2 Corinthians 12

kumaoni

← Chapter 11 Jump to: Chapter 13 →

1जब कि घमण्ड करना ले कोई फैदा नाहातिन, फिरले मैंस इसो करूनो पड़ र्योछ। येक कारण मैं प्रभु का द्वारा दीईना का दर्शनून और प्रकाशनून की चर्चा करून मरयूँ।

2मैं मसीह में चौदा साल पैलि तीसारा स्वर्ग तक उठाई ली गयूँ। मैं अपून शरीर का दगाड़ छ्यू या आत्मा में छयू, मैंस मालूम नाहातिन, यो सिर्फ परमेश्वरै जाणछो।

3होई सिर्फ परमेश्वरै जाणछो, कि मैं अपून शरीर का दगाड़ या बिना शरीरा का छ्यू, लेकिन मैं जाणछूँ,

4कि मैं स्वर्गलोक में उठा ली ग्योछ, और इसी बातुन सुणछ्य जो कुंना की नाहातिन; जैका बारिमें बतूनो कोई ले आदिमी खिन मुशकील छै।

5इसा आदिमी में त मैं घमण्ड करूँलो, लेकिन अपूनी कमजोरीन छोड़, अपून बारिमें घमण्ड नी करूँलो।

6किलैकी अगर मैं घमण्ड करून चाछूँ ले त मूर्ख नी हूँलो, किलैकी सच्ची बोलूलो। लेकिन मैं अपूनास घमण्ड करना ले रोकछूँ, लोग जसो म्येरो जीवन में देखछा, मैंथैं सुसमाचार सुणछा, उहै बढ़भेरन मैंस केले जन समझा।

7लेकिन मैंस उन अद्धभुत चीजून में गर्व नै करून चैनो जो परमेश्वरेले मैंस दिखाछ। येहै निपटून खिन एक भौतै कठिन समष्या मैंस दी गैछ, जो म्यारा शरीर में एक काँणा का नियाती छै। शैतान का एक दूत ले मैंस मारना को इरादा करछ्य, ताकि मैं घमंडी नै हो ज्यू।

8येक बारिमें मैंले प्रभु थैं तीन बार बिनती करछ्य, कि मैंहै यो दूर होज्यौ।

9और उले मैंथैं क्योछ, “म्योरो अनुग्रह तैखिन भौत छै; किलैकी मेरि सामर्थ कमजोरी में सिद्ध हुछी।” येक कारण मैं भौत खुशी ले अपूनी कमजोरीन में घमण्ड करूँलो, कि मसीह की सामर्थ मैंमें छाया करछी।

10यो कारण मैं मसीह खिन कमजोरीन में, और निन्दान में, और दरिद्रता में, और सताव में, और संकटून में खुश छूँ; किलैकी जब मैं कमजोर हुछूँ, तभै मैं मसीह की सामर्थ में मजबूत छूँ।

11मैं मूर्ख त बन्यू, लेकिन तुम लोगून ले मैंस ऊस तरीका ले मजबूर करछ्य, तुमून त मेरि तारीफ करूनी चैछी, जब कि मैं तुच्छ छूँ फिरले मैं उन ठूला-ठूला प्रेरितून कोई बात में कम नाहातिनू।

12जब मैं तुमार दगाड़ छयूँ, त यो साबित करछय, कि मैं एक सच्चा प्रेरित छूँ, और मैं धीरज धरभेरन तुमार बीच भौत सारा चमत्काराक काम, और सामर्थ का काम करभेरन दिखाया।

13दुसारा विश्वासीन की मण्डली का मुकाबला में तुम लोगून में कि बात की कमी रै गै? हाँ, मैं कभै ले तुमून खिन बोझ नै बन्यू, माफ कर दी, मैंहै भूल हो गै।

14अब, मैं तीसारा बार तुमार पास ऊँन खिन तैयार छूँ, और मैं तुमूनमें कोई बोझ नी बनूँलो। किलैकी मैं तुम लोगून चाछूँ, लेकिन तुमेरि सम्‍पत्ति स नै। बच्‍चान अपून ईजा-बबान खिन धन जामा नै करूनो चैनो, बल्‍कि ईजा-बबान अपून बच्‍चान खिन जामा करून चैछो।

15मैं तुम लोगून का खुशी खिन सब कुछ खर्च कर द्यूलो, और अपूनास ले दी द्यूलो। मैं तुमून भौत प्रेम करछूँ, लेकिन इसो लागछो कि तुम मैंस थ्वाड़ा प्रेम करछा।

16केले हो, मैं तुमूनमें बोझ नै बन्यू, फिरले कोई नै कोई मैंमें यो दोष जरूर लगा सकछो, “उ भौत धूर्त छै और उले तुमून छल-कपट में फसा हैछ।”

17तुमी बता, जिन लोगून मैंले तुमार पास भेजछ्य, क्‍या मैंले उनूनमें भटे केका द्वारा तुमूनथैं गलत फैदा उठाछी?

18तीतुस स तुमार पास भेजना की बिनती मैंले करछ्य, उक दगाड़ अपून यो विश्वासी भाईस ले मैंले भेजिना को छ्यो, क्या तीतुस ले तुमोरो गलत फैदा उठाछी? क्या हम एक्कै मक्शद ले काम नै करनाई और एकसोई ब्यवहार नै करना?

19तुम लोग यो समझना होला कि अब तक हम तुमार सामुनि अपूनी सफाई दीन मर्या। बात इसी छै कि हम यो सब परमेश्वरेस सामुनि समझभेरन मसीह में कुंनू। हे म्यारा विश्वासी भाईयो, यो सब बात तुमून विश्वास में मजबूत करून खिन करूनमर्यान।

20किलैकी मैंस डर छै, काँई इसो नै हो, कि मैं आभेरन जसो चाछूँ, ऊसो तुमून नै पा; और मैंस ले जसो तुम नै चाना ऊसोई ही पा। काँई इसो नै हो कि मैं तुमार या झगड़ा, डाह, क्रोध, स्वार्थ, नफरत, चुगली, घमण्ड, और बखेड़ा हुन।

21काँई इसो नै कि जब मैं वापस ऊँलो, त म्येरो परमेश्वर मैंस अपमानित करो और मैंस भौत खिन फिर शोक करून पड़ो, जिनूनले पैलि पाप करिना को छ्यो, और उ गंदा काम, और व्यभिचार, और लुचपन ले, जो उनूनले कर्यान, उनून है पश्चाताप नै कर्यो।

← Chapter 11 Jump to: Chapter 13 →