John 12

kumaoni

1फिर यीशु फसह त्यार है छ: दिन पैलि बैतनियाह गौं में आयान, जा उले लाजर स मरिन में भटे ज्यून करिना को छ्यो।

2लोगून ले वाँ यीशु का आदर करून खिन दावत को खानो तैंयार करछ्य, और मार्था खानो बाड़ून मरेछी, और लाजर उनूनमें भटे एक छ्यो जो उक दगाड़ खानो खान खिन बैठिनाको छ्यो।

3तब मरियम ले जटामांसी को आधा लीटर भौत मेहंगा इत्र लीभेरन यीशु का खुटान में मलछी और अपून बालून ले उक खुटान पोछ्यान, और इत्र की खुशबूले पुरो घर में खुशबू फैल जाछी।

4लेकिन उक बारा शिष्यून में भटे यहूदा इस्करियोती नामोको एक शिष्य जो ऊस पकड़ून वालो छ्यो, उ कुन लागछ्य।

5“यो इत्र तीन सौ दिन की मजूरी का बराबर छी, येस बेच भेरन गरीबून की मद्दत करि जा सकछी?”

6उले यो बात येक कारण क्योछ, ऊस गरीबून की फिकर नी छी, लेकिन येक कारण कि उ चोर छ्यो और उक पास पैसान को थैलो रूछ्यो, और उ जै केले डालछ्या, उ निकाली ली छ्यो।

7यीशु ले क्योछ, “येस परेशान जन करा, जो यो करून मरेछ येस करून दी, क्याखिनकि यो म्यार अन्तिम संस्कार की तैंयारी खिन छै।

8लेकिन गरीब त तुमार दगाड़ हमेशा रूनान, और मैं तुमार दगाड़ हमेशा नै रूँ।”

9जब यहूदीन लोगून ले सुणछ कि यीशु वाँ छै, तब लोगून की भौत ठूली भीड़ वाँ आछ। उन सिर्फ यीशु नै बल्कि लाजर स ले देखून चाँछ्या, जैस उले मरिन में भटे ज्यून करछ्यो।

10तब प्रधान याजकून ले लाजर स ले मार डालना की साजिश करछ्य।

11क्याखिनकि लाजर का कारण भौत लोग यहूदी अगुवान अस्वीकार करून लाग्यान, और उनूनले यीशु में विश्वास करछ्या।

12दुसारा दिन भौतसा लोगून जो फसह को त्यार में आईना छ्या, यो सुणिभेरन कि यीशु यरूशलम शैहर में आ रियोछ।

13तब लोगून ले खजूरा का हांगा लियान, और उक स्वागत करून खिन और ऊस मिलून खिन निकल्यान और जोर चिल्ला-चिल्ला भेरन कुन लाग्यान, “होशाना; धन्य छै, इस्राएल देशो को राजा उ जो परमेश्वरा का नाम ले उछो।”

14जब यीशु स एक गधाको बच्चा मिलछ्य, उमें बैठभेरन उ यरूशलम शैहर आछ, जसो पवित्रशास्त्र में लिखीना को छै ऊसोई भ्योछ।

15“हे यरूशलम शैहरा का लोगो, जन डरा! देखा, तुमोरो राजा, गधा का बच्चा में बैठभेरन, तुमार पास आलो।”

16यीशु का शिष्य पैलि इन बातुन नी समझ छ्या; लेकिन जब यीशु की महिमा प्रगट भैछ, तब उनून याद आछ, कि जो कुछ ले यीशु ले दगाड़ भ्योछ उ ठीक ऊसोई छ्यो, जसो पवित्रशास्त्र में कईना को छ्यो।

17तब भीड़ का लोग जो उ बखत यीशु का दगाड़ छ्या, जब उले लाजर स कबर में भटे बुलाभेरन, मरिन में भटे ज्यून करछ्य, उन दुसारा लोगून को गवै दीन लाग्यान।

18येक कारण भौत लोग यीशु का दगाड़ मिलून खिन आ रै छ्या, क्याखिनकि उनूनले यो चमत्कारा बारिमें सुण राँखछ्यो।

19तब फरीसी लोगून ले आपस में क्योछ, “देखा, हम के नै कर पान मरिया; देखा, संसार में हर कोई उक पछिल हो जाछो।”

20जो लोग फसह का त्यार में अराधना करून खिन आ रै छ्या, उनूनमें थ्वाड़ा यूनानी लोग छ्या।

21उन गलील प्रदेशा का बैतसैदा शैहरा का रून वालो फिलिप्पुसा का पास आभेरन उथैं बिनती करून लागनान, “श्रीमान हम यीशुका दगाड़ मिलून चानू।”

22फिलिप्पुस ले आभेरन अन्द्रियास थैं क्योछ, तब अन्द्रियास और फिलिप्पुस ले जाभेरन यीशुस बताछ।

23यो बात में यीशु ले उनूनथैं क्योछ, “मैं आदिमी का च्याला की महिमा करना को बखत आग्योछ।

24मैं तुमूनथैं सच्ची-सच्ची कुछूँ, कि जब तक ग्यूँको दानो भूमि में पड़भेरन मर नै जानो, उ एकलो रूँछो लेकिन जब उ दानो मरि जाछो त भौत फल ल्यूछ, ऊसोई म्यारा दगाड़ ले होलो।

25जो अपून प्राणस प्रिय जाणछो, उ ऊस खो दीछ, लेकिन जो संसार में अपून प्राणस अप्रिय जाणछो; उ उकी अनन्त जीवन तलक उकी रक्षा करोलो।

