Job 41

Kikuyu Bible (IBUKU RĨRĨA ITHERU RĨA NGAI)

← Chapter 40 Jump to: Chapter 42 →

1Nyamũ ĩrĩa ĩĩtagwo kĩng’ang’i-rĩ, wahota kũmĩgucũrũria maĩ-inĩ na ndwano? kana ũkĩhihinyanie rũrĩmĩ rũayo na mũkanda?

2Wahota kũmĩĩkĩra mũhĩndo mũniũrũ? kana ũtũrĩkanie rũthĩa rũayo na mbogoro?

3Nĩngarĩ ĩngĩtindĩrĩra ĩgĩgũthaitha, kana ĩkwarĩrie na ciugo cia kũhoreria?

4Ĩĩ hingo ĩngĩĩtĩkĩra gwĩkĩra kĩrĩko nawe, atĩ ũthiĩ nayo ĩgatuĩke njaguti yaku nginya tene?

5Wathaka nayo ta ũrĩa nyoni ĩthakagio, kana ũmĩohere airĩtu aku mamĩmeemagie?

6Gĩtaatĩ gĩa ategi-a-ciũngũyũ-rĩ, nĩkĩngĩmĩtua thũgũrĩ wakĩo? yagayanwo nĩ ahũri-a-biacara?

7Nĩũngĩhota kũmĩiyũria rũũa rũayo mĩrarangai, kana ũiyũrie kĩongo kĩayo mĩcengi ĩrĩa ĩrathaga ciũngũyũ?

8Ta kĩmĩigĩrĩre guoko! ririkana mbaara ĩo, ndũkanagĩcokere.

9Atĩrĩ! kũmĩĩrĩgĩrĩra nĩ wĩra wa tũhũ: anga mũndũ to kũmaka aamĩona?

10Gũtirĩ o na ũrĩ ũrũme ũngĩeta kũmĩarahũra: nake akĩrĩ ũ, ũrĩa ũngĩkĩĩĩnyũmĩria niĩ?

11Niĩ-rĩ, nũ waambire kũ’he kĩndũ nĩguo na niĩ ngacoka kũmũrĩha? ruungu rũa igũrũ o guothe kĩndũ gĩĩ kuo, o na kĩrĩkũ, no gĩakwa.

12Ũhoro wa miutha yayo-rĩ, ndingĩũkirĩra, kana hinya wayo ũrĩa wĩ mũnene, o na kana ũcũrũrũbe wayo kwagĩra.

13Nguo ĩo ĩĩ nayo mwĩrĩ, nũ ũngĩhota kũmĩcaũra? nũ ũngĩtonyia guoko matamu-inĩ macio mayo moinanĩre?

14Nũ ũngĩhota kũmĩemũria mĩrango ya ũthiũ wayo? magego mayo, ũguo mathiũrũrũkĩirie kanua, marĩ itebebia!

15Mĩtaratara ya makaracũ mayo nĩyo mwĩraho wayo, makomanĩte o gũkomana, ta mathingĩrĩirũo na mũhũra.

16Tondũ wa ũrĩa matumaine mũno, gũtirĩ karũhuho kangĩhota gũtonya gatagatĩ-inĩ kamo.

17Nĩ kũgwatana magwataine, magakĩrathĩkana, o ũndũ matangĩtigithũkanĩka.

18Mĩathimũro yayo nĩ kũmenũria ĩmenũragia ũtheri, namo maitho mayo no ta imone cia rũcinĩ ruoro rũgĩtema.

19Kanua kayo koimaga icinga njakanu, o na thandĩ cia mwaki igathandĩkaga ho.

20Marima-inĩ ma iniũrũ rĩayo nĩhoimaga ndogo, ta ya nyũngũ ĩgĩtherũka, ĩrĩa ĩkũrugwo na ithanjĩ.

21Mĩhũmũ yayo no kũgwatia makara mwaki, kĩnua kĩayo nĩ rũrĩrĩmbĩ kiumaga.

22Ngingo yayo nĩho hinya ũtũũraga, na mbere-inĩ yayo nĩ kĩmakanio gĩtũrũhaga ho.

23Mĩnono ya nyama ciayo ĩnyitaine o kũnyitana: nĩ kũrũma ĩmĩĩrũmĩrĩirie; ndĩngĩenyenyeka.

24Ngoro yayo ĩrũmĩte ta ihiga; ĩĩ-ni, ĩkarũma o ta ihiga rĩa ũthĩĩro.

25Yeambararia-rĩ, o na andũ arĩa makandũi no gwĩtigĩra metigagĩra, magakĩmaka nĩ ũndũ wa gĩtuĩko kĩa nda.

26Mũndũ aamĩikia rũhiũ, rũtirĩ ũndũ rũngĩhota; o na kana mwenjerere, kana iheti, kana gatimũ.

27Kĩgera yonaga ta arĩ o mũnyeki mũũmũ, na kĩndũ kĩa rũthuku ĩkona ta arĩ o kĩrung’o kĩa mũtĩ kĩoru.

28Mũguĩ ndũngĩtũma ĩhahũke; mahiga ma kĩgũtha harĩ yo magarũrũkaga magatuĩka maragara.

29Njũgũma cionagwo nĩyo ta arĩ o rũhuti; mũhiũko wa gatimũ karĩa gaikĩtio thũgo no gũtheka ĩũthekagĩrĩra.

30Mwara-nda wayo nĩ ta warĩtwo ngĩo njũgĩ: ĩiyũragia ndaka-inĩ ngururo ta cia ngari ĩrĩa ĩrigithaga ngano.

31Ĩtũmaga ndia ĩtherũke ta nyũngũ; maĩ ma iria ĩgakĩhũra makahaana ta maguta makĩringio, marĩa ma kwĩhaka.

32Thutha wayo ĩtigaga yekĩra mũkirito ũgũkenga; mũndũ no kuuga ndia ĩrĩ na mbuĩ.

33Gũkũ thĩ gũtirĩ nyamũ ĩngĩ ĩhaana tayo, nĩ ũrĩa yombirũo ĩtarĩ ya kũigua guoya.

34Indo iria ndũũgĩru ciothe no kũrora ĩciroraga manyiira; nĩyo mũthamaki wa rũciaro ruothe rũrĩa rũĩ ngũrũ.

← Chapter 40 Jump to: Chapter 42 →