Micah 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1ĨNO NĨYO ndũmĩrĩri ya Jehova ĩrĩa yakinyĩrĩire Mika, Mũmorashiti, ĩkoniĩ Samaria na Jerusalemu, matukũ ma Jothamu, na Ahazu, na Hezekia, athamaki a Juda.

2Atĩrĩrĩi, inyuĩ andũ aya inyuothe, ta iguai; o nawe thĩ ĩno, hamwe na arĩa othe marĩ kuo-rĩ, ta thikĩrĩriai, nĩ getha Mwathani Jehova atuĩke mũira wa kũmuumbũrĩra, o we Mwathani ũrĩa ũtũire aikarĩte hekarũ-inĩ yake nyamũre.

3Nĩ ũndũ atĩrĩ, Jehova nĩ kuumagara ekuumagara oimĩte kũndũ gwake, aikũrũke gũkũ thĩ, arange matĩri ma kũndũ gũtũũgĩru ma gũkũ thĩ na makinya make.

4Nacio irĩma nĩ gũtweka igatweka ciahutio na makinya make ta irĩ mũhũra wĩ mwaki-inĩ, o nacio cianda ciatũkange o ta ũrĩa maĩ magayũkanganaga magĩitĩka kĩgaragaro-inĩ.

5Na rĩu-rĩ, maũndũ maya mothe monekete nĩ ũndũ wa ũrĩa nyũmba ya Jakubu yanaagarara watho, o na ũndũ wa mehia ma nyũmba ya Isiraeli. Rĩu-rĩ, ũhoro wa Jakubu wa kwagarara watho nĩ ũrĩkũ? Githĩ ti Samaria? Ningĩ matĩri ma kũndũ gũtũũgĩru ma Juda nĩ marĩkũ? Githĩ timo Jerusalemu?

6Tondũ ũcio Samaria ngagũtua o ta kũndũ kwĩ hĩba cia mahiga mĩgũnda-inