2 Timothy 4

kumaoni

← Chapter 3 Jump to:

1जब यीशु मसीह राजा की नियाती राज्य करून खिन आलो, उ ज्यून और मरिन द्वीवै लोगून को न्याय करोलो। येक कारण मैं मसीह और परमेश्वर स गवाह मानभेरन तैस भौत प्रेम ले हुकुम दीछूँ,

2बखत बुरो या भलो हो तैं हर बखत परमेश्वरा का बचन को प्रचार कर खिन तैयार रौ। तैंस लोगून समझून चैछो कि उनूनले कि गलत करछ्य और उनार पापून खिन उनून डाँठ लागून चैछी। मगर धैर्याक दगाड़ सिखून चैछो और उत्साहित करून चैछो।

3क्याखिनकि इसो बखत आलो जब लोग सच्चो वचन स सुणून नी चाला, मगर अपूनी इच्छाक अनुसार उन इसा उपदेश दीन वालान खोजाला जो उन बातुन सिखाला जो उन सुणून चानान।

4और जो परमेश्वरो को सच्चो बचन सिखूनान, उन, उन लोगून की सुणून नी चाला, पर पुरानी झूठ्ठी कथा कहानीन सुणून चाला।

5लेकिन तैं हर बखत अपून पास शान्त राख, और हर प्रकारा का दुखून सहन करनै रौ। तैंस कड़ी मेहनत करभेरन सुसमाचार को प्रचार करून छै और परमेश्वरो को दास हुना का नाता तैंस उन सब कामून करून छै, जो प्रभु ले तैंस सौंप रैछ।

6मैं तैंस यो हुकुम येका कारण दीन मरयूँ म्योरो जीवन और परमेश्वर ले जो काम मैंस सौंपिना को छै उ पुरो हुन वालो छै। क्याखिनकि मैं जाणछूँ कि मैं अब जल्दी ही मरून वालो छूँ।

7जसीकैं एक निको सिपाई लड़ाई में लगातार लड़ाई लड़नै रूछो, उसीकैं मैंले उ काम पुरो करछ्य जो मसीह यीशु ले मैंस करून खिन दी रैछ्यो। और मसीह में म्योरो विश्वास हमेशा मजबूत रियोछ।

8अब प्रभु ले मैं खिन ईनाम राखिना को छै, क्याखिनकि मैं इसो जीवन जी छै जो ऊस खुश करछो। हमोरो प्रभु यीशु मसीह जो सच्चाई ले न्याय करछो, उ मैंस उ दिना ईनाम द्योलो जब उ न्याय करून खिन वापस आलो। मगर यो ईनाम सिर्फ मैंस नी द्योलो बल्कि उनून सबून ले जो वफादारी का दगाड़ प्रभु उनाको इंतजार करून मर्यान।

9तैं म्यारा पास जल्दी उनाकी कोशिश कर।

10क्याखिनकि देमास ले यो संसार का चीजून है प्रेम करछ्य, और मैंस छोड़भेरन थिस्सलुनीके शैहरा का तरफ खिन न्हैग्यो। और विश्वासी भाई क्रेसकेंस ले गलातिया प्रदेशा का तरफ खिन न्हैग्यो, और तीतुस दलमतिया प्रदेश तरफ खिन न्हैग्यो।

11केवल लूका म्यारा दगाड़ छै। जब तैं आले, त मरकुस स ले अपून दगाड़ लीभेरन आये; क्याखिनकि उ याँ म्यारा काम में मेरि मद्दत करोलो।

12तुखिकुस स मैंले इफिसुस शैहरा खिन भेज रैछ।

13जब तैं आले म्योरो उ कोट जैस मैं त्रोआस शैहर में करपूसाक घर में छोड़ आरयूँ, ऊस लीभेरन आये और दगाड़ में किताब और खास करभेरन बाकारा की खाल स लीभेरन आये जैमें भौत खास बात लिखीनाक छन।

14ताँमाको भांणा बनूनवालो सिकन्दर ले मैंस कई तरीका ले दुख पुजाछ, प्रभु उक बुरा कामून का न्याय करोलो।

15तैले अपून आपस उ है बचा राखै, क्याखिनकि उले हमरि मसीह शिक्षा का बातुन को भौत विरोध करछ्य।

16पैल बार जब रोम शैहरा का कचैरी में अपूनी सफाई दीन खिन गयूँ, तब म्यारा तरफ भटे बोलूनवालो कोई ले नी छ्यो, और सबून ले म्योरो दगोड़ो छोड़ दीछ। प्रार्थना करछूँ कि परमेश्वर यो बात खिन उनून माफ करौ।

17पर प्रभु म्योरो मद्दतगार र्योछ, और मैंस सामर्थ दीछ ताकि मैं उ कचैरी में मजुद सब गैर-यहूदीन पुर तरीका ले यीशु मसीहक बारिमें सुसमाचार स सुणा सकयू, और मैंस मौत है ले बचाछ।

18और प्रभु मैंस हरेक बुर कामून भटे छुड़ालो। उ मैंस सुरक्षित अपून स्वर्ग राज्य में पुजालो। उकी महिमा हमेशा-हमेशा हुनै रौ। आमीन।

19प्रिस्का और उको घरवालो अक्विला स और उनेसिफुरूसा का परिवार स म्योरो नमस्कार।

20विश्वासी भाई इरास्तुस कुरिन्थुस शैहर में रैग्यो, और मैंले त्रुफिमुस स मीलेतुस शैहर में छोड़ दीछ क्याखिनकि उ बिमार छ्यो।

21जाड़ा दिनून है पैलि म्यारा पास उना कोशिश कर। युबुलुस, और पुदेंस, लीनुस, क्लौदिया, और दुसारा विश्वासी भाई ले तैंस नमस्कार कुंनान।

22मैं प्रार्थना करछूँ, कि प्रभु और उको अनुग्रह त्यारा दगाड़ रौ।

← Chapter 3 Jump to: