2 Corinthians 12

Kabardian 1993 (ХъыбарыфӀыр. ЩӀэдзапӀэр. Уэрэд ЛъапӀэхэр)

← Chapter 11 Jump to: Chapter 13 →

1Сызыщытхъужыным фӀагъ къыхэкӀыркъым. Зиусхьэным сигъэлъэгъуа икӀи къысхуигъэнэхуа Ӏуэху гъэщӀэгъуэныщэхэм сатепсэлъыхьынущ.

2Мэссихь зи псэм щыщ лӀы гуэр соцӀыху. Илъэс пщыкӀуплӀ и пэкӀэ Тхьэм ар ещанэ уафэм нэс дрихьеящ. Пкъым хэлъарэ хэмылъарэ сэ сщӀэркъым, ар Тхьэм ещӀэ.

3Тхьэм а лӀыр уафэм дрихьейуэ, жэнэтым зэрыригъэхьар сощӀэ. Пкъым хэлъарэ хэмылъарэ сэ сщӀэркъым, ар Тхьэм ещӀэ. Абы пхуэмыӀуэтэжын псалъэу цӀыхум къиӀуэтэжыну зыхуимытхэр зэхихащ.

5А лӀым сыщытхъуну сыхуейщ; си щхьэкӀэ лъэкӀыныгъэ сэ зэрызимыӀэм фӀэкӀа, нэгъуэщӀкӀэ сызыщытхъужыну сыхуейкъым.

6Сызыщытхъужыну сыхуеятэми, зэхэщӀкӀ зимыӀэм хуэдэу сыщытынтэкъым, пэжыгъэр жысӀэнути. Ауэ зызошыӀэ, цӀыху гуэрым сэ сщӀэ Ӏуэхухэр щилъагъукӀэ, е сэ къыжысӀэ псалъэхэр щызэхихкӀэ, сызэрыщытым нэхърэ нэгъуэщӀ гуэру сыкъащымыхъун щхьэкӀэ.

7Тхьэм къысхуигъэнэхуа Ӏуэхушхуэхэм папщӀэ зыхэзмыӀэтыкӀыщэн шъхьэкӀэ, уз гуэр, банэм хуэдэу къысхэуэу, си пкъым хэлъ хъуащ. Ар шейтӀаным и ӀуэхутхьэбзащӀэм хуэдэщ. ЗыхэзмыӀэтыкӀыщэн щхьэкӀэ, а банэм къыстохьэлъэ.

8А банэр схихыжыну Зиусхьэным щэнейрэ селъэӀуащ.

9Ауэ Зиусхьэным къызжиӀащ: «Сэ си нэфӀ нызэрыпщыхуэр уэркӀэ ирикъунущ, сыт щхьэкӀэ жыпӀэмэ уэ лъэкӀыныгъэ уимыӀэ щыхъукӀэ, си лъэкӀыныгъэшхуэр нэхъ къолъагъуэ». Мэссихь и лъэкӀыныгъэ схэлъ хъун щхьэкӀэ, лъэкӀыныгъэ зэрызимыӀэмкӀэ нэхъ си гуапэу сызыщытхъужынущ.

10Аращи, Мэссихь сызэрыхуэлажьэм щхьэкӀэ, лъэкӀыныгъэ симыӀэми, къысхущӀэджэми, гугъуехь сшэчми, гугъуехь сагъэшэчми, гукъеуэ сиӀэми, согуфӀэ; сыт щхьэкӀэ жыпӀэмэ лъэкӀыныгъэ симыӀэ щыхъукӀэ, лъэкӀыныгъэ нэхъ согъуэт.

11ЗэхэщӀыкӀ зимыӀэм хуэдэу сывэпсэлъащ, апхуэдэу сыпсэлъэну фэращ сезыхулӀар. Фэрат къысщытхъун хуеяр, сыт щхьэкӀэ жыпӀэмэ сэ пщӀэ симыӀэми, а апостол ину жыхуэфӀэхэм нэхърэ зыкӀи сынэхъ цӀыкӀукъым.

