Deuteronomy 13

Kikuyu Bible (IBUKU RĨRĨA ITHERU RĨA NGAI)

← Chapter 12 Jump to: Chapter 14 →

1Kũngĩkoneka mũnabii kana mũroti wa iroto thĩinĩ wanyu, nake arathe ũhoro kana aringe kĩama,

2naguo ũhoro ũcio arathĩte woneke, kana kĩama kĩu aringĩte gĩĩkĩke, agĩcoke akwĩre atĩrĩ, Nĩtũthiĩ tũrũmĩrĩre ngai ingĩ tũcitungatĩre, o iria wee ũtamenyete ũhoro wacio,

3ndũkanathikĩrĩrie ndeto cia mũnabii ũcio, kana cia mũroti ũcio wa iroto; nĩ gũkorũo Jehova Ngai waku, nĩ kũgeria aramũgeria amenye kana nĩmwendaga Jehova Ngai wanyu na ngoro cianyu ciothe, o na mĩoyo yanyu yothe.

4Inyuĩ-rĩ, rũmagĩrĩrai o Jehova Ngai wanyu, na mumwĩtigagĩre, na mũmenyagĩrĩre maathani make, mũiguage uuge wake, na mũmũtungatagĩre, na mwĩgwatanie nake.

5Nake mũnabii ũcio, kana mũroti ũcio wa iroto, nĩakoragwo; nĩ gũkorũo nĩaarĩtie ndeto cia kũhenereria andũ mareme Jehova Ngai wanyu, ũrĩa wamũrutire bũrũri wa Misiri, na agĩgũkũũra uume nyũmba ya ũkombo; nĩguo ũgucĩrĩrio, ũhũgũrũo, nĩ getha ũtige gũthiĩ na njĩra ĩrĩa Jehova Ngai waku aagwathire ũthiagĩre. Ũguo nĩguo ũrĩeheragia ũũru ũrĩa wĩ thĩinĩ waku.

6Atĩrĩrĩ, mũrũ wa nyũkwa cono, kana mũrũguo, kana mwarĩguo, kana mũtumia waku ũrĩa wendete mũno, o na kana mũrataguo ũrĩa muumĩranĩtie ngoro nake, angĩkũhenereria na hitho akwĩre atĩrĩ, Nĩtũthiĩ tũgatungatĩre ngai ingĩ tũcihoe, o iria ũtamenyete ũhoro wacio, wee mwene, kana mathoguo,

7o ngai cia ndũrĩrĩ iria ikũrigicĩirie, o na ingĩtuĩka nĩigũkuhĩhĩirie kana igakũraihĩrĩria kuuma gĩturi kĩmwe gĩa thĩ o nginya kĩrĩa kĩngĩ kĩayo-rĩ,

8ndũkanetĩkĩre ũhoro ũcio wake, kana ũmũthikĩrĩrie, o na kana riitho rĩaku rĩmũiguĩre tha, kana ũmũcaĩre, kana ũmũhithĩrĩre;

9no rĩrĩ, ndũrĩ hingo ũtakamũũraga; guoko gwaku nĩkuo gũkamwambia mũtĩ kũmũũrage, na thutha wa ũguo acokererũo nĩ moko ma andũ acio angĩ othe.

10Ũkĩmũhũre na mahiga nyuguto, nĩguo akue, nĩ gũkorũo nĩageretie gũkũgucĩrĩria ũtigane na Jehova Ngai waku, ũrĩa wakũrutire bũrũri wa Misiri, uume nyũmba ya ũkombo.

11Nao Aisiraeli othe nĩmakaigua ũhoro ũcio, magĩĩtigĩre, na maticoke gwĩka ũndũ wa waganu ta ũcio thĩinĩ wanyu o na rĩ.

12Ningĩ ũngĩkaigua ũhoro ũkĩheanwo ũkoniĩ itũũra rĩmwe rĩa matũũra maku marĩa Jehova Ngai waku akũheaga ũtũũre kuo, gũkĩĩranwo atĩrĩ,

13Andũ amwe aaganu mũno nĩmoimĩte thĩinĩ wanyu, nao makagucĩrĩria andũ a itũũra rĩu rĩao, makamera atĩrĩ, Nĩtũthiĩi tũgatungatĩre ngai ingĩ, iria inyuĩ mũtaamenyete ũhoro wacio;

14ũhoro ũcio nĩũgakĩũtuĩria o na ũũthuthurie, na ũũrĩrĩrie na kĩyo na rĩrĩ, ũngĩgatuĩka nĩ wa ma, o ma, na gũkorũo nĩkũruĩrĩirũo atĩ ũndũ wĩ thahu mũno ũguo nĩwĩkagwo thĩinĩ wanyu-rĩ,

15ndũrĩ hingo ũtagakĩhũra andũ a itũũra rĩu na hiũ cia njora, ũnine itũũra rĩu o kũrĩnina biũ, hamwe na indo ciothe iria irĩ kuo, o na ng’ombe iria irĩ kuo ũcinine na hiũ cia njora.

16Nacio indo ciothe iria itahĩtwo kuo ũcicokererie njĩra-inĩ yarĩo gatagatĩ; narĩo itũũra rĩu rĩo rĩene, na indo icio ciothe itahĩtwo kuo, ũciamũrĩre Jehova Ngai waku, ũmũcinĩre; narĩo itũũra rĩu rĩtũũre rĩtuĩtwo kĩhumbu kĩa mũhu tene na tene, na rĩtikanacoke gwakwo.

17Na rĩrĩ, gũtirĩ kĩndũ o na kĩmwe kĩa indo icio ciamũrĩtwo cia kũninwo ũkagwatania guoko gwaku nakĩo, nĩ getha Jehova agarũrũke atige gũcinwo nĩ marakara manene, no acoke gũkũiguĩra tha, o na agwĩke maũndũ ma ũtugi, o na akũingĩhie, o ta ũrĩa erĩire mathoguo na mwĩhĩtwa atĩ nĩageka,

18hĩndĩ ĩrĩa ũgakorũo ũiguĩte uuge wa Jehova Ngai waku, na ũkorũo ũmenyereire maathani make mothe marĩa ngũgwatha ũmũthĩ, wĩkage maũndũ marĩa monagwo maagĩrĩire nĩ Jehova Ngai waku.

← Chapter 12 Jump to: Chapter 14 →