1 Peter 2

kumaoni

← Chapter 1 Jump to: Chapter 3 →

1येक कारण, हर प्रकारा का बुरा ब्यवहार भटे छुटकारा पा। दुसरान ध्वाका जन दी, कपटी जन बना। दुसरान है जलन जन राखा। दुसरा लोगून का खिलाफ बुरी बात जन करा।

2जसकैं एक नान-नन्तिनो अपूनो ईजा को शुद्ध दूध की इच्छा करछो, उसीकैं तुमून परमेश्वरा का बचन स सीखना की इच्छा राखून चैछो ताकि तुम आत्मिक रूप ले मजबूत बन सका। तब परमेश्वर तुमून यो संसारै की बुरी चीजून है पुरी तरीका ले बचालो।

3किलैकी जसो कि पवित्रशास्त्र कुंछो, “तुमूले यो महसूस करिना को छै कि प्रभु भलो छै।”

4तुम प्रभु यीशु का पास आईना का छा। उ एक घरा का नींव में राखिना को एक खास ढूंगा की नियाती छै, लेकिन उ ज्यूनो ढूंगो छै। ऊस कई लोगून ले स्वीकार नै कर्यो, लेकिन परमेश्वरेले ऊस चुनछ्य और ऊस भौत कीमती मानछ्य। और जसीकैं लोग ढूंगान ले घर बनुनान, उसीकैं परमेश्वर तुमून एक समूह में जोड़ून मर्योछ जैमें परमेश्वरो को आत्मा रूछो, ताकि यीशु मसीह ले जो हमून खिन करिना को छै, उक वजह ले तुम उन याजकून का नियाती जो बलिदान चढ़ूनान, तुम इसा काम करा जो परमेश्वरेस खुश करनान।

6यो ऊसोई छै जसो परमेश्वरेले पवित्रशास्त्र में कईना को छै, “देखा! मैंले एक कीमती ढूंगास चुन हैछ, जो यरूशलम शैहर में घर स मजबूत बनून खिन इस्तमाल करि जाछो। और जो कोई ले उमें भरोस करछो, उ लज्जित नी होलो।”

7यो ढूंगो तुमून खिन भौत कीमती छै जो यीशु मसीह में विश्वास करनान। लेकिन जो लोग उमें विश्वास नै करना उनार बारिमें पवित्रशास्त्र कुंछो कि, “राजमिस्त्रिन ले जै ढूंगास बेकार समझभेरन निकालीना को छ्यो, उ घरो को नींव को खास ढूंगो बन ग्योछ।”

8और फिर पवित्रशास्त्र यो ले कुंछो: “यो ढूंगो लोगून को ठोकर खाना को कारण होलो। यो एक चट्टान छै जो उनार खीतिना को कारण होलो। उन इसीकैं खितीला किलैकी उन परमेश्वरा का संदेश स मानून है इन्कार करनान। किलैकी परमेश्वरेले उनार दगाड़ इसोई हुना की योजना बनाईना की छै।”

9लेकिन तुम इसा नाहातिन किलैकी तुम परमेश्वरा का चुनिना का लोग छा तुम परमेश्वरा का याजक छा, जो राजा छै, तुम परमेश्वर की सेवा करून खिन समर्पित छा और तुम परमेश्वरा का खास लोग छा। किलैकी उले तुमून अन्यार में भटे भ्यार अपून अद्धभुत उज्याल में बुलाईना का छा, ताकि तुम परमेश्वरा का अद्धभुत कामून का बारिमें बता सका।

10(परमेश्वरा का संदेश दिनवाला होशे ले जो लिखीना को छै तुमारा बारिमें सच्ची छै) “पैलि तुम परमेश्वरा का लोग नी छ्या, लेकिन अब तुम परमेश्वरा का लोग छा। पैलि तुम परमेश्वरै की दया स नी जाण छ्या, लेकिन अब तुम उ जाणछा किलैकी उले अपूनी दया पैलि भटे तुमून में दिखाईना की छै।”

11हे म्यारा विश्वासी भाईयो, तुम यो संसार में परदेशीन और मुसाफिरून की नियाती छा। मैं तुमूनथैं बिनती करछूँ कि उन सबै संसारै की बुरी इच्छान भटे बचा, किलैकी उ खुद तुमार बिरोध में हमेशा लड़नै रूछी।

