Joel 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1ĨNO NĨYO ndũmĩrĩri ya Jehova ĩrĩa yakinyĩrĩire Joeli wa Pethueli.

2Ta thikĩrĩriai ũhoro ũyũ, inyuĩ athuri akũrũ, na mũtege matũ, inyuothe arĩa mũtũũraga bũrũri ũyũ. Matukũ-inĩ manyu, o na kana matukũ ma maithe manyu-rĩ, kũrĩ kwagĩa ũndũ ta ũyũ?

3Ta hei ciana cianyu ũhoro waguo, o nacio ciana cianyu mũreke ciĩre ciana ciacio, o nacio ciana icio ciacio ciĩre rũciaro rũu rũngĩ.

4Kĩndũ kĩrĩa gĩatigĩtio nĩ ngigĩ-rĩ, nĩ kĩrĩĩku nĩ itono; nakĩo kĩrĩa gĩatigĩtio nĩ itono gĩkarĩĩka nĩ ndaahi; o nakĩo kĩrĩa gĩatigĩtio nĩ ndaahi gĩkarĩĩka nĩ ciana cia ciĩhuruta.

5Arahũkai inyuĩ arĩu aya, mũrĩre, na mwanũke inyuĩ anyui a ndibei inyuothe, nĩ ũndũ ndibei ĩrĩa ĩrĩ mũrĩo nĩ thengu ĩkahurio ĩrutwo o tũnua-inĩ twanyu.

6Nĩ ũndũ he rũrĩrĩ rũambatu rũũke gũkũ bũrũri witũ, naruo nĩ rũa nyamũ ii hinya itangĩtarĩka; na magego ma cio mahaana ta magego ma mũrũthi, na makamburu ma cio makaraiha o ta ma ngatia nene.

7Mĩthabibu iitũ-rĩ, nĩimĩanangĩte, nayo mĩkũyũ iitũ ikamĩũnũra makoni biũ; ĩĩ, ti-itherũ imĩũnũrĩte makoni mayo nayo ĩgatigwo ũtheri, igacoka ikamiunanga, nacio honge ciayo igatigwo irĩ ngengecwa theri.

8Rĩrai o ta mũirĩtu ũkũrĩra eyohete tama wa ikũnia agĩcakaĩra mũrũme ũrĩa ũmũkuĩrĩire o erĩ matanakũra.

9Magongona ma mũtu, o na ma indo iria irutagwo cia kũnyuwo, nĩ maagu biũ, magatiga kũrutwo kũu nyũmba ya Jehova; nao athĩnjĩri-Ngai, arĩa matungatagĩra Jehova, makagwatwo nĩ kĩeha.

10Mĩgũnda nĩ mĩanange, naguo bũrũri wothe ũkagwatwo nĩ kĩeha, nĩ ũndũ ngano nĩ nyanangĩku, nacio thabibu cia gũthondeka ndibei ikoma, ningĩ maguta makanyihanyiha.

11Atĩrĩ, arĩmi a mĩgũnda nĩ aconoku, nao acehi a mĩthabibu makarĩra na kĩgi, nĩ ũndũ wa wathima wa ngano, o na cairi; nĩ ũndũ magetha ma mũgũnda nĩmorĩte o kũũra.

12Nayo mĩthabibu nĩ kũũma yũmĩte, nayo mĩkũyũ ĩkahoha, ningĩ mĩkomamanga, na mĩtende, o na mĩcungwa, ĩkoma hamwe na mĩtĩ ĩrĩa ĩngĩ yothe ya mũgũnda. Ningĩ ciana cia andũ a bũrũri nĩithirĩirũo nĩ indo ciothe iria icikenagia.

13Wĩyohei matama ma ikũnia njohero mũrĩre, inyuĩ athĩnjĩri-Ngai aya, o na inyuĩ atungatĩri a kĩgongona-rĩ, rĩrai na kĩgi; ũkai mũraare mwĩhumbĩte matama ma ikũnia, inyuĩ atungatĩri Ngai wakwa, nĩ gũkorũo magongona ma mũtu, o na magongona ma indo iria irutagwo cia kũnyuwo, nĩmaagĩte biũ kũrutĩrũo nyũmba ya Ngai wanyu.

14Raarĩriai gĩathĩ kĩamũre gĩa kwĩhinga kũrĩa irio; ĩtanai mũraarĩrie gĩtũngano gĩkoniĩ andũ othe, mũũnganie athuri, o na andũ othe arĩa matũũraga bũrũri ũyũ, mũmonganĩrie nyũmba ya Jehova Ngai wanyu nĩguo makaĩre Jehova.

15Wũi-ĩiya-ĩ! Kaĩ matukũ maya me na haaro-ĩ! Nĩ ũndũ mũthenya ũrĩa ũtuĩtwo nĩ Jehova wĩ hakuhĩ, naguo woka-rĩ, ũtuĩke o mũthenya wa kũninanwo uumĩte he Mwene-Hinya-Wothe.

16Githĩ irio ti nine igathira o tũkĩĩonagĩra na maitho maitũ? Githĩ gĩkeno na mũcanjamũko ti thengu kũu nyũmba ya Ngai witũ?

17Mbeũ nĩ kũbutha irabuthĩra tĩri-inĩ ũrĩa ciahandirũo, namo makũmbĩ makamomoka; o nayo mĩthũnũ nĩ gũthario ĩrathario, ikagũithio thĩ, nĩ ũndũ ngano nĩyũmĩte.

18Hĩ! Kaĩ ũhiũ wĩ na mũcayo-ĩ! Ndũru cia ng’ombe nĩ gũtindima itindimĩte, nĩ ũndũ itirĩ na gwa kũrĩithio ĩĩ, ti-itherũ ndũru cia ng’ondu nĩ ta kũũnũhwo ciũnũhĩtwo.

19Atĩrĩrĩ, Jehova, wee nĩwe ndĩrakaĩra; nĩ ũndũ morĩithio ma werũ-inĩ nĩmaninĩtwo nĩ mwaki magathira biũ, o nacio nĩnĩmbĩ cia mwaki igacina mĩtĩ yothe ya gĩthaka.

20Ĩĩ, ti-itherũ o na nyamũ cia gĩthaka nĩwe irarĩrĩra; nĩ ũndũ maĩ ma tũrũũĩ nĩ mahũu, namo morĩithio ma werũ-inĩ makaninwo nĩ mwaki magathira biũ.

Jump to: Chapter 2 →