Job 22

Kikuyu Bible (IBUKU RĨRĨA ITHERU RĨA NGAI)

← Chapter 21 Jump to: Chapter 23 →

1HĨNDĨ ĩo Elifazu ũrĩa Mũtemani agĩcokia, akĩũria atĩrĩ,

2Mũndũ-rĩ, aakĩhota kũgĩa na ũndũ ũngĩguna Mũrungu? mũndũ ũrĩa mũũgĩ, ũũgĩ wake nowe mwene ũgunaga.

3No anga Mwene-Hinya nĩangĩĩkenera nĩ ũndũ waku gũtuĩka mũthingu? arĩ nyongeri angĩgwata nĩ ũndũ waku kwagĩria mĩthiĩre yaku nĩguo ĩtuĩke mĩkinyanĩru?

4No anga nĩarakũrũithia nĩ ũndũ atĩ nĩũmwĩtigagĩra? nĩngarĩ arĩ guo gĩtũmi gĩa agũtonyie cira-inĩ?

5Ũndũ kũrĩ, githĩ ti atĩ ũũru waku nĩ mũnene, mawaganu maku magakĩaga gĩturi?

6Amu wanenyitĩra ngwatio harĩ mũrũ wa thoguo na hatarĩ thirĩ, na andũ maarĩ njaga ũkamacuma tũkuo tũrĩa maarĩ natuo.

7Ũtũire ũregaga kũhe andũ arĩa anogu maĩ manyue, na ũkaimaga arĩa ahũtu irio.

8No rĩrĩ, karau atuĩkage atĩ nowe mwene itĩri; mũndũ wa gwĩkĩrĩrũo-rĩ, agĩtuĩke nowe wa gũtũũra kuo.

9Ũtũire ũhũndũraga atumia a ndigwa matarĩ na kĩndũ, nacio ciana itarĩ maithe ikoinangwo moko.

10Nĩkĩo rĩu ũthiũrũrũkĩirio nĩ mĩtego, na ũgatebebagio nĩ guoya ũgĩũkaga na kĩguũ,

11O na kana ũgatumanĩrũo nĩ nduma, ũkaremwo nĩ kuona, o na ũkahumbwo nĩ maĩ mokĩte ma mũiyũro.

12Githĩ Ngai ndarĩ o igũrũ igũrũ? ningĩ ũraihĩrĩru wa njata-rĩ, ta kĩone ũrĩa ihaicĩte na igũrũ!

13Nawe ũkuuga atĩrĩ, Mũrungu amenyaga ũhoro ũrĩkũ? nduma ĩkĩrĩ kuo ndumanu ũũ, no anga angĩhota gũcirithia andũ?

14Athiĩkĩrĩirio nĩ matu mamata, akaaga kuona, na kũrĩa aceeraga no igũrũ o gacũmbĩrĩ!

15Njĩra ĩo ngũrũ nĩyo ũkũrũmĩrĩra, ĩo yanagerũo nĩ andũ aaganu?

16Nao makĩhurio magĩthengio ihinda rĩao rĩtaanakinya, arĩa gĩtina kĩao gĩatuĩkire ta rũũĩ, gĩgĩitũrũrũka;

17O arĩa merire Mũrungu, Thiĩ, tigana na ithuĩ! makĩũria atĩrĩ, Mwene-Hinya-rĩ, angĩtũteithia ũhoro ũrĩkũ?

18Na nowe waiyũrĩtie nyũmba ciao indo njega. (Ũtaaro wa acio aaganu ũrondaihĩrĩria mũno!)

19Arĩa athingu monaga ũguo magakena, andũ arĩa matekaga ũũru magagĩthekerera andũ acio,

20Makiugaga atĩrĩ, Acio maratũũkagĩrĩra nĩ amitĩku-ni! nacio indo iria ndige nĩo ikarambio nĩ mwaki!

21Ta no kĩĩmenyithanie na Ngai, ũgĩcoke gũikaraga na thayũ: njĩra ĩo noyo ya gũkũrehere maũndũ mega.

22Ta ĩtĩkĩra kĩrĩra kĩrĩa gĩkuuma kanua gake, ũkĩige ciugo ciake ngoro-inĩ yaku.

23Wacokerera Mwene-Hinya-rĩ, nĩ gwaĩkĩka ũrĩakĩka, wagĩĩtĩkĩra gũthengia ũgenyũ kũraya na hema ciaku.

24Ningĩ mũthithũ waku wa ũtonga ũũrekie thĩ tĩri-inĩ, thahabu ĩrĩa ya Ofiri-rĩ, ũmĩrekie ngomongo-inĩ cia rũũĩ-inĩ;

25Nake Mwene-Hinya nĩwe ũgũtuĩka mũthithũ waku, atuĩke ta betha harĩ wee, ĩrĩa ya bata.

26Amu Mwene-Hinya hĩndĩ ĩo nĩ kũmwĩkenera ũrĩmwĩkenagĩra, ũgatiira ũthiũ ũgakĩrora Ngai.

27Kũhoya ũrĩmũhoyaga, nake agakũigua, nawe ũgacoka ũkahingia mĩĩhĩtwa yaku.

28Ningĩ watua atĩ kũrĩ ũndũ ũgwĩka, ũndũ ũcio no ũkũrĩĩrĩre; ikĩro ciaku irĩtheragĩrũo nĩ ũtheri.

29Rĩrĩa ũngĩkorũo ũthikanĩtio ũkagũa, ũkoiga, Nĩkuoyanagwo! nake no ahonokie ũcio ũtarĩ na maitho ma ngũrũ.

30Akahatũra o kinya ũrĩa ũtangĩaga ũcuke: ĩĩ-ni, ũcio akahatũrũo nĩ ũndũ wa gũthera kwa moko maku.

← Chapter 21 Jump to: Chapter 23 →