Zephaniah 3

Kamba (MBIVILIA ŨVOO MŨSEO)

← Chapter 2 Jump to:

1Kyeva nĩ kwa ndũa ya Yelũsalemu; ndũa yĩ andũ ang'endu na athũku, ndũa yĩ andũ mathĩnasya angĩ!

2Ndũa ĩsu ndĩthukĩĩasya mũndũ o na ũmwe, na ndĩtĩkĩlaa ũkany'o. Ndĩĩkĩĩaa Mwĩai Ngai, na ndĩthengeeaa Ngai wayo.

3Atongoi mayo mailyĩ mĩnyambũ yĩ ĩtomo ĩkũluluma; asili mayo mailyĩ nzũi wĩoo, ila iĩsaa ikalea kũtialya kĩndũ kũivika kwakya.

4Athani mayo nĩ nzeleke na me ngathĩĩo; athembi mayo nĩmavukasya syĩndũ ila ivathĩwe Ngai, na nĩmatũlaa mĩao na ngũlũ.

5Mwĩai Ngai ũla wĩ ndũanĩ ĩsu nĩ mũlũngalu; ndekaa ũndũ mũthũku. Kĩla kĩoko nũetae ũsili wa katĩ; ndaleaa kwĩka ũu kĩla kwakya. Ũu wĩ o vo, ala mate alũngalu maendeeaa kwĩka naĩ mate na nthoni.

6Mwĩai Ngai easya atĩĩ, “Nĩnĩtumĩte andũ onthe ma mbaĩ ingĩ moawa; kũndũ kwoo kũlũmu kwa kwĩvitha nĩkwanange. Nĩnanangĩte nzĩa syoo nene, na vai mũndũ wĩsĩlaa vo. Ndũa syoo nĩ nthei, nĩsyatiiwe na vai mũndũ wĩkalaa vo.

7Nĩnaisye atĩĩ, ‘Kwa w'o andũ ma ndũa ĩno nĩmekwĩthĩwa na kĩkĩo kyakwa; nĩmekwĩtĩkĩla ũkany'o!’ Wĩkalo woo ndũkavetangwa, na maikakwatwa nĩ mokany'o makwa. Ĩndĩ ũu wĩ o vo, nomaendee kwĩka naĩ maũndũnĩ moo onthe.”

8Mwĩai Ngai easya atĩĩ, “Eteelai mũthenya ũla nĩũngama, nĩ kana nĩkũsĩĩe ĩũlũ wa mothũku ala andũ asu mekĩte. Nĩnĩvangĩte kũmbany'a andũ na kũmbany'a mosumbĩ, nĩ kana nĩmakany'e ũthatunĩ wakwa mwai, ĩĩ, ũthatunĩ wakwa mwai. Nthĩ yonthe ĩkavĩvw'a nĩ mwaki wa ũthatu wakwa mwai.

9“Nĩvo ĩndĩ ngathesya ũneeni wa andũ ũtw'ĩke ũneeni mũseo, nĩ kana onthe mekaĩle ĩsyĩtwa yakwa nyie Mwĩai Ngai, na kũnthaitha me na ngoo ĩmwe.

10Athaithi makwa ala manyaĩĩkĩe mũingo wa mbũsĩ sya Ethiovia, makandetee nthembo yakwa.

11Mũthenyanĩ ũsu mũikekĩĩthw'a nthoni, nũndũ wa mavĩtyo onthe ala mũmbĩtĩsye, nĩkwĩthĩwa ngavetanga kuma ndũanĩ ĩno ala matanĩaa ngathĩĩonĩ syoo. Mũikang'endea ĩngĩ mwĩ kĩĩmanĩ kyakwa kĩtheu.

12Ngatialya katĩ wenyu andũ ala auu na menyivĩtye, namo makamantha wĩvitho kwakwa nyie Mwĩai Ngai.

13Ũtialo wa andũ ma Ĩsilaeli ndũkeka mavĩtyo na maikakengana; maikaneena ndeto o na ĩmwe ya ũvũngũ. Makaĩsaa na kũkoma, na vai mũndũ ũkatuma makĩa.”

14Ina na wasya mũnene we Saioni, ũkĩlya wasya mũnene we Ĩsilaeli! Tana na thayũ waku w'onthe we Yelũsalemu!

15Mwĩai Ngai nũkũvetangĩe ũkany'o; nũvetangĩte amaitha maku. Mwĩai Ngai Mũsumbĩ wa Ĩsilaeli e vamwe naku, ndũkakĩa ũndũ mũthũku ĩngĩ.

16Mũthenyanĩ ũsu makeea Yelũsalemu atĩĩ, “Saioni ndũkakĩe; ndũkaeke moko maku methĩwe me monzu.

17Mwĩai Ngai, Ngai waku e vamwe naku, nĩ ngũmbaũ ĩla ĩnenganae ũsindi. Mwĩai Ngai akatana nũndũ waku, na nũndũ wa wendo wake akakũnenga thayũ mweũ. Akaina na wasya mũnene na kũtana nũndũ waku,

18o tondũ andũ matanaa me mbokanĩ.” Mwĩai Ngai easya atĩĩ, “Ngakũvetangĩa mothũku, nĩ kana ndũkaakwatwe nĩ nthoni nũndũ wamo.

19Ĩvindanĩ yĩu ngakany'a ala makũthĩnasya, na ngatangĩĩa andũ onthe ala me na maũũ mathũku; ngoombany'a ala malũngilw'e, na kũtuma nthoni syoo itw'ĩka ũtaĩo na nguma ĩũlũ wa nthĩ yonthe.

20Ĩvindanĩ yĩu ngamũmbany'a; ĩvindanĩ yĩu ngamwĩnũkya. Ngamũnenga ũkumyo na ũtaĩo katĩ wa andũ onthe ĩũlũ wa nthĩ, yĩla nĩtuma mũendeea nesa ĩngĩ mũsyaĩĩsye. Nĩasya ũu nyie Mwĩai Ngai.”

← Chapter 2 Jump to: