Ephesians 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to: Chapter 4 →

1NĨ ũndũ ũcio-rĩ, niĩ Paulo, mũndũ muohe wa Kristo Jesu nĩ ũndũ wanyu, inyuĩ andũ a Ndũrĩrĩ, -

2mũngĩgĩkorũo nĩmũiguĩte ũhoro wa ũramati wa Wega wa Ngai ũrĩa ’heetwo nĩ ũndũ wanyu,

3na mũgakorũo nĩmũiguĩte ũrĩa ndamenyithirio ũhoro ũrĩa wa hitho nĩ ũndũ wa kũguũrĩrio nĩ Ngai, o ta ũrĩa ndamwandĩkĩire o kabere na ciugo itarĩ nyingĩ;

4na nĩ ũndũ wa ciugo icio, mwacithoma, nĩmũkũhota kũmenya ũrĩa ndakuũkire ũhoro-inĩ ũcio wa hitho wa Kristo;

5o ũcio ũtonirio ciana cia kĩrĩndĩ hĩndĩ ya njiaro ingĩ, ta ũrĩa rĩu ũrĩkĩtie kũguũrĩrio atũmwo ake atheru o na anabii nĩ Roho.

6Naguo nĩ ũyũ, atĩ andũ a Ndũrĩrĩ nĩmatuĩkĩte agai hamwe na ithuĩ, na ningĩ a mwĩrĩ ũmwe na ithuĩ, magagĩtuĩka a ngwatanĩro ĩmwe na ithuĩ ũhoro-inĩ wa kĩĩranĩro kĩrĩa kĩarehirũo nĩ Kristo Jesu na ũndũ wa kũhunjanĩria Ũhoro-ũrĩa-Mwega.

7Naguo Ũhoro ũcio nĩguo ndatuirũo ndungata yaguo, nĩ ũndũ wa kĩheo kĩrĩa ndaheirũo kĩa Wega wa Ngai, o ta ũrĩa ũhoti wake ũhotithanagia.

8Nĩ niĩ ndaheirũo Wega ũcio wa Ngai, o niĩ ũrĩa mũnyinyi mũno wa arĩa othe aamũre, nĩ getha ’hunjagĩrie Ndũrĩrĩ iria ingĩ ũhoro wa ũtonga wa Kristo ũrĩa ũtangĩtuĩrĩka;

9na nĩ getha andũ othe mataũkĩrũo nĩ mũguũranĩrie wa ũhoro ũrĩa wa hitho, o ũrĩa ũgacoka kũguũranĩrio, o ũhoro ũcio watũire kuuma o tene tene hitho-inĩ ya Ngai ũrĩa wombire indo ciothe;

10na nĩguo atĩ ũũgĩ wa Ngai ũrĩa wa mĩthemba mĩingĩ ũmenyithagio rĩu anene arĩa marĩ o kũrĩa Igũrũ, o na arĩa marĩ na hinya kuo, na njĩra ya kanitha,

11kũringana na ũrĩa aatũire atanyĩte gwĩka kuuma o tene e thĩinĩ wa Kristo Jesu Mwathani witũ.

12Ũcio-rĩ, nĩwe ũtũũmagĩrĩria na agatũhotithia gũkinya harĩ Ngai tũtegwĩtigĩra, nĩ ũndũ wa ũrĩa tũmwĩhokete.

13Nĩ ũndũ wa ũguo-rĩ, ndamũthaitha mũtikae kũũrũo nĩ hinya nĩ ũndũ wa maũndũ marĩa ’nyariragwo namo nĩ ũndũ wanyu, amu nĩmo matũmaga mũgĩe na gĩtĩo.

14Ũndũ ũcio nĩguo ũtũmaga ndurĩrie Ithe witũ ndu,

15o we ũrĩa ũhoro wothe wa gwĩtwo baba wĩtanĩtio nake kũrĩa Igũrũ o na gũkũ thĩ-rĩ,

16ngamũhoya atĩ, kũringana na ũrĩa riri wake ũingĩhĩte-rĩ, etĩkĩre kũmwĩkĩra hinya o mũndũ, nĩguo mũndũ wanyu wa na thĩinĩ agĩe na ũhoti nĩ ũndũ wa kũheo Roho wake;

17ningĩ atĩ Kristo atũũrage ngoro-inĩ cianyu nĩ ũndũ wa ũrĩa mwĩtĩkĩtie, nĩ getha mũhandwo mũgĩe na mĩri thĩinĩ wa wendani, na mũgaakwo gĩtina-inĩ kĩaguo;

18na tondũ ũcio, mũrĩ hamwe na andũ arĩa othe aamũre, mũhotithio kwĩgwatĩra wega wendani wa Kristo, ũrĩa waramĩte na ũrĩa ũraihĩte, na ũrĩa ũthiĩte na igũrũ na ũrĩa ũrikĩte na thĩ,

19na mũũmenye wega, o wendani ũcio ũkĩrĩte kũmenya guothe, nĩ getha mũiyũrio ũiyũru wothe wa Ngai.

20Na rĩrĩ, we ũrĩa ũhotaga gwĩka maũndũ na agakĩrĩrĩria mũno mũno marĩa mothe tũhoyaga o na marĩa twĩciragia, nĩ ũndũ wa ũhoti wake ũrĩa ũrutaga wĩra thĩinĩ witũ-rĩ,

21o we ũcio arogoocagwo thĩinĩ wa kanitha, na thĩinĩ wa Kristo Jesu, o nginya njiaro-inĩ ciothe, tene na tene. Amen.

← Chapter 2 Jump to: Chapter 4 →