26अगर कोई मेरि सेवा करौ, तो उ म्येरो शिष्य बनौ; तब जा मैं हुलो वाँ म्येरो सेवक ले होलो; अगर कोई मेरि सेवा करोलो, त पिता परमेश्वर उको आदर करोलो।

27अब मैं भौत बैचेन छूँ। येक कारण अब मैं कि कू? ‘हे पिता परमेश्वर, मैंस यो दुख का बखत भटे बचौ?’ लेकिन मैं संसार में येक कारण आईना को छूँ ताकि दुख उठू, और अपून प्राण द्यूँ।

28हे पिता परमेश्वर, अपूनी नाम की महिमा कर।” तब परमेश्वर ले स्वर्ग भटे क्योछ, “मैंले उकी महिमा करछै, और फिर दुबारा करूँलो।”

29तब जो लोग ठाड़ हो भेरन सुणून मरेछ्या, उनूनले क्योछ; कि बादल गरजून मर्योछ, और थ्वाड़ा लोगून ले क्योछ, “कोई स्वर्गदूत उक दगाड़ बात करून मरियोछ।”

30यो बात में यीशु ले क्योछ, “यो आवाज मैं खिन नाहातिन लेकिन तुमार भल खिन छ्यो।

31अब उ बखत आग्योछ, जब परमेश्वर संसार में लोगून को न्याय करोलो, और यीशु यो संसारा का अधिकारी शैतान की ताकत स खतम कर द्योलो।

32और जब मैं धरती में भटे ऊच्चा में चढ़ाई जूलो, त सबून अपून पास ल्यूलो।

33इसो कैभेरन उले यो प्रगट कर दीछ, कि उ कसीकैं मरून वालो छै।”

34यो बात में लोगून ले उथैं क्योछ, “हमून ले पवित्रशास्त्र कि यो बात सुणि रैछ, कि मसीह हमेशा ज्यून रौल, फिर तैं किलैं कुछै, कि मैं आदिमी का च्याला स ऊँच्चा में चढ़ाई जानो जरूरी छै? यो आदिमी को च्योलो छै?”

35यीशु ले उनूनथैं क्योछ, “उज्यालो अब थ्वाड़ा देर तक तुमार बीच में छै, जब तक उज्यालो तुमार दगाड़ छै तब तक हिटनै रौ; इसो नै हो कि अन्यारो तुमून नाश कर द्यो; जो अन्यारा में हिटछो उन नै जाणना कि काँ जानमर्योछ।

36जब तक उज्यालो तुमार दगाड़ छै, उज्याला में विश्वास कर कि तुम उज्याला का सन्तान बना।” यो बात कैभेरन यीशु न्हैग्यो और उनून भटे लुकीना को रियोछ।

37और यीशु ले उनार सामुनि इदुक चमत्कार दिखाया, तब ले उनूनले उमें विश्वास नै कर्यो;

38यो येक कारण भ्योछ ताकि परमेश्वरो को संदेश दिनवाला यशायाह ले कईना को छ्यो, उ पुरो है जौ। उले क्योछ, “हे प्रभु, हमार सुसमाचार में कैले विश्वास करछै? और परमेश्वर की महान सामर्थ केमें प्रगट भैछ? ”

39येक कारण उन विश्वास नै कर सक्या, लेकिन यशायाह ले फिरले क्योछ,

40“उले उनार आँखान अन्धो कर दीछ, और उनोरो दिमाग स बन्द कर दीछ, काँई इसो नै हो कि उ आँखा ले देखून, और दिमागले समझून, और अपून पापून भटे पश्चताप करून, और मैं उनून चंगो करूँ।”

41यशायाह ले यो बात येक कारण क्योछ, कि उले बखत है पैलि उकी महिमा देखछ्य; और उले उक बारिमें बात करछ्य।

42फिरले अगुवान में भटे ले भौतून ले उमें विश्वास करछ्य, लेकिन फरीसी लोगून का कारण यीशु स मानना ले डर छ्या, कि उनून यहूदी सभाघर भटे निकाल दी जालो।

43क्याखिनकि लोगून की तारीफ उनून परमेश्वर की तारीफ है ज्यादा निकी लागछी।

44यीशु ले भीड़ का लोगून ध्दयाभेरन क्योछ, जो मैंमें विश्वास करछो, उ केवल मैंमें नै, लेकिन उ म्यार भेजून वाला परमेश्वर में विश्वास करछो।

45और जो मैंस देखछो, उ म्यारा भेजून वाला स देखछो।

46मैं संसार में उज्यालो हो भेरन आरयूँ ताकि जो कोई मैंमें विश्वास करोलो, उ अन्यारो में नै रौ।

47अगर कोई मेरि बात सुणिभेरन नै माननो, त मैं ऊस दोषी नै ठैरूनू, क्याखिनकि मैं संसार में दोषी ठैरून खिन नै लेकिन संसारा का लोगून की मुक्ति करून खिन आरयूँ।

48जो मैंस तुच्छ जाणछो और मेरि बात नै माननो उको न्याय करून वालो एक छै, मतलब जो मैंले जो क्योछ, उ अन्तिम दिनून में उको न्याय करोलो।

49क्याखिनकि मैं अपून तरफ भटे कोई ले बात नै करनू, लेकिन पिता परमेश्वर जेलै मैंस भेज रैछ उले मैंस आज्ञा दी रैछ, कि-कि कुँ? और कि-कि बोलू?

50मैं जाणछूँ कि उकी आज्ञा मानून अनन्त जीवन छै, येक कारण मैं तुमूनथैं उई बोलछूँ जो पिता परमेश्वर ले मैंथै कै रैछ।

← Chapter 11 Jump to: Chapter 13 →