩndĩ Yesũ nĩwaneenie o kwa mĩtũkĩ amea atĩĩ, “Ĩthĩwai na ũkũmbaũ, ninyie. Ekai kũkĩa!”
51
Nĩvo ĩndĩ walikile ĩsiwanĩ vala maĩ na kĩuutani kyausya. Amanyĩw'a nĩmaseng'ie mũno vyũ,
52
nũndũ mayaĩ manaelewa nĩ kĩla kyama kya kũvũnĩthw'a kwa andũ ngili itano, nĩkwĩthĩwa maĩ na wũmũ wa ngoo.
53
Yesũ na amanyĩw'a make mamina kũinga ĩia nĩmavikie vandũ vetawa Ngenesaleti, na moova ĩsiwa yoo ũtee wa ĩia.
54
Mauma ĩsiwanĩ oou, andũ nĩmamũmanyie Yesũ,
55
na kwoou masemba mathi kũu ndũanĩ kw'onthe, mambĩĩa kũkua andũ ala maĩ awau na itanda na kũmatwaa o vala meew'a Yesũ ũĩ.
56
Vandũ vonthe vala Yesũ waendaa: Motũinĩ, ndũanĩ kana isionĩ ila syĩ ũtee wa ndũa, andũ nĩmamũeteae awau vandũ ũtheinĩ. Nĩvo ĩndĩ andũ mamwĩsũvaa aeke awau asu makwate o na ethĩwa no mũthya wa ngũa yake. Onthe ala mamũkwatie nĩmavoie.
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 7 →
All chapters:
1
2
3
4
5
6
7
8
9
10
11
12
13
14
15
16