Ephesians 6

Kikuyu Bible (IBUKU RĨRĨA ITHERU RĨA NGAI)

← Chapter 5 Jump to:

1INYUĨ ciana-rĩ, athĩkagĩrai aciari anyu mwĩ thĩinĩ wa Mwathani: nĩ gũkorũo gwĩka ũguo nĩkuo kwagĩrĩire.

2Tĩa thoguo na nyũkwa, (rĩu nĩrĩo rĩathani rĩa mbere rĩrĩa rĩĩ na kĩĩranĩro)

3nĩ getha maũndũ maku magaacĩre, na ũtũũre hĩndĩ ndaya gũkũ thĩ.

4Na inyuĩ maithe-rĩ, mũtikanarakarie ciana cianyu, no kũrera mũcirerage na mũrutanĩre o na mũtaarĩre ũrĩa wa Mwathani.

5Inyuĩ mũrĩ ngombo-rĩ, athĩkagĩrai aathani arĩa mamwathaga ũhoro-inĩ wa mwĩrĩ, na mũmetigagĩre mũkĩinainaga, mũtarĩ na ũhinga ngoro-inĩ, o ta arĩ Kristo mwathĩkagĩra.

6Mũtikanarute wĩra o hĩndĩ ĩrĩa mekũmũrora, o ta mũgwĩcukumithania nao; no rĩrĩ, mũrutage wĩra ta mũrĩ ngombo cia Kristo, mũgĩĩkaga maũndũ marĩa Ngai endaga mekwo, mwĩendeire na ngoro;

7ningĩ mũrutage wĩra wanyu wa ngombo mũtarĩ na kĩnyiria, ta arĩ Mwathani mũratungatĩra, ti andũ;

8mũkĩmenyaga atĩ o ũndũ ũrĩa wothe mwega o mũndũ ekaga, arĩ o ngombo, kana atarĩ ngombo-rĩ, nĩakagwata o kũringana naguo harĩ Mwathani.

9O na inyuĩ aathani-rĩ, ĩkagai ngombo cianyu o ũguo, na tigagai gũciĩhĩtĩra, mũkĩririkanaga atĩ Mwathani wao, na nowe Mwathani wanyu, arĩ o kũu Igũrũ, nake-rĩ, ndatĩagĩra andũ maũthĩ.

10Ũhoro wa kũrigĩrĩria nĩ atĩrĩ, gĩagai na hinya thĩinĩ wa Mwathani, mũkĩhotithagio na ũhoti wake.

11Wĩohei indo ciothe cia Ngai cia ita, nĩ getha mũhote gwĩtiiria mawara ma mũcukani.

12Nĩ ũndũ kũgiana gwitũ ti gwa kũgiana na arĩa me na mwĩrĩ na thakame, no nĩ gwa kũgiana na mothamaki, o na mahinya, o na arĩa maathanaga thĩ ĩno ĩĩ na nduma, o na mbũtũ cia maroho moru me kũrĩa igũrũ.

13Nĩ ũndũ ũcio-rĩ, oyai indo ciothe cia Ngai cia ita, nĩ getha mũkahota gwĩtiiria mũthenya ũrĩa gũkarũra; na mwarĩkia gwĩka maũndũ macio mothe, no mwĩhande.

14Nĩ ũndũ ũcio kĩĩhandei, mwĩhotorete ũhoro-wa-ma, na mwĩohete gako ga kũgitĩra gĩthũri, karĩa ga ũthingu,

15o na mwĩkĩrĩte magũrũ manyu ũhoro wa kwĩhaarĩrĩria Ũhoro-ũrĩa-Mwega wa thayũ;

16ningĩ gũkĩra icio ciothe-rĩ, muoe ngo ya wĩtĩkio, ĩrĩa mũrĩhotaga kũhoria nayo mĩguĩ ĩrĩa ĩĩ mwaki ya ũrĩa mũũru.

17Na ningĩ, ĩkĩrai gĩtukũ kĩrĩa kĩa ũhonokio, na mwĩohe rũhiũ rũrĩa rũa Roho, naruo nĩruo Ũhoro wa Ngai.

18O na kũhoya mũhoyage mũno mũgĩthaithanagĩrĩra hingo ciothe, mũrĩ na Roho: na mũgĩĩkaga ũguo-rĩ, mũikarage mwĩhũgĩte na kĩyo kĩnene, mũgĩthaithanagĩrĩra andũ arĩa aamũre othe.

19O na niĩ mwene-rĩ, mũ’thaithanagĩrĩre nĩ getha ’heo ũhoro wa kwaria o hĩndĩ ĩrĩa ngũtumũra kanua, ’heanage nyũmĩrĩirie maũndũ marĩa ma hitho ma Ũhoro-ũrĩa-Mwega;

20naguo nĩguo ndĩ mwarĩrĩria waguo, njohetwo na mũnyororo. ’Hoyagĩrai nĩ getha ndĩũheanage nyũmĩrĩirie o ta ũrĩa ingĩagĩrĩrũo nĩ kũũheana.

21Na rĩrĩ, nĩ getha o na inyuĩ mũmenye ũhoro wakwa, na ũrĩa ndũire njĩkaga-rĩ, Tukiko, mũrũ wa Ithe witũ ũrĩa mwende, o na ningĩ ndungata ĩĩhokekete wĩra-inĩ wa Mwathani, nĩwe ũkũmũmenyithia maũndũ mothe.

22Na ndĩmũtũmĩte kũrĩ inyuĩ nĩ ũndũ wa ũhoro ũyũ kĩũmbe, atĩ mũmenye ũhoro witũ ũrĩa tũtariĩ, na nĩ getha amũũmĩrĩrie ngoro.

23Thayũ ũrogĩa kũrĩ ariũ a Ithe witũ, o na wendani hamwe na wĩtĩkio, ciumĩte kwĩ Ngai Ithe witũ, o na kwĩ Mwathani Jesu Kristo.

24Wega wa Ngai ũrogĩa na arĩa othe mendaga Mwathani witũ Jesu Kristo na wendani ũrĩa ũtathiraga.

← Chapter 5 Jump to: