Galatians 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to: Chapter 4 →

1ATĨRĨRĨ, inyuĩ Agalatia aya aritu, kaĩ mũrogetwo nũ, o inyuĩ mwonithirio wega Jesu Kristo e mwambe mũtĩ igũrũ?

2Ngwenda mũ’menyithie ũndũ ũyũ ũmwe, atĩrĩ, Mwaheirũo Roho na ũndũ wa maũndũ marĩa maathane nĩ watho, kana na ũndũ wa kũigua ũhoro na kũwĩtĩkia?

3Githĩ mũkĩrĩ aritu ũũ? Ũhoro ũrĩa mwaambĩrĩirie mũrĩ na Roho, kaĩ rĩu mũkũũrigĩrĩria na mwĩrĩ?

4Anga mwananyamario na maũndũ maingĩ ũũ o tũhũ? Kũngĩgĩkorũo ti-itherũ no tũhũ.

5Nĩ ũndũ wa ũguo, we ũrĩa ũmũheaga Roho, na akaringaga ciama thĩinĩ wanyu-rĩ, ekaga maũndũ macio nĩ ũndũ wa ũrĩa mwĩkaga maũndũ marĩa maathane nĩ watho, kana nĩ ũndũ wa ũrĩa mũiguaga ũhoro mũkawĩtĩkia?

6O ta ũrĩa Iburahimu etĩkirie Ngai, naguo ũhoro ũcio agĩtuĩrũo ta arĩ ũthingu e naguo.

7Nĩ ũndũ ũcio-rĩ, menyai wega atĩ andũ arĩa etĩkia nĩo ciana cia Iburahimu.

8Na tondũ wa ũrĩa kwamenyekete o mbere atĩ Ngai nĩagatua andũ a Ndũrĩrĩ athingu nĩ ũndũ wa gwĩtĩkia-rĩ, Maandĩko ma Ngai nĩmaahunjĩirie Iburahimu Ũhoro-ũrĩa-Mwega o mbere, makiuga atĩrĩ, Ndũrĩrĩ ciothe nĩikarathimwo nĩ ũndũ waku.

9Nĩ ũndũ wa ũguo, andũ othe etĩkia nĩmarathimanagĩrio na Iburahimu, ũcio warĩ mwĩtĩkia.

10Amu-rĩ, andũ arĩa othe marũmagia maũndũ marĩa maathane nĩ watho maikaraga na kĩrumi. Nĩ gũkorũo kwandĩkĩtwo ũũ, Kũgwatwo nĩ kĩrumi-rĩ, nĩ mũndũ o wothe ũtarĩrũmagia maũndũ mothe marĩa maandĩke ibuku-inĩ rĩa watho amekage.

11Na rĩrĩ, ũndũ ũyũ nĩ mũmenyeku wega, atĩ gũtirĩ mũndũ ũngĩtuwo mũthingu mbere ya Ngai nĩ ũndũ wa ũrĩa arũmagia watho: nĩ ũndũ nĩkwandĩkĩtwo atĩrĩ, Mũndũ ũrĩa mũthingu agatũũrio muoyo nĩ ũndũ wa gwĩtĩkia;

12naguo watho nduumanĩte na wĩtĩkio; no rĩrĩ, kwandĩkĩtwo atĩrĩ, Mũndũ ũrĩa ũrũmagia maũndũ ma watho nĩagatũũrio muoyo nĩmo.

13Kristo nĩaatũkũũrire harĩ kĩrumi kĩrĩa kiumanĩte na watho, nĩ ũndũ wa ũrĩa aagwatirũo nĩ kĩrumi kĩu ithenya riitũ; nĩ gũkorũo kwandĩkĩtwo ũũ, Mũndũ ũrĩa ũcuurĩtio mũtĩ igũrũ nĩ mũrũme:

14nĩ getha kĩrathimo kĩrĩa Iburahimu aarathimirũo nakĩo gĩkinyĩrĩre andũ a Ndũrĩrĩ iria ingĩ thĩinĩ wa Kristo Jesu; nĩguo atĩ nĩ ũndũ wa gwĩtĩkia twamũkĩre Roho ũrĩa wĩranĩirũo.

