Malachi 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to: Chapter 4 →

1Atĩrĩrĩi, nĩngũtũma mũrekio wakwa, Nake a’thondekithĩrie kĩng’aratua gĩakwa. Nake Mwathani, ũcio mũtũire mũũragĩrĩria, nĩakaguthũka na ihenya, Atonye hekarũ-inĩ yake thĩinĩ. O na ningĩ, mũrekio ũrĩa mũiguithania-wa-kĩrĩkanĩro, o we ũrĩa mũkenagio nĩwe, nĩagoka o nake. Uguo nĩguo Jehova Mũnene wa Ita ekuuga.

2No rĩrĩ, mũthenya ũrĩa agoka-rĩ, nũ ũkahota kũmwĩtiiria? O na rĩrĩa akeonania-rĩ, nũ ũkahota kwĩũmĩrĩria? Tondũ-rĩ, ahaana ta mwaki wa mũturi, o na kana ta thabuni wa mũthambia nguo.

3Ningĩ agagĩikara ta arĩ mũturi wa betha, o na mũtheria wacio, Nake atherie ariũ a Lawii, Amathambie mathere ta marĩ thahabu kana betha iria itheragio ithirũo nĩ nganga ciothe. Nao macoke kũrutagĩra Jehova mahaki ma ũthingu.

4Hĩndĩ ĩo, Jehova nĩagakenio nĩ mahaki wa Juda na Jerusalemu, O ta ũrĩa aakenagio nĩmo matukũ ma tene, o mĩaka-inĩ ĩrĩa yathirire tene.

5Ningĩ niĩ mwene nĩngoka harĩ inyuĩ ndĩmũkuhĩhĩrie, nĩguo ndĩmũcirithie, na ndĩmũtuĩre cira; na nĩngatuĩka mũira wa gũtuithĩria arogi cira narua, na itharia, o na arĩa mehĩtaga na maheni, ningĩ nduĩke mũira wa gũtuithĩria cira arĩa mahinyagĩrĩria arĩa amathũkũmĩri, makĩmaima mũcara, na arĩa mahinyagĩrĩria atumia a ndigwa, na ciana iria ikuĩrĩirũo nĩ maithe; o na arĩa mahĩtithagia ageni njĩra, na makaaga kwĩĩndigagĩra. Ũguo nĩguo Jehova Mũnene wa Ita ekuuga.

6Nĩ gũkorũo niĩ ndigarũrũkaga; na nĩkĩo gĩtũmĩte mũtũũre mũtarĩ mwaninũkio, inyuĩ ariũ a Jakubu.

7Kuuma o matukũ ma maithe manyu-rĩ, mũtũire o mũgarũrũkaga mũgatiga kũrũmia mĩtugo ĩrĩa nduĩte ya kũrũmĩrĩrũo. No rĩrĩ, Jehova Mũnene wa Ita ekũmwĩra atĩrĩ, Njokererani, na niĩ nĩngũmũcokerera. No inyuĩ mũũragia atĩrĩ, Tũgũgũcokerera atĩa?

8Anga mũndũ aahota gũtunya Ngai indo ciake? No inyuĩ nĩmũndunyaga indo ciakwa. Ningĩ mũgacoka kũũria atĩrĩ, Nĩ kĩ tũgũtunyĩte? Nĩ mĩhothi ya gĩcunjĩ gĩakwa gĩa ikũmi mũndunyaga, o na indo ingĩ iria ndutagĩrũo.

9Mũrĩ ageke mũkagwatwo nĩ kĩrumi, tondũ inyuĩ a rũrĩrĩ rũrũ inyuothe nĩ inyuĩ mũndunyaga indo ciakwa.

10Jehova Mũnene wa Ita ekuuga atĩrĩ, Nĩ kaba mũrehage mũhothi ũcio wa gĩcunjĩ gĩa ikũmi wothe mũũite ikũmbĩ rĩakwa, nĩguo nyũmba yakwa ĩgĩe irio; na mũndorie ũguo muone ũrĩa o na niĩ ngwĩka, muone kana ndingĩmũhingũrĩra ndirica cia igũrũ, ndĩmũikũrũkĩrie kĩrathimo kĩingĩ, o nginya mwage handũ kĩngĩiganĩra nĩ ũndũ wa ũrĩa kĩingĩhĩte.

11Ningĩ njoke ndĩmũkũmĩre cianangi indo, nĩguo itige kũũnũha irio cia mĩgũnda yanyu. Na mĩthabibu yanyu ĩĩ mũgũnda ndĩgacoka gũita maciaro mayo matarĩ meru. Ũguo nĩguo Jehova Mũnene wa Ita ekuuga.

12Nacio ndũrĩrĩ cidothe ikamũtuaga akenu, nĩ ũndũ mũrĩ a bũrũri ũrĩa ũkenagĩrũo makĩria. Ũguo nĩguo Jehova Mũnene wa Ita ekuuga.

13Ningĩ Jehova ekuuga atĩrĩrĩ, Gĩcambanio kĩanyu nĩkĩnginyĩrĩire, no inyuĩ muugaga atĩrĩ, Tũgũcambĩtie atĩa?

14Atĩrĩrĩ, nĩ kuuga muugaga atĩrĩ, Gũtungatĩra Ngai nĩ wĩra wa tũhũ, o nakuo kũmwathĩkĩra-rĩ, kũrĩ na uumithio ũrĩkũ? O na kana gũtinda twĩthikĩire tũgĩthĩnĩkaga mbere ya Jehova Mũnene wa Ita?

15Ningĩ rĩu tũtuaga andũ arĩa etĩi akenu, o nao arĩa aaganu nĩo matũũgagĩrio; ti-itherũ acio nĩmageragia Ngai na makahonoka.

16Hĩndĩ ĩo arĩa metigagĩra Jehova nĩmaaranĩirie o mũndũ na mũndũ ũrĩa ũngĩ, nake Jehova agĩthikĩrĩria akĩigua ũhoro wao; ningĩ ibuku rĩkĩandĩkwo rĩa gũtũma matũũre maririkanagwo, rĩkĩigwo mbere yake, rĩandĩkĩtwo marĩĩtwa ma andũ acio metigagĩra Jehova na magacũrania ũhoro wa rĩĩtwa rĩake.

17Nake Jehova Mũnene wa Ita ekuuga atĩrĩ, Acio nĩo ngatua akwa rĩrĩa mũthenya wakwa wa gĩathĩ ũgakinya, ndĩmatue andũ akwa kĩũmbe, mahaanĩte ta kĩndũ kĩamũre kĩa mũthithũ; ningĩ ndĩmacaĩre o ta ũrĩa mũndũ acayagĩra mũriũ ũrĩa ũmũtungatagĩra.

18Hĩndĩ ĩo nĩmũgacoka gũkũũrana mũndũ ũrĩa mũthingu na ũrĩa mwaganu, na mũkũũrane ũrĩa ũtungatagĩra Ngai na ũrĩa ũtamũtungatagĩra.

← Chapter 2 Jump to: Chapter 4 →