Acts 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to: Chapter 4 →

1NA rĩrĩ, thaa ya kũhoya yakinya, nĩyo thaa kenda-rĩ, Petero na Johana magĩkorũo makĩambata matonye hekarũ.

2Na rĩrĩ, mũndũ wathuaga kuuma o aaciarũo nĩaakuuagwo o mũthenya o mũthenya akaigwo kĩhingo-inĩ kĩa hekarũ kĩrĩa gĩĩtagwo kĩrĩa Gĩthaka, nĩ getha ahoyage thendi kũrĩ andũ arĩa maatonyaga hekarũ;

3nake aakĩona Petero na Johana matuĩte gũtonya hekarũ, akĩmahoya thendi.

4Nake Petero, marĩ hamwe na Johana, akĩmũkũũrĩra maitho akĩmwĩra atĩrĩ, Ta tũrore.

5Nake agĩĩtĩkĩra kũmarora erĩgĩrĩire atĩ nĩekũheo kĩndũ nĩo.

6Nake Petero akĩmwĩra atĩrĩ, Betha na thahabu-rĩ, hatirĩ ndĩ nacio, ĩndĩ kĩrĩa ndĩ nakĩo nĩkĩo ngũkũhe. Atĩrĩ, thĩinĩ wa rĩĩtwa rĩa Jesu Kristo wa Nazarethi, wĩtware.

7Akĩmũgwata guoko kwa ũrĩo akĩmũũkĩria; na kahinda o kau makinya o na thũng’wa cia magũrũ make ikĩgĩa na hinya.

8Nake akĩguthũka akĩrũgama akĩambĩrĩria gwĩtwara; agĩtonya hekarũ hamwe nao etwarĩte, akĩrũũgarũũgaga na akĩgathaga Ngai.

9Nao andũ othe makĩmuona agĩĩtwara na akĩgathaga Ngai:

10na makĩmenya atĩ nĩwe ũrĩa waikaraga kĩhingo-inĩ kĩu Gĩthaka kĩa hekarũ akĩhoyaga thendi. Magĩkĩgegeara, mamakĩte nĩ ũndũ wa ũguo mũndũ ũcio ekirũo.

11Nake aaikara o enyitĩrĩire Petero na Johana, andũ othe makĩrũrũngana harĩ o gĩthaku-inĩ kĩrĩa gĩĩtagwo gĩthaku gĩa Solomoni, magegete mũno.

12Na rĩrĩa Petero onire ũhoro ũcio, agĩcokeria kĩrĩndĩ atĩrĩ, Andũ aya a Isiraeli, mũkũgega nĩkĩ nĩ ũndũ wa mũndũ ũyũ? Na nĩ kĩ gĩgũtũma mũtũcũthĩrĩrie ta arĩ ithuĩ twatũma etware na hinya witũ ithuĩ ene kana ũtheru witũ?

13Ngai wa Iburahimu, na wa Isaaka, na wa Jakubu, o we Ngai wa maithe maitũ-rĩ, nĩwe wagoocithia ndungata yake Jesu, o ũcio inyuĩ mwaneanire na mũkĩmũkaana mbere ya Pilato, hĩndĩ ĩrĩa aatuĩte atĩ amuohore.

14Ũcio Mũtheru na Mũthingu-rĩ, nĩwe inyuĩ mwakaanire, mũkĩhoya atĩ muohorerũo mũũragani,

15mũgĩkĩũragithia Mũthamaki ũrĩa mũheani muoyo. Nake nĩwe Ngai aariũkirie oime kũrĩ arĩa akuũ: na nĩ ithuĩ aira a ũhoro ũcio.

16Na tondũ wa gwĩtĩkia rĩĩtwa rĩake-rĩ, rĩĩtwa o ro rĩu nĩrĩo rĩatuma mũndũ ũyũ agĩe na hinya, o ũyũ mũkuona na mũmũũĩ: naguo wĩtĩkio ũrĩa uumanĩte na Jesu, nĩguo watũma mũndũ ũyũ aheo ũgima ũyũ wothe wa mwĩrĩ, inyuothe mũkĩĩonagĩra.

17Na rĩu-rĩ, ariũ a Ithe witũ, nĩnjũĩ atĩ mwekire ũguo nĩ ũndũ wa kũrigwo, o ta ũrĩa anene anyu nao mekire.

18No rĩrĩ, mohoro marĩa Ngai aamenyithanirie o mbere na tũnua twa anabii othe, ma atĩ Kristo wake nĩakanyarirĩka, nĩmo ahingĩtie ũguo.

19Nĩ ũndũ ũcio-rĩ, wĩrirei na mũgarũrũke, nĩ getha mehia manyu marihũrũo, na hacoke hagĩe mahinda ma kũrurumũkio moimĩte kwĩ Mwathani;

20na ningĩ nĩ getha arekie Kristo ũrĩa ũtuĩtwo wanyu, nĩwe Jesu.

21Nake no kinya aiyũkio aikare Igũrũ mũira wa mahinda magakinya marĩa indo ciothe ikerũhio, o marĩa Ngai aaririe ũhoro wamo na tũnua twa anabii ake atheru, arĩa maanagĩa kuo kuuma o kĩambĩrĩria-inĩ.

22Ti-itherũ Musa nĩoigire atĩrĩ, Mwathani Ngai nĩakamũũkĩrĩria mũnabii ũhaana o ta niĩ, oime harĩ ariũ a thoguo; nĩwe mũkaiguaga mohoro-inĩ mothe marĩa akamwaragĩria.

23Na nĩgũgatuĩka atĩrĩ, atĩ mũndũ o wothe ũrĩa ũtakaigua mũnabii ũcio, nĩakaninwo biũ, eherio kũrĩ kĩrĩndĩ.

24Ti-itherũ anabii othe, kuuma Samueli na gwata arĩa othe maacokire gũũka thutha, othe arĩa maanaheana ũhoro-rĩ, nĩmaarathire ũhoro wa matukũ maya o nao.

25Inyuĩ-rĩ, nĩ inyuĩ ariũ a anabii, o na andũ a kũgaĩrũo kĩrĩkanĩro kĩrĩa Ngai aarĩkanĩire na maithe manyu, rĩrĩa erire Iburahimu atĩrĩ, Nayo mĩhĩrĩga yothe ya thĩ nĩĩkarathimwo nĩ ũndũ wa mbeũ yaku.

26Na inyuĩ nĩ inyuĩ Ngai aambire gũtũmĩra Ndungata yake, aarĩkia kũmĩũkĩria, nĩ getha imũrathime, nĩ kũmũgarũra o mũndũ o mũndũ mũtigane na mahĩtia manyu.

← Chapter 2 Jump to: Chapter 4 →