1 Peter 1

kumaoni

Jump to: Chapter 2 →

1मैं, पतरस, जो यीशु मसीह को प्रेरित छूँ। मैं यो चिठ्ठी परमेश्वरा का चुनिना का उन लोगून खिन लिखून मरयू जो कि पुन्तुस, गलातिया, कप्पदूकिया, आसिया और बितूनिया प्रदेशून का अलग-अलग शैहरून में परदेशीन की नियाती रूनान।

2पिता परमेश्वरेले भौत पैलि तुमून अपून लोग हुन खिन और पवित्र आत्मा का द्वारा तुमून पवित्र करून खिन चुन लीछ। उले इसो येक कारण करछ्य ताकि तुम यीशु मसीह का हुकुमून माना और उक खून का द्वारा शुद्ध हो। मैं प्रार्थना करछूँ कि परमेश्वर तुमून अनुग्रह और शान्ति दीनै रौ।

3हम परमेश्वरो को धन्यावाद करनू, जो हमार प्रभु यीशु को पिता छै, जैले अपूनी बड़ी दया ले हमून एक नय्या जीवन दीछ। किलैकी परमेश्वरेले यीशु मसीह स मरिनान में भटे ज्यून करछ्य, उले हमून निडर होभेरन जीना का काबिल बनाछ; यो कि उन चीजून पाना की पुरी उम्मीद कर सकनू जो उले हमून दीना को वादा करिना को छै।

4हम उन निकी चीजून पाना को इन्तजार करनू जो परमेश्वरेले हमून खिन बनाईना का छन। कोई ले कभै उन चीजून को नाश नै कर सकनो। थ्वाड़ा ले उनून खराब नै कर सकनो। उ कभै ले पुरानी या उकी खुबशुरती में कमि नी होलि। परमेश्वरेले उन चीजून स्वर्ग में तुमून खिन राखिना को छै।

5परमेश्वरै अपूनी सामर्थ का द्वारा तुमून सुरक्षित राखून मर्योछ किलैकी तुम यीशु में विश्वास करछा। उ आखरी दिन जब मसीह वापस आलो, तुमून हर दिन सुरक्षित राखोलो। तब तुम जाण जाला कि परमेश्वरेले तुमून पाप और मौत भटे पुरी तरीका ले बचाछ।

6तुमून इन सब चीजून का बारिमें खुश हुन चैछो, बेशक तुम एल थ्वाड़ा बखत खिन अलग-अलग प्रकार की परेशानीन का कारण तुम दुखी छा।

7इन परेशानीन को मक्शद यो दिखूनो छै कि क्या तुम सच्ची में परमेश्वर में भरोसा करछा। यीशु मसीह में तुमोरो विश्वास सुनो है ज्यादा कीमती छै। जसीकैं नाश हुन वाला सुना स आग में परखी जाछो और शुद्ध करि जाछो, उसिकैं अगर तुमोरो विश्वास परीक्षान का द्वारा परखी जाना का बाद ले मजबूत रूछो, त यो उ दिन तुमून भौत बड़ाई और महिमा और सम्मान दिलालो जब यीशु मसीह फिर वापस आलो।

8तुमूनले यीशु स कभै नै देखीना को छै, लेकिन फिरले तुम ऊस प्रेम करछा। तुम ऊस एल नै देखना, लेकिन तुम उमें विश्वास करछा। येक कारण, तुम आनन्द और महिमा ले भौत खुश छा जैस शब्दून में नै बताई जा सकूनो।

9तुम खुश छा। किलैकी परमेश्वर तुमून पाप की सजा है बचुन मर्योछ। यो यीशु मसीह में तुमोरो विश्वास को प्रतिफल छै।

10यो उद्धार कुछ इसो छ्यो जैका बारिमें परमेश्वरो को संदेश दिनवाला लोग और ले ज्यादा जाणून चाँछ्या। उनूनले बताछ कि कसीकैं परमेश्वर तुमून बचुन खिन तुमार प्रति दयालु तरीका ले काम करोलो जैखिन तुम योग्य नाहातिन। उनूनले जबाब खोजून खिन भौत सावधानी ले जाँच करछ्य।

11मसीह को आत्मा उनूनमें छ्यो और उनून बतून मरैछ्यो कि मसीह कसीकैं दुख उठालो और फिर ऊस भौत ठूलो सम्मान दीई जालो। येक कारण उनूनले यो पतो लगूना की कोशिश करछ्य कि मसीह को होलो और यो सब कब होलो।

