1 Thessalonians 4

Kikuyu Bible (IBUKU RĨRĨA ITHERU RĨA NGAI)

← Chapter 3 Jump to: Chapter 5 →

1NAGUO ũhoro wa kũrigĩrĩria nĩ atĩrĩ, ariũ a Ithe witũ, twamũthaitha na twamũringĩrĩria thĩinĩ wa Mwathani Jesu, atĩ o ta ũrĩa mwarutirũo nĩ ithuĩ ũhoro wa mĩthiĩre ĩrĩa mwagĩrĩirũo nĩ gũthiaga nayo nĩguo mũkenagie Ngai, (na noguo mwĩkaga-rĩ), mũkĩragĩrĩrie gwĩka ũguo mũno.

2Tondũ nĩmũũĩ maũndũ marĩa twamũtaarire namo nĩ ũndũ wa Mwathani Jesu.

3Tondũ rĩrĩ, ũũ nĩguo Ngai enda, atĩ mũtuĩke andũ aamũre; atĩ mũthemage ũmaraya;

4na atĩ o mũndũ wanyu amenyage ũrĩa angĩhota gũikaragia mwĩrĩ wake mwene wĩ mũtheru, akĩũtĩaga,

5atekwĩrirĩria maũndũ ma ũmaramari ta andũ a Ndũrĩrĩ iria itoĩ Ngai;

6na ningĩ atĩ mũndũ o na ũrĩkũ ndakanatwarĩrĩrie mũrũ wa ithe ũhoro-inĩ wa indo ciake, o na kana amuogoge; nĩ ũndũ Mwathani nĩwe ũrĩhagia andũ arĩa mekaga maũndũ macio mothe, o ta ũrĩa twamwĩraga mbere na tũkamuumbũragĩra.

7Amu Ngai ndaatwĩtĩire maũndũ ma waganu, tiga o marĩa ma ũtheru.

8Nĩ ũndũ ũcio-rĩ, mũndũ wa gũkararia ũhoro ũcio, ti mũndũ akararagia, no Ngai ũrĩa ũmũheaga inyuĩ Roho wake Mũtheru.

9No rĩrĩ, ha ũhoro wa kwendana na ariũ a Ithe witũ-rĩ, mũtirĩ na bata mũtindage mũkĩandĩkĩrũo, nĩ ũndũ inyuene nĩmũrutĩtwo kwendana nĩ Ngai:

10na ti-itherũ ũguo noguo mwĩkaga ariũ a Ithe witũ othe marĩ Makedonia guothe. No rĩrĩ, ariũ a Ithe witũ, twamũhatĩrĩria atĩ mũkĩragĩrĩrie gwĩka ũguo mũno;

11ningĩ atĩ mwĩkagĩre kĩyo gĩa gũkindĩria, na mũhang’agĩre o mabata marĩa mamũkoniĩ, na mũrutage wĩra na moko manyu, o ta ũrĩa twamũtaarire;

12nĩ getha mũthiage na mĩthiĩre ĩrĩa ĩngĩtĩĩka, mũgĩtwarana na andũ arĩa matarĩ a thiritũ iitũ, na ningĩ mũikarage mwĩhotete, mũtekwaga kĩndũ.

13No rĩrĩ, ariũ a Ithe witũ, tũtikwenda mũikare mũrigĩtwo nĩ ũhoro wa andũ arĩa makomete, nĩ getha mũtikae kũgĩa na kĩeha, ta andũ arĩa angĩ matarĩ na ũndũ merĩgĩrĩire.

14Nĩ ũndũ tũngĩkorũo nĩtwĩtĩkĩtie atĩ Jesu nĩaakuire na agĩcoka kũriũka, no twĩtĩkie atĩ ũguo noguo Ngai akarehanĩrie hamwe na Jesu arĩa makomete me thĩinĩ wake.

15Nĩkĩo twamwĩra na ũhoro wa Mwathani atĩrĩ, atĩ ithuĩ arĩa tũgakorũo tũtũire muoyo, o ithuĩ tũtigaire o nginya rĩrĩa Mwathani akoneka-rĩ, tũtikahĩta arĩa makomete o na hanini.

16Nĩ gũkorũo Mwathani we mwene nĩagaikũrũka oime Igũrũ agĩĩtanaga na kayũ, o na mũgambo wa mũraika ũrĩa mũnene, naguo coro wa Ngai ũkĩhuhagwo: nao andũ arĩa makuĩte me thĩinĩ wa Kristo nĩo makaamba kũriũka:

17na thutha wa ũguo, ithuĩ arĩa tũgakorũo tũrĩ muoyo, o ithuĩ tũtigaire-rĩ, nĩtũkoyanĩrio hamwe nao tũtwarũo matu-inĩ, nĩguo tũgacemanie na Mwathani o kũu rĩera-inĩ: tũgagĩtũũrania ũguo na Mwathani o nginya tene.

18Hakĩrĩ ũguo-rĩ, ũmanagĩrĩriai o mũndũ na mũndũ ũrĩa ũngĩ na ciugo icio.

← Chapter 3 Jump to: Chapter 5 →