1 Timothy 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1NIĨ Paulo, mũtũmwo wa Kristo Jesu nĩ ũndũ wa ũrĩa gwathanĩtwo nĩ Ngai, Mũhonokia witũ, O na Kristo Jesu ũrĩa tũtũire twĩrĩgagĩrĩra-rĩ,

2nĩ niĩ ndakwandĩkĩra marũa maya, wee Timotheo, mũrũ wakwa wa ma njiarĩte ũhoro-inĩ ũrĩa twĩtĩkĩtie. Ũrogĩa na Wega, na kũiguĩrũo tha, o na thayũ, ciumĩte kwĩ Ngai Ithe witũ, na gwĩ Kristo Jesu Mwathani witũ.

3O ta ũrĩa ndakũhatĩrĩirie, hĩndĩ ĩrĩa ndathiaga Makedonia, atĩ ũikare Efeso, noguo ngũcoka gũkũhatĩrĩria rĩu; nĩ getha ũkaanagie andũ amwe matikarutanage ũrutani ũngĩ,

4o na kana mathikagĩrĩrie ng’ano cia tũhũ, na ũhoro wa njiarũa iria itathiraga, o iria itũmaga andũ magĩe na njiriri na matirũmie maũndũ marĩa Ngai atabarĩire ma gwĩkĩra andũ hinya, o marĩa makonainie na wĩtĩkio.

5No rĩrĩ, muoroto wa ũhoro ũrĩa ũtaaranagwo naguo nĩ rĩrĩ, nĩ gũtũma wendani wonekage o ũrĩa uumanĩte na ngoro theru, na thamiri njega, o na wĩtĩkio ũtarĩ na ũhinga.

6Maũndũ macio-rĩ, kũrĩ andũ amwe mahĩtanĩtie namo, makerekera ndereti cia tũhũ;

7magakĩenda gũtuĩka arutani a watho, o na matoĩ gĩtũmi kĩa mohoro marĩa maheanaga, o na kana gĩtũmi kĩa maũndũ marĩa maaragia magwatĩirie.

8Rĩu-rĩ, nĩtũũĩ atĩ watho nĩ ũndũ mwega, mũndũ angĩkorũo nĩaũhũthagĩra na njĩra ĩrĩa njagĩrĩru,

9akĩmenyete atĩ watho ũcio ndwathanĩtwo nĩ ũndũ wa mũndũ ũrĩa mũthingu, tiga o ũndũ wa andũ arĩa aregi watho na wa arĩa aremi, na wa arĩa matatĩaga Ngai, o na ehia, o na arĩa matarĩ atheru, na arĩa matetigagĩra Ngai, o na arĩa mahũraga maithe mao na manyina mao, o na oragani,

10o na ningĩ nĩ ũndũ wa arĩa ahũri-maraya, na arũme arĩa magwataga arũme arĩa angĩ, o na arĩa maiyaga andũ, na ahenania, na arĩa mehĩtaga na mathara, o na arĩa mekaga ũndũ ũngĩ o wothe ũterekanĩrĩire na ũrutani ũrĩa wagĩrĩire:

11arĩ guo ũrĩa ũringaine na Ũhoro-ũrĩa-Mwega wĩ na riri wa Ngai ũrĩa mũgathe, o Ũhoro ũcio ndehokeirũo niĩ ndĩũramatage.

12Nĩngũcokeria Kristo Jesu Mwathani witũ ngatho, o we wa’hotithirie gwĩka ũguo, nĩ ũndũ wa ũrĩa aanduire wa kwĩhokeka, agĩgĩ’thura nduĩke wa kũmũtungatagĩra;

13o na ndatuĩka mbere ndarĩ mũrumi Ngai, na mũnyarirani, o na ndũrĩka. No nĩ kũiguĩrũo ndaiguĩrĩirũo tha, tondũ ndekaga ũguo itarĩ ũndũ njũĩ, nĩ ũrĩa ndaagĩte gwĩtĩkia;

14naguo Wega wa Mwathani witũ ũgĩkĩrĩrĩria kũnjiyũrĩrĩra, hamwe na wĩtĩkio o na wendani ũrĩa uumaga gwĩ Kristo Jesu.

15Ũhoro ũyũ nĩguo wa kwĩhokeka, na nĩguo wagĩrĩire gwĩtĩkĩrũo kũna, atĩ Kristo Jesu okire thĩ ĩno ahonokie ehia; nao acio-rĩ, ũrĩa wa mbere nĩ niĩ.

16No rĩrĩ, ũndũ ũrĩa watũmire njiguĩrũo tha nĩ ũyũ, atĩrĩ, atĩ thĩinĩ wakwa, o ũguo ndĩ mwĩhia wa mbere-rĩ, Jesu Kristo onanie ũkirĩrĩria wake wothe, nĩguo nduĩke kĩonereria harĩ andũ arĩa marĩkoragwo mamwĩtĩkĩtie thutha ũyũ, makagĩa na muoyo ũrĩa ũtagathira.

17Na rĩu, Mũthamaki ũrĩa ũtũũraga tene na tene, na ndathiraga na ndonekaga-rĩ, o we Ngai we wiki, arotĩagwo na agoocagwo o mĩndĩ na mĩndĩ. Amen.

18Ũtaaro ũcio nĩguo ndagũtaara naguo, wee Timotheo mwana wakwa, o kũringana na mohoro marĩa maarathirũo o mbere ũhoro-inĩ waku, nĩ getha ũhotithagio nĩmo kũrũa mbaara ta mũthigari mwega;

19na ũtũũre o ũrũmĩtie wĩtĩkio, wĩ na thamiri ĩtarĩ na mĩĩcuko. Nĩ thamiri andũ amwe maregete kũigua, naho ha ũhoro wa maũndũ ma Wĩtĩkio magagĩkorũo morĩte, o ta ũrĩa andũ moragĩra iria-inĩ marikabu yeha.

20Nao amwe ao nĩ aa Humenayo na Alekisandero; nĩo ndĩmaneanĩte gwĩ Shaitani, nĩguo marutwo matigage kũruma Ngai.

Jump to: Chapter 2 →