Lamentations 2

Kikuyu Bible (IBUKU RĨRĨA ITHERU RĨA NGAI)

← Chapter 1 Jump to: Chapter 3 →

1HĨ! Ĩ kaĩ Mwathani nĩakĩhubĩte mwarĩ ũyũ, ti Zayuni, na itu, nĩ ũndũ wa ũrĩa arakaire-ĩ! ũthaka wa Isiraeli aũrutĩte igũrũ matu-inĩ akaũtungumania nginya o thĩ, na ndaririkane gĩturũa kĩu kĩa makinya make mũthenya ũcio aarakaire.

2Mwathani nĩamerũkĩtie itũũro ciothe cia Jakubu, na ndangĩigua tha; mĩciĩ ĩrĩa ya hinya ya mwarĩ ũcio, ti Juda, nĩ kũmomora amĩmomorete nĩ ũrĩa atũkũĩte; amĩrekanĩtie na thĩ o kinya tĩri-inĩ: bũrũri wa mũthamaki witũ nĩakĩũthahĩtie o na kinya anene aguo.

3Rũhĩa rũa Isiraeli arũrengete ruothe arĩ na marakara marĩa mahiũ; guoko gwake kwa ũrĩo nĩakũgũithĩtie gũgathengera thũ, na gũcina nĩacinĩte Jakubu ta mwaki mũrĩrĩmbũku, ũrĩa ũrarambia na mbarĩ ciothe.

4Agetete ũta wake o ta thũ, akehanda ekĩte guoko gwake kwa ũrĩo o ta kwa mũmuku, akoraga arĩa othe mararĩ o ega makĩonwo na maitho; aitũrũrĩte marũrũ make thĩinĩ wa hema ya mwarĩ ũyũ, ti Zayuni, o ta mwaki.

5Mwathani nĩagĩtuĩkĩte ta thũ; nĩ kũmerũkia amerũkĩtie Isiraeli; amerũkĩtie nyũmba ciake ciothe iria cia ũnene, na agatharia mĩciĩ yake ĩrĩa mĩirige mũno: thĩinĩ wa mwarĩ ũyũ, ti Juda, nĩ kũingĩhia aingĩhĩtie kĩgirĩko o na mũcakayo.

6Ningĩ gĩthũnũ gĩake nĩagĩthengetie o na hinya, o ta arĩ gathũnũ ka mũgũnda-inĩ; handũ hau hake ha kũũnganagĩrũo nĩahonũhĩte: Jehova nĩatũmĩte ciathĩ iria ndue, o gwata thabatũ, ciage gũcoka kũririkanwo thĩinĩ wa Zayuni, ningĩ mũthamaki o na mũthĩnjĩri-Ngai akamarurũka tondũ wa gũthũgũta kwa marakara make.

7Kĩgongona gĩake, Mwathani nĩagĩteanĩtie, naho handũ hake harĩa aamũrĩirũo akahathũũra biũ; thingo cia nyũmba ciakuo iria cia ũnene, acineanite moko-inĩ ma thũ: nĩ kũronja ciaronjire irĩ o nyũmba ya Jehova thĩinĩ, o ta arĩ mũthenya wa gĩathĩ kĩrĩa gĩathane.

8Rũirigo rũa kwa mwarĩ ũyũ, ti Zayuni, Jehova nĩ kwenda eendeire kũrũtharithia; nĩ gũtambũrũkia aatambũrũkirie rũkwaro rũrĩa rũa gũthima, na ndaigana gũthengia guoko gwake gũtige kwananga, ĩndĩ-rĩ, atũmĩte rũirigo rũakuo o na rũthingo ciikare igĩcakayaga; no kũrigira irigirĩte o cierĩ.

9Ihingo ciakuo ihorokeire na thĩ; mĩgĩĩko yakuo nayo ya kũhinga, nĩ kũũnũha amĩũnũhĩte akamiunanga: mũthamaki na anene akuo rĩu maikaire ndũrĩrĩ-inĩ o kũu kĩrĩra gĩtoĩo; anabii akuo matikĩrĩ kĩoneki monaga kiumĩte kwĩ Jehova.

10Athuri a kwa mwarĩ ũyũ, ti Zayuni, maikaire thĩ tĩri-inĩ, magekĩrĩra o ki! nĩmehurĩirie rũkũngũ mĩtwe, na makeoha nguo cia ngũnia; nao airĩtu a Jerusalemu nĩ kũinamia mainamĩtie mĩtwe yao o na thĩ.

11Maitho makwa nĩ kũira mairĩte nĩ gũita maithori, namo mara makwa magakĩngariũka; ini rĩakwa narĩo nĩrĩitũrũrũkĩte thĩ, nĩ ũndũ wa kũmomorũo kwa mwarĩ ũyũ wa kĩrĩndĩ giitũ, amu-rĩ, twana tũrĩa tũnini o na tũkenge nĩtũringĩkaga tũrĩ o kũu ing’aratua-inĩ cia itũũra.

