Amos 5

Kikuyu Bible (IBUKU RĨRĨA ITHERU RĨA NGAI)

← Chapter 4 Jump to: Chapter 6 →

1Ta iguai ũhoro ũyũ wa mũcakaĩko ngũmũinĩra, inyuĩ mbarĩ ya Isiraeli.

2Mũirĩtu ũyũ gathirange, ti Isiraeli, nĩagũĩte; ndangĩcoka gũũkĩra: akomete thĩ o gĩthaka kĩao e mũte; akaaga wa kũmũũkĩria.

3Nĩ amu-rĩ, Mwathani Jehova ekuuga ũũ: Itũũra rĩrĩa rĩoimagarire andũ ngiri no andũ igana magatigara, na rĩrĩa rĩoimagarire andũ igana rĩtigare o andũ ikũmi, arĩa magagĩtigara a mbarĩ ya Isiraeli.

4Tondũ-rĩ, Jehova ekwĩra mbarĩ ya Isiraeli ũũ: Nongoriai arĩ niĩ, na nĩmũgũtũũra muoyo:

5no rĩrĩ, tigai kũrongoria Beth-eli, kana mũtonye Giligali, o na kana mũkĩre na Birishiba: amu a Giligali matirĩ hingo matagatahwo mathamio, nakuo Beth-eli gũtuĩke gwa tũhũ.

6Kĩrongoriei Jehova, na nĩmũgũtũũra muoyo; ndakae gũtũrĩkĩra mbarĩ ya Jusufu ta mwaki, ũmarambie, na kũu Beth-eli kwage ũngĩhota kũũhoria:

7inyuĩ o inyuĩ mũgarũranagia mũcirĩre wa kĩhooto ũkarũra ta mũgũta, ũthingu mũgakĩũrangĩrĩria na thĩ-rĩ,

8kĩrongoriei ũcio mũũmbi wa njata iria ciĩtagwo Kĩrĩmĩra, na Karau, ũrĩa ũgarũranagia nduma ĩrĩa ndumanu ĩgatuĩka rũcinĩ, ningĩ agatũma mũthenya ũtuĩke ũtukũ; o ũrĩa-ni wĩtaga maĩ ma iria rĩrĩa inene akamaitũrũra thĩ; Jehova nĩrĩo rĩĩtwa rĩake;

9o we ũrĩa ũtũmaga wanangi ũhobanĩrie andũ arĩa njamba ta rũheni, kwanangĩka gũgagĩkorerera gĩtũũro kĩrĩa kĩirige.

10O nĩ gũthũũra mathũũraga ũrĩa ũkaananagia maũndũ thome-inĩ; ũrĩa waragia ũhoro mwerekereru-rĩ, magakĩmũnyira.

11Tondũ wa ũguo, kuona atĩ nĩmũrangagĩrĩria mũndũ mũhũthũ, na mũkamwĩtagia ngano ya maruta-rĩ, nyũmba icio mwĩakĩire na mahiga maacũhie mũtikĩrĩ hingo mũgacitũũra, na mĩgũnda ĩo mĩega mũhandĩte mĩthabibu mũtirĩ hingo mũkanyua ndibei yayo.

12Nĩ amu nĩnjũĩ mehia manyu ũrĩa maingĩhĩte, na mahĩtia manyu ũrĩa manenehete, o inyuĩ mũthĩnagia ũrĩa mũthingu, na mũgetĩkagĩria mũndũ arute indo cia gwĩkũũra, nao arĩa aagi maacira thome-inĩ mũkamahetahetaga matigatuĩrũo wega.

13Tondũ ũcio mũndũ ũrĩa mũbacĩrĩri no gwĩkirĩra ki hingo ta ĩo; amu nĩ hingo njũru.

14Rongoriai maũndũ marĩa mega, tiga marĩa moru, nĩ getha mũtũũre muoyo; na mweka ũguo, Jehova, o we Ngai mwene mbũtũ cia ita, nĩagatũũrania na inyuĩ, o ta ũrĩa mũtũire muugaga.

15Gĩthũũrei ũũru, na mwendage wega, na thome-inĩ mũhande mũcirĩre ũrĩa wa kĩhooto: ũguo no gũtuĩka atĩ Jehova, we Ngai mwene mbũtũ cia ita, nĩagakinyĩria mbarĩ ya Jusufu wega wake, arĩa magakorũo matigaire.

16Nĩ ũndũ ũcio, Jehova, Ngai mwene mbũtũ cia ita, o we Mwathani, ekuuga atĩrĩ, Ing’aratua-inĩ ciothe gũkaiyũra o mũcakayo, gũkiugagwo njĩra-inĩ ciothe Ĩya-ĩ! Ĩya-ĩ! Na mũrĩmi mũgũnda etwo arĩrithanie, na gwĩtwo njorua iria cia mwĩnihũro ciũke icakaithanie.

17Ningĩ gwata mĩgũnda-inĩ yothe ya mĩthabibu gũkaiyũra o mũcakayo: nĩ amu niĩ-rĩ, nĩngatuĩkanĩria gatagatĩ-inĩ kanyu; ũguo nĩguo Jehova ekuuga.

18Mũtino, kaĩ nĩ inyuĩ mũkwĩrirĩria mũthenya wa Jehova! mũthenya ũcio wa Jehova mũkũwendera kĩ? amu nĩ wa nduma, ti wa ũtheri.

19Nĩ ta mũndũ akĩũrĩra mũrũthi, agatũngwo nĩ nyamũ ĩrĩa ĩĩtagwo nduba; ningĩ aatonya nyũmba na egwatĩrĩra rũthingo na guoko, akarũmwo nĩ nyamũ-ya-thĩ.

20Kaĩ mũthenya wa Jehova ũtagagĩtuĩka o nduma, na ti ũtheri; o nduma ĩrĩa nene, gũtarĩ na gotheri?

21Ciathĩ cianyu iria mũthiaga nĩndĩcithũire na ngacirega, mĩcemanio yanyu ya kũruta magongona ndingĩĩtĩkĩra kũnungĩra mũcingũ wayo.

22Ĩĩ, o na mwa’haka na mahaki manyu ma njino, o na mahaki ma irio, ndingĩmetĩkĩra; kana nũmbũiye mahaki manyu ma gũcokia ngatho ma ũhiũ ũrĩa mũtuĩrĩire.

23Ta ’thengeriai kĩrurumĩ kĩa nyĩmbo cianyu; nĩ amu inanda icio cianyu cia mũgeto ndingĩĩtĩkĩra kũigua mũgambo wacio.

24No rĩrĩ, rekei mũcirĩre ũrĩa wa kĩhooto arĩ guo ũikũrũkage o ta maĩ, naguo ũthingu ũgĩikũrũkage o ta rũũĩ rũtahũaga.

25Anga magongona na mahaki nĩmo mwandutagĩra hĩndĩ ĩrĩa mwatũire werũ-inĩ mĩaka mĩrongo ĩna, inyuĩ mbarĩ ya Isiraeli?

26Nĩ rĩrĩ, nĩ kuoya mũkoya Sikuthu mũthamaki wanyu, o na Kiwuni njata ĩrĩa, ngai yanyu, mĩhianano yanyu o ĩo mwĩthondekeire:

27na nĩngamũtahithia mũtwarũo o mbere ya Dameski; ũguo nĩguo Jehova ekuuga, ũrĩa wĩtagwo Ngai mwene mbũtũ cia ita.

← Chapter 4 Jump to: Chapter 6 →