12Апостолу сызэрыщытыр къэзыгъэпэж Ӏуэхуу нэщэнэ гъэщӀэгъуэныщэхэри, Ӏуэху телъыджэхэри, лъэкӀыныгъэ зыхэлъ Ӏуэхушхуэхэри фи деж шыӀэныгъэшхуэкӀэ сэ щызлэжьащ.

13Сэ хьэлъэ сызэрыфтемыхъуам нэмыщӀу, адрей члисэ зэхуэсхэм сазэрыдэгъуэгурыкӀуам нэхърэ нэхъ Ӏейуэ сывдэгъуэгурыкӀуа? Хьэлъэ сызэрыфтемыхъуар къысхуэвгъэгъу.

14Иджы фи деж ещанэу сынэкӀуэну сыхьэзырщ, ауэ хьэлъэ сыфтехъуэнукъым, сыт щхьэкӀэ жыпӀэмэ сызыхуейр фи мылъкуракъым, фэращ. Бынхэм я адэ-анэхэм папщӀэ мылъку зэхуахьэсыну я пщэм дэлъкъым, адэ-анэхэращ я бынхэм папщӀэ мылъку зэхуэзыхьэсын хуейр.

15Фэ фӀы дыдэу фыслъагъуу, фэ нэхъ мащӀэу фӀыуэ сыкъэфлъагъужу щыт пэтми, фи псэхэм щхьэкӀэ сиӀэу хъуар згъэкӀуэдыну икӀи си щхьэкӀэ зызгъэкӀуэдыжыну си гуапэщ.

16Апхуэдэу ирехъу, хьэлъэ сыфтехъуакъым. ИтӀани хьилагъэ хэлъу сывдэгъуэгурыкӀуэу, фызыӀэщӀэзубыдауэ жывоӀэ.

17Фи деж нэзгъэкӀуа лӀыхэм ящыщ гуэркӀэ сэ фи фӀагъ зэзгъэкӀа?

18Тит фи деж нэкӀуэну селъэӀуащ, къуэшхэм ящыщуи зы гъусэ хуэсщӀащ. Тити фи фӀагъ зригъэкӀакъым, аракъэ? Дызэнэзэпсэу а зы гъуэгум дытетакъэ?

19Мыпхуэдизу мыбы дыщӀыхэтыр фи пащхьэм зыщыдгъэхеиныр арауэ фи гугъэрэ? Ауэ Мэссихь ди псэм щыщу Тхьэм и пащхьэм дыщыпсэлъащ, икӀи, фӀыуэ слъагъухэ, мы Ӏуэху псори щӀэтщӀэр гурэ псэкӀэ нэхъ лъэкӀыныгъэ фэдгъэгъуэтын щхьэкӀэщ.

20Сыт щхьэкӀэ жыпӀэмэ фи деж сыныщыкӀуэкӀэ, сызэрыхуейуэ фэ фыщымыту фыкъэзгъуэту, фэри фызэрыхуейуэ сэ сыщымыту сыкъэвгъуэтынкӀэ сошынэ. Зэщыхьэныр, фыгъуэныр, губжьыныр, зэгурымыӀуэныр, нэгъуэщӀ цӀыхухэм ӀейкӀэ ятепсэлъыхьыныр, бзэгу зехьэныр, зыкъыфӀэщӀыжыныр къыфхэхъыжьэу, Ӏуэхухэр зэхэвынэ хъункӀэ сошынэ.

21Фи деж сыныщыкӀуэкӀэ, фи пащхьэм Тхьэм сыщигъэлъэхъшэну икӀи нэхъапэм гуэныхь зыщӀа цӀыху куэду зигу фӀеягъэм, зинэ щӀэным, мыхъумыщӀэ псэукӀэу зыхэтхэм хущӀемыгъуэжахэм си гур хагъэщӀынкӀэ сошынэ.

← Chapter 11 Jump to: Chapter 13 →