2 Timothy 1

kumaoni

Jump to: Chapter 2 →

1यो चिठ्ठी पौलुसाक तरफ भटे छै, परमेश्वर ले मैंस येक कारण चुन रैछ कि मैं यीशु मसीह यीशु में प्रेरित बनू ताकि मैं यो संदेश को प्रचार कर सकूँ, कि परमेश्वर ले अनन्त जीवन दीना को वादा करिना को छै जो यीशु मसीह में विश्वास करना ले मिलछो।

2मैं यो चिठ्ठी तीमुथियुस स लिखूनमरयूँ, तैं म्यारा च्याला नियाती छै। मैं प्रार्थना करछूँ कि पिता परमेश्वर और हमोरो प्रभु यीशु मसीह तैंस अनुग्रह और दया, और शान्ति दीनै रून।

3जब ले मैं परमेश्वर थैं प्रार्थना करछूँ, मैं हमेशा तेरो नाम याद करछूँ और परमेश्वरो को धन्यवाद करछूँ। जैकी मैं और म्यारा पूर्वज ले साफ मन ले सेवा करछ्य।

4मैंस याद छै कि तैं कतुक रोछ्य जब हम अलग भ्या, त्यारा दगाड़ मिलना की इच्छा हुछी कि मेरि खुशी पुरी होज्यौ।

5मैं तेरि नानी लोईसा को उ सच्चा विश्वास याद करछूँ, और तेरि ईजा यूनीके को ले ऊसोई विश्वास छ्यो। मैं यो बात में विश्वास करछूँ कि ऊसोई विश्वास तैमें ले छै।

6येक कारण में तैंस याद दिलु छूँ कि उन वरदानून फिर इस्तमाल कर, जो परमेश्वरा का द्वारा तब मिल्यान जब मैंले त्यारा ख्वारा में हात राखछै।

7क्याखिनकि परमेश्वर ले हमून डरफोक नै बनायो। बल्कि उको आत्मा हमार दिलून मजबूत बनूछो, और हमून एक दुसरा स प्रेम करून में, और हर हालात में अपून में काबू राखून में मद्दत करछो।

8येक कारण तैं हमार प्रभु यीशु मसीह का बारिमें बतून में शर्मिन्दा जन हो, और नै तैंस यो बात में शर्म उनी चैछी मैं उकी सेवा करून में कैद में छूँ, बल्कि तैंस उ सामर्थ को इस्तमाल करून चैछो, जो परमेश्वर तैंस दीछो, और तैंस म्यारा दगाड़ उन दुखून में शामिल ले हुन चैछो, जो मैं सुसमाचार कारण सहन करून मरयू।

9परमेश्वरे ले हमोरो उद्धार करछ्य, और हमून पवित्र जीवन जीन खिन बुलाछ। उले हमून येक कारण नै चुनियो की हमूले भल काम कर्यान, लेकिन अपून मक्शद और उ अनुग्रह का कारण बुलाछ, जैकी योजना परमेश्वरे ले पैलि भटे यीशु मसीह स यो संसार में भेजना का द्वारा बनाईना की छी।

10लेकिन अब हमार मुक्तिदाता यीशु मसीह आ ग्यान, और उले हमून में अपूनो अनुग्रह करछ्य, जैले मौत की ताकत स नाश कर दीछ और सुसमाचारा का द्वारा हमून अनन्त जीवन को बाट दिखाछ।

11परमेश्वर ले मैंस यो सुसमाचार को प्रचार करून और प्रेरित बनून खिन और लोगून उपदेश दीन खिन चुन रैछ।

12मैं येक कारण जेल में ले इन दुखून सहन करून मरयू कि मैं लोगून यीशु मसीह का बारिमें सुसमाचार को प्रचार करछूँ। लेकिन मैं शरमानू नै, क्याखिनकि मैं मसीह स जाणछूँ; जैमें मैं विश्वास करछ्य, और मैंस पक्को विश्वास छै कि मसीह उ दिन तक जब तक उ वापस नी आलो, मसीह उ दिन तक मेरि धरोहर की रक्षा करून में पुर तरीका ले सामर्थी छै।

13विश्वास राख कि जो सच्ची शिक्षा तैले मैंथैं भटे सुणछै, उ तैखिन उदारण नियाती छै। और उनून उ विश्वास और प्रेम का दगाड़ जो यीशु मसीह में छै।

14यीशु मसीह का बारिमें सुसमाचार की रखवाली कर जो परमेश्वरे ले तैंस दीईना को छ्यो, पवित्र आत्मा का मद्दत ले जो हमून में रूछो।

15तैं जाण छै, कि आसिया प्रदेशा का सब विश्वासी लोगून ले मैंस छोड़ दी है छै, जिनून में फुगिलुस और हिरमुगिनेस ले छन।

16उनेसिफुरूस का घराना में प्रभु दया करो, क्याखिनकि उले म्यारा पास आभेरन मेरि भौत मद्दत करछ्य, और याँ जेल में मैंथैं मिलभेरन शर्मिन्दा नै भ्यो।

17लेकिन जब उ रोम शैहर में आछ, त उले भौत कोशिश करभेरन मैंस खोजछ्य, और मैंथैं मिलछ्य।

18मैं बिनती करछूँ, कि न्याय का दिन प्रभु उनेसिफुरूस में अपूनी महान दया करौ और तैं खुद निकीकैं जाण छै कि इफिसुस शैहर में मेरि कतुक मद्दत करछ्य।

Jump to: Chapter 2 →