12कई बार इसा लोग हुनान जो प्रभु स नै जाणना और उन तुमून में यो कैभेरन गलत आरोप लगा सकनान कि तुमार काम बुरा छन। येक कारण तुमून अपून ब्यवहारा का बारिमें सतर्क रून चैछो, ताकि उन तुमार निका ब्यवहार देख सकून। आखरी में उन मानाला कि तुमोरो ब्यवहार निको छै और जै दिना परमेश्वर संसारो को न्याय करून खिन आलो, उ दिना उन परमेश्वरे की महिमा कराला।

13प्रभु यीशु को आदर करून खिन तुमून उन सबून को हुकुम मानून चैछो जो यो संसार में अधिकारी छन: मतलब राजा, जो कि सबून है ठूलो अधिकारी छै।

14और राज्यपालून को, जिनून राजा का द्वारा नियुक्त करि जाछो। उनून उन लोगून दण्ड दीन खिन भेजिनान जो गलत करनान और उन लोगून की तारीफ करून खिन जो सही करनान।

15किलैकी परमेश्वरै की यो इच्छा छै, कि हमार निका ब्यवहार क द्वारा, जो लोग परमेश्वरेस नै जाणना, उन अब हमून में गलत तरीका ले आरोप लगूना की हिम्मत नी कराला, किलैकी यो बात साफ छै कि उनार झूठ्ठा आरोप सही नाहातिन।

16तुमून खिन कोई ले इसो आदिमी नाहातिन जो तुमून उ करून है रोक सकछो जो तुम करून चाँछा। किलैकी तुम पैलि भटे हमारा प्रभु यीशु मसीह का द्वारा आजाद करि जा चुक गैछा। लेकिन येस बुरा काम करना को बहाना जन बना। बल्कि तुमून अपून कामून का द्वारा दिखूनो चैछो कि तुम सच्ची में परमेश्वरा का सेवक छा।

17सबून को आदर करा, अपून सबै विश्वासी भाईन थैं प्रेम राखा, परमेश्वर भटे डरा, और ठूला अधिकारीन को आदर करा।

18हे सेवकों, तुम जो घरून में काम करछा और विश्वासी छा, तुमून अपून मालिक को हुकुम मानून चैछो और हमेशा उनोरो आदर करूनो चैछो। इसो हर तरीका का मलिका का दगाड़ करा, चाहे उ दयालु और सही हो या बेरहम हो।

19किलैकी अगर हम दुख सहनू चाहे हमरि कोई गलती नै हो, लेकिन हम सिर्फ येक कारण सहन करनू किलैकी हम जाणनू कि परमेश्वर सब कुछ जाणछो, त परमेश्वर हमून है खुश हुछो।

20अगर तुमून गलत करून खिन पीटी जाछो, तो दण्ड मिलून में धैर्य राखून में तुमेरि प्रशंसा करना की कोई कारण नाहातिन। लेकिन अगर भलाई करना का कारण तुम दुख सहछा और धैर्य राखछा, तो परमेश्वर खुश हुछो।

21परमेश्वरा का द्वारा तुमून चुनी जाना को यो कारण छै कि उखिन भल काम करभेरन दुखून सहन करा। किलैकी मसीह ले तुमून खिन दुख सहन करिना का छन, उ तुमून खिन एक उदारण छै। येक कारण तुमले ऊसोई काम करा जसो मसीह ले कर्यान।

22पवित्रशास्त्र कुंछो, “उले कभै पाप नै कर्यो। उले कभै कोई झूठ नै बोल्यो।”

23जब लोगून ले यीशु को अपमान करछ्य, त उले उनोरो अपमान नै कर्यो। जब लोगून ले ऊस दुख दीछ, त उले कभै ले उले बदला लीना की कोशिश नै करि। बल्कि, उले अपूनी मद्दत खिन परमेश्वर में भरोस करछ्य। उ जाणछ्यो कि परमेश्वर हमेशा लोगून को धार्मिकता ले न्याय करछो।

24जब मसीह मरछ्य, त उले हमार पापून अपून मलिमें लीभेरन अपूनास सूली में बलिदान कर दीछ। उले इसो येक कारण करछ्य ताकि हम पाप करून छोड़ द्या और सही तरीका ले जीवन जीनो शुरू करा, और उन घौन का कारण जो उले सहन कर्यान, हम चंगा हो ग्या।

25यैहै पैलि, तुम उन भेड़ून की नियाती छ्या जो गलत बाटा में जान मरैछ्या। लेकिन अब तुम मसीह का पास वापस आ गैछा जो तुमेरि देख-भाल करछो और तुमून में नजर राखछो।

← Chapter 1 Jump to: Chapter 3 →