bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kikuyu
/
Kikuyu Bible (IBUKU RĨRĨA ITHERU RĨA NGAI)
/
Acts 28
Acts 28
Kikuyu Bible (IBUKU RĨRĨA ITHERU RĨA NGAI)
← Chapter 27
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
1
NA twakĩrĩkia kũhonoka-rĩ, tũkĩmenya atĩ gĩthama kĩu gĩĩtagwo Melita.
2
Nao acenji akuo magĩtũgegia nĩ ũrĩa maatũtugire mũno, nĩ gũkorũo nĩmaatwakĩirie mwaki, na magĩtũgwata ithuothe ũgeni tondũ wa mbura ĩrĩa yoiraga, o na tondũ wa heho.
3
No rĩrĩ, Paulo aarĩkia kũũngania gakundi ga tũkũ, agĩtwĩkĩra riiko, hakiuma nduĩra nĩ ũndũ wa ũrugarĩ wa mwaki, ĩkĩmũrũma guoko ĩcuhĩte nakuo.
4
Nao acenji mona nyamũ ĩo ĩcunjurĩte guoko-inĩ gwake, makĩĩrana atĩrĩ, Ti-itherũ mũndũ ũyũ nĩ mũũragani, na o na aakorũo ahonokire iria-inĩ-rĩ, We ũrĩa ũrĩhanagĩria na kĩhooto ndetĩkĩrĩte atũũre muoyo.
5
Nowe Paulo akĩribaribĩra nyamũ ĩo mwaki-inĩ, na ndaigana kuona ũũru.
6
Nao magĩeterera, megereirie atĩ hihi nĩegũcoka kũimba, o na kana agũe thĩ o rĩmwe arĩ mũkuũ. No maaikara hĩndĩ ndaya metereire o ũguo, na matione ũndũ o na ũmwe wamũkora, makĩĩricũkwo, makĩmũtua ngai.
7
Na rĩrĩ, hakuhĩ na hau nĩhaarĩ ithaka cia mũndũ ũrĩa mũnene wa gĩthama kĩu, wetagwo Publio. Nake nĩaatũgwatire ũgeni, agĩtũtuga wega mĩthenya ĩtatũ ta tũrĩ arata ake.
8
Na gũgĩtuĩka atĩrĩ, atĩ ithe wa Publio agĩkorũo akomete e mũrũaru mũrimũ wa kũhiũha mwĩrĩ na kũharũo gatema. Nake Paulo agĩtonya harĩ we, akĩhoya Ngai, akĩmũigĩrĩra moko, akĩmũhonia.
9
Na gwekwo ũguo, o nao andũ arĩa angĩ maarĩ na mĩrimũ gĩthama-inĩ kĩu magĩũka makĩhonio.
10
Nao andũ akuo magĩtũhe iheo nyingĩ cia gũtuonia ũrĩa matũtĩĩte: na rĩrĩa twaitĩkire gũthiĩ na marikabu, magĩtwĩkĩrĩra indo iria twarĩ na bata nacio thĩinĩ wayo.
11
Na mĩeri ĩtatũ yathira-rĩ, tũgĩthiĩ tũhaicĩte marikabu ya Isikanderia, ĩrĩa yaikarĩte gĩthama-inĩ kĩu kĩmera kĩa heho, naruo rũũri rũrĩa yekĩrĩtwo rũarĩ rũa kuuga ũũ, “Tũhĩĩ twa Mahatha.”
12
Na twakinya Surakusa, tũgĩikara kuo mĩthenya ĩtatũ.
13
Na twoima kũu tũgĩthiĩ tũkĩrigicũkaga tũgĩkinya itũũra rĩĩtagwo Regio. Na thutha wa mũthenya ũmwe gũkĩgĩa rũhuho ruumĩte gũthini, naguo mũthenya ũyũ ũngĩ tũkĩroka gũkinya Puteoli.
14
Nĩkuo twonanire na ariũ a Ithe witũ amwe, nao magĩtũringĩrĩria tũikaranie nao matukũ mũgwanja: ũguo noguo tũgĩgĩcoka tũgĩkinya Roma.
15
Nao ariũ a Ithe witũ arĩa maarĩ kuo, rĩrĩa maaiguire ũhoro witũ, magĩũka gũtũthagania o nginya kĩng’ang’a-inĩ kĩrĩa gĩĩtagwo Kĩng’ang’a kĩa Apio, o na handũ hetagwo Nyũmba Ithatũ cia Ageni. Nake Paulo onana nao agĩcokeria Ngai ngatho, agĩikara omĩrĩirie.
16
Na twakinya Roma, Paulo akĩheo rũtha aikarage handũ mwanya, marĩ hamwe na mũthigari ũrĩa wamũrangagĩra.
