2 Corinthians 6

kumaoni

← Chapter 5 Jump to: Chapter 7 →

1परमेश्वरा का सहकर्मी हुना का नाता हम तुम लोगून थैं यो बिनती करनू कि परमेश्वरो को जो अनुग्रह तुमूनमें होईना को छै, ऊस बेकार नै हुन दी;

2किलैकी पवित्रशास्त्र में परमेश्वरेले क्योछ, “ठीक बखत में मैंले तेरि प्रार्थना सुणलीछ, और उद्धार का दिन मैंले तेरि मद्दत करछ्य।” सुणा; ऐल योई उ ठीक बखत छै। देखा, ऐल उद्धार को दिन छै।

3परमेश्वरा सहकर्मी हुना का नाता हम कैसे ले के बात में ठोकर खाना को कोई ले मौका नै दीनो, ताकि हमरि सेवा में कोई ले दोष नै अ।

4लेकिन हर बात में हम यो साबित करनू कि हम परमेश्वरा का सच्चा सेवक छा। हम अपून निका गुणून दिखाभेरन, दुखून, क्लेशून, गरीबी और संकटून बड़ी हिम्मत का दगाड़ सहन करनू।

5हमून कोड़ा ले मारी ग्योछ, जेल में डाली ग्योछ, हम में भीड़ ले उपद्रव करछ्य। हमूले भौत मेहनत करछ्य, हम रात-रात भर जाग और भुखा रया।

6हमूनले अपून निर्दोष स्वभाव ले, ज्ञान ले, शहनशीलता ले, दयालु हो भेरन, पवित्र आत्मा का हुकुम मानना का द्वारा,

7सच्चा प्रेम ले, सच्चाई का बचन ले, परमेश्वरै की सामर्थ ले; हम दैना हात में धार्मिकता का हथियार स हमला खिन और बौं हात में रक्षा खिन इस्तमाल करनू।

8जब लोग हमून तुच्छ जाणनान, और दुसरान बतुनान कि हम बुरा लोग छा या निका लोग छा या हम कपटी समझी ग्या, लेकिन हम सच्ची बोलनू।

9कुछ लोग हमून प्रसिद्ध समझनान, लेकिन कुछ लोग हमून अनजान और मरिनाका नियाती समझनान और फिरले देखा, हम ज्यूना छा; हमून दण्ड त दीई जाछो लेकिन हमून जानै ले नै मार सकना।

10हमार पास दुख को बखत छ्यो, लेकिन हमेशा खुश रूनू, हम खुद त कंगाल छा, लेकिन भौत लोगून आत्मिक रूप ले धनवान बना दीनू। हम इसा छा जसीकैं हमार पास के नाहातिन, फिरले हमार पास सब कुछ छै।

11हे कुरिन्थियूस का विश्वासीयो, हमूले खुलभेरन तुमूनथैं बात करिना की छै, हम तुमून अपून पुर दिल ले प्रेम करनू।

12तुमून खिन हमोरो प्रेम कभै कम नै भ्यो, लेकिन तुमोरो प्रेम हमून खिन कम हो ग्योछ।

13लेकिन मैं अपून बच्चा समझभेरन तुमूनथैं कुछूँ, कि तुम ले उक बदला में तुम ले हमूनथैं अपून पुर दिल ले प्रेम करनै रौ।

14तुम अविश्वासी लोगून का दगाड़ संगति जन राखा। किलैकी धार्मिकता और अधर्म को की मेल जोल? या उज्याला और अन्यारो को की दगोड़ो?

15और मसीह को दुष्ट शैताना का दगाड़ की लगाव? या विश्वासी का दगाड़ अविश्वासी को की नाता?

16परमेश्वरा का मन्दिर में मूर्तिन की कोई जाग नाहातिन। किलैकी हम त जिन्दा परमेश्वरा का मन्दिर छा; जसो परमेश्वरेले पवित्रशास्त्र में कईना को छै, “मैं इन लोगून का दगाड़ रूलो और उनूनमें हिटूलो फिरूलो; और मैं उनोरो परमेश्वर हूँलो, और उन म्यारा लोग होलो।”

17येक कारण प्रभु हमूनथैं पवित्रशास्त्र का द्वारा कुंछो, “उन लोगून भटे अलग हो जा जो परमेश्वरा पछिल नै हिटना। और अपवित्र चीजून है दूर रौ, त मैं तुमून अपनूलो;

18और मैं तुमोरो पिता हूँलो, और तुम म्यारा च्याला और चेलि होला; यो सर्वशक्तिमान प्रभु परमेश्वरो को बचन छै।”

← Chapter 5 Jump to: Chapter 7 →