15Ariũ a Ithe witũ, rĩu ngwaria ta ũrĩa andũ maaragia: kĩrĩkanĩro o gĩothe, o na kĩngĩtuĩka no kĩa mũndũ-rĩ, kĩarĩkia kũrũmio, gĩtingĩcoka kũrario kana kuongererũo ũndũ nĩ mũndũ ũngĩ.

16Rĩu-rĩ, maũndũ marĩa meranĩirũo nĩmerĩirũo Iburahimu o na rũciaro rũake. Ndoigire Njiaro, ta arĩ ũhoro wa andũ aingĩ, no kuuga oigire ta arĩ ũhoro wa mũndũ ũmwe, ũũ: Rũciaro rũaku, nake nĩwe Kristo.

17Ngũkiuga atĩrĩ, Watho ũrĩa wacokire kũheanwo thutha wa mĩaka magana mana ma mĩrongo ĩtatũ-rĩ, ndũngĩraria kĩrĩkanĩro kĩrĩa kĩarũmirio nĩ Ngai mbere ĩo, ũtũme kĩĩranĩro kĩu gĩtuĩke gĩa tũhũ.

18Tondũ igai rĩngĩgayanĩrũo na ũndũ wa watho-rĩ, rĩtingĩtuĩka rĩa kĩĩranĩro: ĩndĩ Ngai nĩaaheire Iburahimu na ũndũ wa kũmwĩrĩra.

19Hakĩrĩ ũguo-rĩ, watho ũkĩrĩ wa kĩ? Wonganĩrĩirio na kĩĩranĩro nĩ ũndũ wa mahĩtia, o nginya rũciaro rũgoka o rũu rũerĩirũo kĩĩranĩro; naguo watho ũcio ũgĩathanwo na ũndũ wa araika, ũkĩnenganĩrĩrio na guoko kwa mũiguithania.

20Na rĩu-rĩ, mũiguithania ti wa mũndũ ũmwe wiki; ĩndĩ Ngai no ũmwe.

21Nĩ ũndũ ũcio-rĩ, kaĩ watho ũreganĩte na ciĩranĩro, cia Ngai? Hĩ! kũroaga gũtuĩka ũguo! Nĩ ũndũ kũngĩagĩire na watho ũrĩa ũngĩhota gũtũma andũ magĩe na muoyo-rĩ, ti-itherũ ũthingu nĩũngĩonekire na watho ũcio.

22No rĩrĩ, Maandĩko nĩmonanĩtie atĩ maũndũ mothe nĩmahingĩrĩirio ũhoro-inĩ wa wĩhia, nĩ getha kĩĩranĩro kĩrĩa kĩonekaga nĩ ũndũ wa kwĩhoka Jesu Kristo kĩhingĩrio andũ arĩa metĩkĩtie.

23No rĩrĩ, ũhoro wa gwĩtĩkia ũtanakinya, twarangagĩrũo nĩ watho ta tuohetwo nĩguo, tũgĩgakinyĩrĩrũo nĩ wĩtĩkio ũrĩa warĩ wa gũkaguũranĩrio thutha.

24Ũguo noguo watho watuĩkire o mũtũtwari wa gũtũkinyia gwĩ Kristo, nĩguo tũtuwo athingu nĩ ũndũ wa kũmwĩtĩkia.

25No rĩu, ũhoro: wa gwĩtĩkia ũkĩrĩ mũkinyu-rĩ, nĩtũtigĩte gũtwaragwo nĩ mũtũtwari.

26Nĩ: gũkorũo inyuothe, tondũ wa ũrĩa mwĩtĩkĩtie-rĩ, mũrĩ ciana cia Ngai nĩ ũndũ wa Kristo Jesu.

27Tondũ-rĩ, andũ anyu o arĩa othe maabatithirio thĩinĩ wa Kristo nĩ kwĩhumba mehumbĩte Kristo.

28Gũtingĩcoka gũthuranio Mũyahudi kana Mũyunani, arĩa me ngombo kana arĩa matarĩ ngombo, andũ arũme kana andũ-a-nja: nĩ ũndũ-rĩ, inyuĩ inyuothe mũtuĩkĩte o ũmwe ki thĩinĩ wa Kristo Jesu.

29Na mũngĩkorũo mũrĩ a Kristo, mũkĩrĩ o a rũciaro rũa Iburahimu, na mũrĩ agai a kũgaya maũndũ marĩa meranĩirũo.

← Chapter 2 Jump to: Chapter 4 →