17
Na gũgĩkinya atĩrĩ, matukũ matatũ maathira, agĩĩta arĩa maarĩ atongoria a Ayahudi macemanie nake. Nao maarĩkia kũgomana, akĩmera atĩrĩ, Ariũ a Ithe witũ, niĩ-rĩ, o na gwatuĩka gũtirĩ ũndũ mũũru ndekĩte andũ a rũrĩrĩ ruitũ, o na kana wa kũregana na irĩra cia maithe maitũ-rĩ, nĩndaneanirũo kũrĩ Aroma, ngĩrutwo Jerusalemu ndĩ muohe.
18
Nao maarĩkia gũtuĩria ũhoro wakwa, makĩenda kũndekia, nĩ ũndũ wa kwaga ũndũ wa gũtũma njũragwo.
19
No rĩrĩa Ayahudi maakararirie ituĩro rĩu, ngĩigua atĩ no kinya njokie cira riiko, ũgacirũo nĩ Kaisari: ĩndĩ ti atĩ ndarĩ na ũndũ wa gũthitaka andũ a rũrĩrĩ rũakwa naguo.
20
Ũndũ ũcio nĩguo watũmire ndĩmũthaithe mũũke tuonane na twaranĩrie. Nĩ gũkorũo kĩĩrĩgĩrĩro kĩrĩa gĩtũire kĩĩrĩgagĩrĩrũo nĩ Aisiraeli nokĩo gĩtũmĩte njikarage ndĩ muohe na mũnyororo ũyũ.
21
Nao makĩmwĩra atĩrĩ, Ithuĩ tũtirĩ twona marũa moimĩte Judea me na ũhoro waku, o na kana hagĩũka gũkũ mũndũ o na ũmwe wa ariũ a Ithe witũ atũhe ũhoro waku kana agũcuke.
22
No rĩrĩ, tũkwenda kũigua harĩ wee ũrĩa ũgwĩciria. Tondũ ha ũhoro wa thiritũ ĩo, nĩtũũĩ atĩ nĩĩthahagĩrĩrio kũndũ guothe.
23
Nao maarĩkia gwathana gĩathĩ nake, magĩũka gĩkundi kĩnene kũrĩ we handũ harĩa aaikaraga; agĩgĩtinda kuuma rũcinĩ kinya hwaĩ-inĩ akĩmataũragĩra ũrutani ũcio, akamoimbũragĩra ũhoro wa ũthamaki wa Ngai, akamaringagĩrĩria metĩkie ũhoro wa Jesu, akĩheanaga ihooto ciumĩte watho-inĩ wa Musa, o na mabuku-inĩ ma anabii.
24
Na amwe ao magĩĩtĩkia mohoro marĩa maaheanirũo, na amwe makĩaga gwĩtĩkia.
25
Na rĩrĩa maagire kũiguanĩra ũhoro ũcio o ene, magĩgĩthiĩ, Paulo aarĩkia kũmahe ũhoro ũyũ ũmwe atĩrĩ, Ti-itherũ ũhoro ũrĩa Roho Mũtheru aarĩirie maithe manyu na kanua ka Isaia warĩ wa ma,
26
rĩrĩa oigire atĩrĩ, Thiĩ kũrĩ andũ aya ũkamere atĩrĩ, Kũigua nĩmũkaiguaga na mũtikanamenye ũndũ, Na kuona nĩmũkonaga, o na mũtikanakuũke:
27
Nĩ ũndũ ngoro cia andũ aya nĩ ngingitaru, Na matũ mao nĩ nginini, Ningĩ maitho mao nĩmamahingĩte; Matikae kuona na maitho, Kana maigue na matũ, Na mamenye na ngoro, Macoke magarũrũke, Na niĩ ndĩmahonie.
28
Tondũ ũcio-rĩ, menyai atĩ ũhoro ũyũ wa Ngai wa kũhonokania nĩũtũmĩtwo kũrĩ andũ arĩa a Ndũrĩrĩ ingĩ: nao nĩmarĩũiguaga.
29
[Na aarĩkia kwaria ũguo, Ayahudi magĩĩthiĩra, magĩkararanagia mũno o ene.]
30
Nake Paulo agĩikara mĩaka ĩĩrĩ mĩgima nyũmba ĩrĩa aakomborete we mwene; nao andũ arĩa othe maathiaga kũrĩ we akametĩkagĩria matonye,
31
akamahunjagĩria ũhoro wa ũthamaki wa Ngai, akamarutaga maũndũ ma Mwathani Jesu Kristo omĩrĩirie mũno, hatarĩ mũndũ ũngĩmũgiria.
← Chapter 27
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28