12लेकिन परमेश्वरेले इन संदेश दीन वाला लोगून बताछ कि उनार संदेश खुद अपून खिन नै बल्कि तुमून खिन छ्या। उ संदेश यीशु मसीह का बारिमें सुसमाचार छै जो तुमूनले अब सुणछ्य। परमेश्वरेले स्वर्ग भटे अपूनो पवित्र आत्मा भेजछ्य कि तुमून सुसमाचार प्रचार करून में लोगून की मद्दत करौ। यो सब इतुक अद्धभुत छै कि याँ तक कि स्वर्गदूत ले उत्सुकता ले इन बातुन हुन देखून मर्यान।

13येक कारण, अपून मनून तैयार करा जसीकैं लोग काम करून खिन तैयार हुन खिन अपूनी कमर कसनान। मतलब यो कि, जो कुछ तुम सोचछा उमें तुमून काबू राखून चैछो, और इसो करभेरन अपून जीवन को संचालन पुरी तरीका ले और आत्मविश्वास का दगाड़ करा, उ उद्धार स पाना की आश राखभेरन जो परमेश्वर अनुग्रह ले तुमून देलो जब यीशु मसीह स्वर्ग भटे वापस आलो।

14परमेश्वरा का हुकुमून को पालन करा जसीकैं निका नान्तिना अपून बबा का हुकुमून माननान। उन बुरा कामून जन करा जिनून तुम तब करना की इच्छा राखछ्या, जब तुम परमेश्वरा का सत्य स नी जाण छ्या।

15लेकिन अब तुमून हर काम में जो तुम करछा पवित्र हुन चछो, जसीकैं कि परमेश्वर पवित्र छै जैले तुमून अपून बच्चा हुन खिन चुन लीछ।

16किलैकी पवित्रशास्त्र में परमेश्वरेले कईना को छै, कि “तुमून पवित्र हुन चैछो किलैकी मैं पवित्र छूँ।”

17परमेश्वर जाणछो कि हरेक आदिमी ले कि-कि करिना को छै, और उ हरेको को न्याय बिना कोई पक्षपात को करछो। जब तुम परमेश्वर थैं प्रार्थना करछा त उथैं पिता कुँछा। त येक कारण, जब की तुम धरती में परदेशी होभेरन रूछा त उको हमेशा आदर करा।

18तुम जाणछा कि परमेश्वरेले तुमून तुमार बेकार का ब्यवहार भटे छुड़ून खिन को चीज को प्रयोग करछ्य, जो तुमूले अपून पूर्वजून भटे सिखीना का छ्या। उले तुमून छुड़ून खिन इसो धन को प्रयोग नै कर्यो जैस सुनो या चाँदी की नियाती नाश करि जा सकछो। लेकिन परमेश्वरेले मसीह का कीमती खून का द्वारा तुमून बचाछ, जो एक शुद्ध और सिद्ध मेम्ना की नियाती छ्यो।

20यो संसारे स बनून है पैलि, परमेश्वरेले पैलि है यो तय करिनाको छ्यो कि यीशु मसीह यो संसारो को मुक्तिदाता होलो। लेकिन उ तुमेरि मद्दत करून खिन इन अंतिम दिनून में यो संसार में आछ।

21जो केले मसीह ले करिना को छै उक कारण तुम अब परमेश्वर में विश्वास करछा। और तुमूले अपूनो विश्वास और आश परमेश्वर में राखिना की छै किलैकी उले मसीह स मरिनान में भटे ज्यूनो कर दीछ और ऊस महिमा दीछ।

22किलैकी सच्चाई स मानना का द्वारा तुम शुद्ध करि गैछा अब तुमून अपून दगड़िया विश्वासी भाईन का दगाड़ प्रेम करूनो चैछो। येक कारण एक-दूसार स पुर मन ले प्रेम करून जारी राखा।

23तुमून एक-दुसरा स प्रेम करूनो चैछो किलैकी तुमून परमेश्वरा का तरफ भटे एक नय्या जीवन मिलीना को छै। तुमून यो जीवन कोई इसा चीज का द्वारा नै मिल र्यो, जो नाश हो जालो लेकिन उ चीज का द्वारा जो हमेशा बनिना की रौली। मतलब, हमून यो नय्या जीवन परमेश्वरा का जीवित और अनन्त वचन ले मिलीना को छै।

24पवित्रशास्त्र यो कुंछो, “सब लोग घास का नियाती छन और उनेरि सब खुबशुरती जंगली फुलून की नियाती छन। घास सुख जालो और फूल भिमें झड़ जाला।

25लेकिन परमेश्वरो को बचन हमेशा बनिना को रोलो।” यो बचन मसीह का बारिमें सुसमाचार छै जो तुमार बीच में प्रचार करि ग्छ्यो।

Jump to: Chapter 2 →

Recommended Reading

Commentary 1 Peter Commentaries → Devotional 1 Peter Devotional Guide → Get This Bible kumaoni Study Bible →