1 Timothy 5

Kikuyu Bible (IBUKU RĨRĨA ITHERU RĨA NGAI)

← Chapter 4 Jump to: Chapter 6 →

1NDŨKANATETIE mũthuri, kaba ũmũthaithage ta arĩ thoguo; nao andũ arĩa matarĩ akũrũ o taguo, ta arĩ ariũ a thoguo;

2nao atumia akũrũ-rĩ, ta arĩ aa nyũkwa; nao arĩa matarĩ akũrũ ta arĩ airĩtu a thoguo, ũgĩikaraga na mĩthiĩre yothe ya ũthingu.

3Tĩaga atumia a ndigwa o arĩa a ndigwa ki.

4No rĩrĩ, mũtumia wa ndigwa angĩkorũo arĩ na ciana kana ciana cia ciana ciake-rĩ, reke ciana icio ciambage kwĩruta gũteithia andũ a cio, cio nyene, ikĩmekagĩrĩra, na icokagĩrie aciari ngatho cia ũrĩa maacirerire: tondũ ũguo nĩguo ũngĩĩtĩkĩrĩka nĩ Ngai.

5Na rĩrĩ, mũtumia ũrĩa ũrĩ wa ndigwa ki, atigĩtwo atarĩ na mũteithia, ũcio nĩehokaga o Ngai, agatũũra amũhoyaga akĩmũthaithaga ũtukũ na mũthenya.

6No mũtumia ũrĩa ũtũire ekenagia na maũndũ marĩa eriragĩria, nĩ ta akuĩte arĩ o muoyo.

7Athanaga maũndũ macio namo nĩ getha acio maikarage matarĩ ũcuke.

8Mũndũ angĩikara ategũteithia andũ ao, o na makĩria andũ a gwake mũciĩ-rĩ, nĩ gũkaana akaanĩte ũrutani ũrĩa wa Wĩtĩkio, na nĩ mũũru gũkĩra mũndũ ũtarĩ etĩkia.

9Menya ũkaandĩka mũtumia mũtaratara-inĩ wa atumia a ndigwa ũrĩa ũtahingĩtie mĩaka mĩrongo ĩtandatũ, na agakorũo aarĩ wa mũthuri o ũmwe,

10na akamenyeka ũrĩa atũire ekaga maũndũ mega; na ningĩ akorũo nĩarerete ciana, na agatũũra atugaga ageni, na agathambagia andũ arĩa aamũre magũrũ, o na ningĩ akorũo nĩaateithagia andũ arĩa mathĩnĩkĩte, na akarũmanagĩria na kĩyo gwĩkaga maũndũ marĩa mothe mega.

11No rĩrĩ, rega kwandĩka atumia a ndigwa arĩa matarĩ akũrũ; amu-rĩ, maatigana na Kristo nĩ ũndũ wa kũgucĩrĩrio nĩ merirĩria mao, macokaga kwenda kũhikio:

12magagĩtuĩka a gũtuwo ehia nĩ ũndũ wa ũrĩa mareganĩte na ũhoro ũrĩa maambire gwĩtĩkia.

13Ningĩ nĩmemenyagĩria ũgũta, makĩũrũrangaga nyũmba o nyũmba; na to kũgũtara gwiki, no nĩmatuĩkaga andũ a mũhuhu, o na magetonyagĩrĩria maũndũ-inĩ ma andũ angĩ, makaaragia maũndũ marĩa mataagĩrĩirũo nĩ kwaria.

14Nĩ ũndũ wa ũguo ngwenda atĩrĩ, atĩ atumia a ndigwa acio matarĩ akũrũ macoke kũhikio, na maciarage twana, na matabanagie maũndũ ma mũciĩ, na matikareke mwene muku one kamweke ga gũcambania:

15amu o na rĩu kũrĩ amwe moimĩte njĩra makerekera kũrĩ Shaitani.

16Na rĩrĩ, mũndũ-wa-nja ũrĩa wĩtĩkĩtie angĩkorũo arĩ na atumia a ndigwa, nĩamateithagie arĩ we, kanitha ũtige kũritũhĩrũo nĩo, nĩ getha ũhote gũteithagia arĩa marĩ a ndigwa kũna.

17Nĩkwagĩrĩire atĩ athuri a kanitha arĩa maathanaga wega mekagĩrĩrũo o gwĩkĩrĩrũo mũno, na makĩria nĩ arĩa menogagia wĩra-inĩ wa kũheana ũhoro na wa kũrutana.

18Nĩ gũkorũo kwandĩkĩtwo Maandĩko-inĩ atĩrĩ, Ndũkanohe ndegwa kanua hĩndĩ ĩrĩa ĩkũranga ngano ĩkĩmĩhũra. O na ningĩ atĩrĩ, Mũndũ wa wĩra nĩaagĩrĩirũo nĩ kũheo mũcara wake.

19Menya ũkanetĩkĩra mũthuri wa kanitha athitakwo, tiga o hakorirũo harĩ ũira wa andũ erĩ kana atatũ.

20Ĩndĩ arĩa maikaraga makĩĩhagia-rĩ, ũmakaanagie andũ othe marĩ ho, nĩ getha arĩa angĩ maikarage metigĩrĩte.

21Ndakwĩra atĩrĩ na ma, Ngai arĩ ho, o na Kristo Jesu, o na araika arĩa athure, atĩ ũhingagie maũndũ macio hatarĩ gũthurania, kana kwenda mũndũ.

22Ndũkanaigĩrĩre mũndũ moko na kĩhĩko, kana ũgwatanĩre na andũ angĩ mehia mao: wĩikaragie wĩ mũthingu.

23Tiga kũnyuaga o maĩ matheri, kaba ũnyuage ndibei nyinyi nĩ ũndũ wa nda yaku, o na wa ũrĩa ũrũaraga kaingĩ.

24Mehia ma andũ amwe nĩ moimĩru, makamatongoragia cira-inĩ: andũ amwe angĩ-rĩ, mehia mao nĩmamoimaga thutha.

25Na no taguo kũrĩ maũndũ mega moimĩru; namo marĩa matarĩ moimĩru-rĩ, matingĩhota kũhithĩka.

← Chapter 4 Jump to: Chapter 6 →