Isaiah 58

Kikuyu Bible (IBUKU RĨRĨA ITHERU RĨA NGAI)

← Chapter 57 Jump to: Chapter 59 →

1Atĩrĩrĩ, anĩrĩra mũno wathamĩtie kanua, na ndũkae kwĩnona; haicia kayũ na igũrũ o ta arĩ coro ũkũgamba, uumbũrĩre andũ akwa ũhoro wa ũrĩa maagararĩte watho, o na andũ a nyũmba ya Jakubu ũmahe ũhoro wa ũrĩa mehĩtie.

2No rĩrĩ, nĩmanongoragia o mũthenya o mũthenya, na magakena nĩ kũmenya ũrĩa njĩra ciakwa itariĩ; manjĩtagia mũtugo wa ũthingu ũrĩa ndĩmatuĩrĩire, na magakenio nĩ gũthengerera harĩ Ngai, o ta marĩ rũrĩrĩ rũĩkaga maũndũ ma ũthingu, na rũtangĩtiga kũrũmĩrĩra mũtugo ũrĩa ũtuĩtwo nĩ Ngai wao.

3Nao moragia atĩrĩ, Nĩ kĩ gĩtũmĩte twĩhinge kũrĩa irio, nawe ũkaaga kuona? Ningĩ nĩ kĩ gĩtũmĩte twĩnyarire ngoro ciitũ, nawe ũkarega kũrũmbũiya ũhoro ũcio? Atĩrĩrĩi, matukũ marĩa mwĩhingaga kũrĩa irio-rĩ, nĩmwĩonagĩra maũndũ ma kũmũkenia inyuene, nao andũ othe arĩa mamũrutagĩra wĩra mũkamarutithia wĩra na hinya.

4Atĩrĩrĩ, inyuĩ mwĩhingaga kũrĩa irio no getha ngarari cioneke, o na kwenda gũkĩrana, o na mũhũrane na ngundi ta andũ aaganu; ti-itherũ kwĩhinga kũrĩa irio kũrĩa mwĩhingaga matukũ maya gũtingĩtũma mĩgambo yanyu ĩiguwo kũu igũrũ.

5Kaĩ arĩ kwĩhinga kwa mũthemba ũcio niĩ ’thurĩte? Githĩ ũguo nĩguo mũthenya ũhaana ũrĩa wamũrĩtwo wa atĩ mũndũ enyarire ngoro? O na kana no ũhoro wa atĩ mũndũ aturumithie mũtwe thĩ ta arĩ itothua, o na atĩ earĩre tama wa ikũnia harĩa egũkoma, o na mũhu? Githĩ gwĩka ũguo nĩkuo ũngĩtua ũhoro wa kwĩhinga kũrĩa irio, o na kana gĩathĩ kĩrĩa Jehova angĩĩtĩkĩra?

6Githĩ kwĩhinga kũrĩa irio kũrĩa niĩ ndathurire, tikuo gũkũ? Kuohoraga arĩa mohetwo na njĩra ya waganu, na kuohoraga mĩkwa ya mĩtĩ ya ngingo, o na kũreka arĩa mahinyĩrĩirio methiĩre o kũrĩa mekwenda, nayo mĩtĩ yothe ya ngingo mũmiunange?

7Githĩ ti kũhe andũ arĩa ahũtu irio ciaku, o na ningĩ andũ athĩni arĩa maingatĩtwo makarutwo kwao ũmatware gwaku mũciĩ? O na ningĩ rĩrĩa wona mũndũ wĩ njaga, ũmũhumbage nguo; o na atĩ ndũkanehithe andũ arĩa mũrĩ a mũthimo ũmwe nao?

8Hĩndĩ ĩo nĩguo ũtheri waku ũgaitĩka gũthera o ta ũrĩa gũtheraga rũcinĩ, o naguo ũhoro waku wa kũhona ũkunũke narua; ningĩ ũthingu waku nĩguo ũgagũthiaga mbere, naguo riri wa Jehova ũkuume thutha.

9Hĩndĩ ĩo nĩũgagĩĩtana, nake Jehova agwĩtĩke, o na wanĩrĩre, nake oige atĩrĩ, Niĩ ũyũ haha. Atĩrĩrĩ, ũngĩeheria ũhoro wa kũhinyanĩrĩria uume thĩinĩ waku, o na ũhoro wa kuorota andũ na kĩara nĩ ũndũ wa kĩmena, o na kwaria ndeto cia waganu,

10o na gũtuĩke atĩ ngoro yaku nĩĩkũiguĩra mũndũ mũhũtu tha, o nake mũndũ ũrĩa mũnyarire ũmũhe kĩrĩa abatairio nĩkĩo gĩa kũmũigana-rĩ, hĩndĩ ĩo nĩguo ũtheri waku ũgathera kũrĩa kwarĩ nduma ndumanu, o nayo nduma ĩrĩa wĩ nayo ĩtuĩke o ta mũthenya barigici.

11Ningĩ Jehova nĩwe ũgũtũũra agũtongoragia, na akũhũnagĩrie kũndũ kũũmũ, o namo mahĩndĩ maku amekagĩre hinya; nawe ũtuĩke o ta mũgũnda uunithĩirio maĩ, na ũtuĩke o ta gĩthima gĩtahũaga maĩ.

12Naruo rũciaro rũrĩa rũkoima harĩ wee nĩrũgacoka gwaka maganjo marĩa ma tene, nawe ũcoke gwakĩrĩra itina cia njiaro na njiaro iria itũire itacokereirio; nawe nĩũgetagwo Mũcokereria wa kũndũ kũrĩa gũtharũrĩtio, o na Mũguũrania wa njĩra cia kũrĩa gũtũũrĩtwo.

13O na ningĩ atĩrĩ, ũngĩgarũra kũgũrũ gwaku ũtige gũthiĩ na mũthiĩre wa gũthũkia mũthenya wa thabatũ, o na wa gwĩkaga maũndũ maku wee mwene mũthenya ũcio wakwa mwamũre, nayo thabatũ ĩo ũmĩtue mũthenya wa gĩkeno, naguo mũthenya ũcio wamũrĩirũo Jehova ũũtue wa gĩtĩo, o na ũũtĩage nĩ gũtiga gwĩka maũndũ maku wee mwene, kana gũcaria o maũndũ ma gwĩkenia, o na kana kwaria ndeto ciaku wee mwene-rĩ,

14hĩndĩ ĩo nĩũgekenera nĩ ũndũ wa Jehova; na niĩ nĩngatũma ũthiage ũhaicĩte mbarathi ũgere kũndũ kũrĩa gũtũũgĩru gũkũ thĩ; na ngũrĩithagie, ngũhe igai rĩa thoguo Jakubu ũrĩrĩage; nĩ gũkorũo kanua ka Jehova nĩko kaarĩtie ũhoro ũcio.

← Chapter 57 Jump to: Chapter 59 →