Zephaniah 1

Kamba (MBIVILIA ŨVOO MŨSEO)

Jump to: Chapter 2 →

1Ũũ nĩw'o ũtũmani ũla Mwĩai Ngai wanengie Nzevania mwana wa Kusi. Kusi aĩ mwana wa Ngetalia, Ngetalia aĩ mwana wa Amalia ũla waĩ mwana wa Esekia. Nzevania anengiwe ũtũmani ũũ ĩvindanĩ yĩla Yosia mwana wa Amoni waĩ mũsumbĩ wa Yuta.

2Mwĩai Ngai easya atĩĩ, “Nĩngwananga syĩndũ syonthe, ila syĩ ĩũlũ wa nthĩ.

3Nĩngũmina andũ na nyamũ, nĩngũmina nyũnyi na makũyũ ma ũkanganĩ. Ngatuma ala athũku masindwa; ngavetanga andũ kuma ĩũlũ wa nthĩ.” Nĩasya ũu nyie Mwĩai Ngai.

4“Ngakany'a andũ ma Yuta, na kũkany'a andũ onthe ala matwĩe Yelũsalemu. Ngavetanga ũthaithi w'onthe wa Mbaali ũla ũtialĩte kũu, na vai mũndũ ũkalilikana athembi matamwĩsĩ Ngai ala mathaithaa mĩvw'anano.

5Ngamina onthe ala maendaa kũkumana ialanĩ ĩũlũ, mathaithe syũa, mwei na ndata. O ta ũũ ngamina onthe ala manthaithaa nyie Mwĩai Ngai, na kwĩvĩta kana makeethĩawa me aĩkĩĩku kũla nĩĩ, ĩndĩ ngalĩkonĩ ĩla ĩngĩ mayĩvĩta kũthaitha ngai ya Moleki.

6Ngamina ala masyokie na ĩtina, maeka kwĩka kwenda kwakwa nyie Mwĩai Ngai, na o ta ũu maeka kũmantha kana kũmbĩkaĩla nĩmatongoesye.”

7Vindyai mwĩ mbee wa Mwĩai Ngai mũsumbĩ, nĩkwĩthĩwa mũthenya wa Mwĩai Ngai wĩ vakuvĩ; Mwĩai Ngai nĩwĩyũmbanĩtye kũaa andũ make, ũndũ nyamũ syũaawa syĩthĩwe nthembo, na nũthoketye amaitha makue syĩndũ ila syĩ Yuta.

8Mwĩai Ngai easya atĩĩ, “Mũthenyanĩ ũsu nyie Mwĩai Ngai ngathemba nthembo ĩsu, ngakany'a anini ma mũsumbĩ na ana make, na onthe ala mekaa maũndũ ala andũ ma nthĩ ingĩ mekaa.

9Mũthenyanĩ ũsu, ngakany'a onthe ala mathaithaa ta andũ ala matesĩ Ngai, na ala moyaa na kũaa nĩ kana mausũsye mũtavo nyũmbanĩ ya mũnene woo.”

10Mwĩai Ngai easya atĩĩ, “Mũthenyanĩ ũsu mũkeew'a kĩĩo kuma Mũvĩanĩ wa Makũyũ; o ta ũu mũkeew'a andũ makayanĩtye kuma Ngalĩko Nzaũ ya ndũa, wasya mũnene kuma iĩmanĩ.

11Ala mũtũaa ngalĩko ya ĩtheo ya ndũa mũkaĩa; nĩkwĩthĩwa atandĩthya onthe makooawa, na onthe ala mathimaa silĩva makooawa!

12Ĩvindanĩ yĩu ngamantha kĩla vandũ Yelũsalemu na taa, na ngakany'a andũ ala mekalaa mayĩw'a me eanĩe; ala mailyĩ ndivai ĩtialĩtw'e mũtũnginĩ. Andũ asu masũanĩaa makasya, ‘Mwĩai Ngai ndeĩka nesa kana eke naĩ.’

13Ũthwii woo ũkatavwa, na nyũmba syoo iyanangwa. O na maaka nyũmba, maikekala vo, o na mavanda mĩsavivũ, maikanyw'a ndivai kuma nzavivũnĩ syayo.”

14Mũthenya mũnene wa Mwĩai Ngai wĩ vakuvĩ, wĩ vakuvĩ, na wũkĩte na mĩtũkĩ. Mũthenya ũsu kũkeethĩwa thĩna mwingĩ, nĩkwĩthĩwa o na asikalĩ ngũmbaũ makaĩa mate na wĩkwatyo.

15Ũsu nĩ mũthenya wa ũthatu; mũthenya wa thĩna na woo mwingĩ, mũthenya wa wanangĩko na kũminwa, mũthenya wa kĩvindu na kĩmako, mũthenya wa matu na kĩvindu kingĩ.

16Mũthenya ũsu kũkeew'ĩka mawasya ma masoo ma kaũ, na wasya wa asikalĩ maivithũkĩa ndũa mbiĩĩe na myako mĩtũlu.

17Nyie Mwĩai Ngai ngaetee andũ mothũku asu, kwoou makathi ta ilalinda, nũndũ nĩmambĩtĩsye nyie Mwĩai Ngai. Nthakame yoo ĩketwa nthĩ ta kĩw'ũ, mĩĩ yoo ĩketwa nthĩ ta mũyoo.

18Thaavu na silĩva woo ndũkethĩwa ũtonya kũmatangĩĩa, mũthenyanĩ ũsu wa ũthatu wakwa nyie Mwĩai Ngai. Ngaananga nthĩ yonthe na mwaki wa kĩwĩu kya ũthatu wakwa, ngamina kwa mĩtũkĩ onthe ala matũaa ĩũlũ wa nthĩ.

Jump to: Chapter 2 →