12Tũroria manyina atĩrĩ, Irio ii kũ, na ndibei? o tũkĩringagwo nĩ iringi ta andũ arĩa agurarie, kũu ing’aratua-inĩ cia itũũra, o mĩoyo yatuo ĩkĩhororokaga ithũri-inĩ cia manyina matuo.

13Hĩ! ngũkuonia ũhoro na kĩhooto kĩrĩkũ? ngũgerekanie na kĩ, wee mwarĩ ũyũ, Jerusalemu? ngũkũringania na ũndũ ũrĩkũ, nĩguo ngũhorerie, wee mwarĩ ũyũ, Zayuni, mũirĩtu gathirange? thima-rĩ, hau ũmomoretwo hanenehete o ta iria rĩrĩa inene: nũ ũngĩhota gũkũhonia?

14Anabii a gwaku, cioneki iria monaga nĩ ũndũ waku ciarĩ o cia tũhũ na cia mũheheneko, na matiigana kũguũria waganu waku nĩguo magarũrithie ũhoro waku wa gũtahwo, no rĩrĩ, maakuonagĩra mawoni ma tũhũ na itũmi cia gũtũma ũingatĩrĩrũo bũrũri wene.

15Ahĩtũki othe nĩ hĩ makũhũrahũragĩra; o wee mwarĩ ũyũ, Jerusalemu, nĩ mĩnjũri matindaga magĩkũringĩra, o magĩkũinagĩria mĩtwe, makĩũragia atĩrĩ, Gĩtũũro gĩkĩ githĩ nokĩo andũ maretaga, Kĩrĩa kĩhingĩtie ũthaka, ningĩ, Kĩrĩa gĩkenagia thĩ yothe?

16Thũ ciaku ciothe nĩigwathamĩirie tũnua; nĩ mĩnjũri iringaga ikĩhagaranagia magego; ciugaga atĩrĩ, Nĩtũkĩmũmerũkĩtie! Ũyũ nĩguo mũthenya ũrĩa twagĩetagĩrĩra; tũrĩ kũũkinyĩrĩra, rĩu nĩtũkĩwonete!

17Jehova nĩarĩkĩtie gwĩka ũrĩa aathugundire, nĩahingĩtie uuge ũrĩa aathanire o matukũ-inĩ marĩa ma tene; kũmomora nĩakũmomorete, na ndakũiguĩre tha: atũmĩte thũ ĩgũkenerere, arĩa me muku nawe-rĩ, rũhĩa rũao nĩruo atũũgĩrĩtie.

18Ngoro cia kĩrĩndĩ nĩciakaĩire Mwathani: Ĩ rũirigo rũa mwarĩ ũyũ, ti Zayuni-ĩ, maithori ta nĩmakũnyũrũrũkage ta rũũĩ mũthenya o na ũtukũ! Ĩ ndũkanakĩĩhurũkie-ĩ! kĩũma kĩa riitho rĩaku-rĩ, ndũkanareke gĩtumie!

19Arahũka, ũkayũrũrũkage ũtukũ, o ciambĩrĩria-inĩ cia macamu; itũrũraga ngoro yaku ta maĩ mbere-inĩ ya ũthiũ wa Mwathani! woyagĩrĩre moko na kũrĩ we nĩ ũndũ wa mĩoyo ya twana twaku, tũrĩa tũringĩkaga nĩ ng’aragu magomano-inĩ ma mabarabara mothe ma itũũra.

20Ĩ Jehova-ĩ, ta rora, wone, atĩ nũ wee wĩkĩte ũguo! githĩ aka no makĩrĩe maciara mao, o mo twana tũrĩa tũcũũgagio na moko? githĩ athĩnjĩri-Ngai na anabii no moragagwo marĩ o harĩa haamũrĩirũo Mwathani?

21Tũmwana o na athuri nĩ akomu thĩ o gũkũ mabarabara-inĩ; airĩtu akwa o na aanake akwa nĩ airũre nĩ njomo: nĩ kũmoraga ũramoragire mũthenya ũrĩa ũrarakaire; ũmaitĩte mũito, na ndũngĩigua tha.

22Ũnjĩtĩire matebebia ma kũndebebia mandigicĩrie mĩena yothe, o ta arĩ mũthenya wa gĩathĩ kĩrĩa gĩathane, na mũthĩ ũcio Jehova ararakarire gũtirĩ mũndũ ũrahonokire kana aratigara; arĩa ndacũũgagia, o arĩa ndarerire-rĩ, thũ yakwa nĩĩmaninĩte buru!

← Chapter 1 Jump to: Chapter 3 →