Romans 15

kumaoni

← Chapter 14 Jump to: Chapter 16 →

1हम जो विश्वास में मजबूत छै, तो जाणनू कि इन बातुन ले के फर्क नै पड़नो, लेकिन हम उनून केवल खुदै खुश करून खिन नै कर सकना। हमून उन लोगून का शक और डरून में बिचार करून चैछो जो इन बातुन गलत मान्नान

2हमून में भटे हरेक अपून दगड़िया विश्वासी खिन उ करून चैंछो, जो उ खिन निको छै और जो ऊस खुश करोलो और जो उक विश्वास स मजबूत बनालो।

3क्याखिनकि मसीह ले अपनास खुश नै कर्यो, लेकिन जसो पवित्रशास्त्र में लिख रैछ, “तेरि बुराई करून वालान ले मेरि बुराई ले करछ्य।”

4जतुक बात पैलिक पवित्रशास्त्र में लिखी ग्यान, उन हमरि शिक्षा खिन लिखीनाका छन, ताकि हम उ शिक्षा ले धीरज और हिम्मत मिलनै रौ, यो तरीका ले हम अपूनी आश बनाईना की राखा, कि परमेश्वरे ले जो वादा करिनाको छ्यो, उ करोलो।

5मैं प्रार्थना करछूँ की, परमेश्वर तुमूनमें और धीरज और शान्ति दे ताकि तुम यीशु मसीह की शिक्षा का अनुसार एक-दुसरा का दगाड़ शान्ति ले रून में मद्दत करा।

6ताकि तुम सब एक दगाड़ मिलभेरन हमार प्रभु यीशु मसीह का पिताकी महिमा करा।

7येक कारण, तुम एक दुसरा स ग्रहण करा, जसीकैं मसीह ले तुमून ग्रहण कर रैछ; ताकि लोग परमेश्वरे की तारीफ करून।

8येक कारण मैं कुछूँ जो खतना करिना का यहूदीन मसीह को सेवक यो बतून खिन बनछै, की परमेश्वर वादा स पुर करून में सच्चो छै, जो उले उनार पुरखानथैं करिनाको छ्यो,

9और गैर-यहूदी लोग ले परमेश्वरे की दया का कारण उकी महिमा करून; जसो पवित्रशास्त्र में लिख रैछ, येक कारण मैं गैर-यहूदी लोगून में तेरि महिमा करलो में त्यारा नामाका भजन गाँलो।

10एक और जाग पवित्रशास्त्र में लिख रैछ, “हे सब गैर-यहूदी लोगों, परमेश्वर की प्रजा का दगाड़ खुशी मना।”

11फिर भटे पवित्रशास्त्र में लिख रैछ, “हे सब गैर-यहूदी लोगों, प्रभु की तारीफ करा; और हे राज्य-राज्य का सब लोगों उकी तारीफ करा।”

12और फिर परमेश्वरो को संदेश दिनवालो यशायाह ले पवित्रशास्त्र में लिख रैछ, यिशै को बंश भटे एक आलो, और गैर-यहूदी लोगून में राजा करोलो, उमें गैर-यहूदी लोग आश राखाँला की उ उनून बचालो।

13मैं प्रार्थना करछूँ की, परमेश्वर जो आशो को दाता छै, तुमून विश्वास करून में पुर रीतिले खुशी और शान्ति ले भरौ की पवित्र आत्मा की सामर्थ ले तुमेरि आश बढ़नै जौ।

14हे म्यारा विश्वासी भाईयों, मैं खुद ले तुमार बारिमें जाणछूँ, कि तुम ले खुदै भलाई ले भरिनाका छै; और तुम पुर रीतिले जाणछा की तुमून कि करून चैछो। एक दुसरा स सिखूनै रौ।

15तब ले मैले काँई-काँई याद दिलून खिन तुमून जो भौत हिम्मत करभेरन लिख रैछ, यो उ दयाका कारण भ्योछ, जो परमेश्वरे ले मैंस दीछ।

16कि मैं गैर-यहूदी लोगून खिन मसीह यीशु को सेवक होभेरन एक याजक की नियाती परमेश्वरे की सुसमाचार की सेवा करूँ। इसीकैं मैं उनून एक भेंटा का रूप में परमेश्वरा का पास ल्या सकछूँ जैले उ खुश छन, किलैंकी पवित्र आत्मा ले उनून शुद्ध कर रैछ।

17येक कारण मैं यीशु मसीह कारण परमेश्वरे में सेवा की तारीफ कर सकछूँ।

18मैं यो कुन खिन निडर छूँ, किलैंकी मसीह ले म्यारा द्वारा जो कर रैछ, उमें मैं दुसरा लोगून परमेश्वराका पछिल चलून में सक्षम छूँ। गैर-यहूदीन यीशु मसीह में भरोस करछय जब उनूनले म्यारा बचन स सुणछ्य और म्यारा कामून देखछ्य।

19मैं पवित्र आत्मा द्वारा दी गै सामर्थ ले चकित काम और चमत्कार करछूँ। येक कारण जाँ ले मैं यरूशलम शैहर भटे इलिरिकम शैहर गयूँ, मैंले वाँ सबे लोगून, यीशु मसीह का बारिमें सुसमाचार सुणूछूँ।

20लेकिन म्यारा मनेकी इच्छा छै, की यीशु मसीहा को सुसमाचारो को प्रचार उनी जागान में करलो, जाँ मसीह का बारिमें येले तक सुणि नै ग्यो; ताकि मैं दुसारा का कामून में अपून अधिकार नै राखूँ।

21मैं उ बात स पुर करून चांछूँ जो पवित्रशास्त्र में लिख रैछ, “जिनून मसीहा का बारिमें नै बताई ग्योछ, उन देखाला और जिनूनले उक बारिमें नै सुणि उनी समझाला।”

22किलैकी मैं उन जागान में मसीहा को सुसमाचारो को प्रचार करनमर्यू छूँ, जाँ लोगून ले उक बारिमें नै सुणिना को छ्यो, येक कारण मैं अपून आपस तुमार पास उन है रोकूनमर्यू।

23लेकिन अब इन प्रदेशून में जिन लोगून ले मसीहा का बारिमें नै सुण रैछ, उन प्रदेशून में सुसमाचारो को काम पुर कर हैछ, मैंस भौत सालून भटे इन्तजारा का बाद तुमार पास उनाकी इच्छा छै।

24येक कारण जब मैं स्पेन देश खिन जूलो त तुमार पास हुनै जूलो, किलैंकी मैंस आश छै, की मैं सफर करून बखत तुमूनथैं भेंट करूँ, और मैं तुमूनथैं संगति करभेरन खुश हो जूँ, और मैं चाछूँ की तुम मैंस म्यारा स्पेन देशा का सफर खिन मद्दत करा।

25लेकिन ऐल त यरूशलम शैहरा का विश्वासीन भेंट दिन खिन जान छै।

26क्याखिनकि मकिदुनिया और अखया प्रदेशा का लोगून ले इसो करून निकी बात समझछ्य, कि यरूशलम शैहरा में गरीब विश्वासी लोग छन उनून के दान दी।

27उनूनले खुशी ले गरीब लोगून दान दीछ, उन यरूशलम शैहरा का रूनवाला लोगून का कर्जदार छै, किलैंकी गैर-यहूदी लोगून ले यरूशलम शैहर में रूनवाला विश्वासीन ले सुसमाचार की आत्मिक आशीष प्राप्त करछै, येक कारण उनून लागछो की येका बदला में उन कम है कम उनेरि आर्थिक मद्दत कर सकनान।

28येक कारण, मैं सबून है पैलि यरूशलम शैहर खिन जानमरयू, ताकि उनून जो जामा करीना का दान दी सकूँ। उक बाद फिर मैं रोम देश में आभेरन तुमारा दगाड़ मिलना का बाद स्पेन देश खिन जूलो।

29और मैं जाणछूँ कि जब मैं तुमार पास उलो, त उक कारण मसीह पुरी रीतिले आशीष द्योलो।

30हे विश्वासी भाईयों, हमार प्रभु यीशु मसीह में हमार आत्मा ले हमून जो प्रेम दीछ, उक कारण, मैं तुमूनथैं बिनती करछूँ की मैं खिन परमेश्वरथैं भौत ईमानदारी ले प्रार्थना करा।

31जेले मैं यहूदिया प्रदेशा का अविश्वासीन भटे बच रूँ, और यो बात खिन ले प्रार्थना कर्या की वाँ का विश्वासी मेरि भेंट स ग्रहण करून जो मैं अपून दगाड़ यरूशलम शैहर भटे लीभेरन जानमर्यू।

32और मैं परमेश्वरे की इच्छाले तुमार पास आनन्द का दगाड़ आभेरन तुमेरि संगति में आराम करूँ।

33मैं प्रार्थना करछूँ की परमेश्वर, जो शान्ति दीछो, तुम सबून का दगाड़ रौ। आमीन।

← Chapter 14 Jump to: Chapter 16 →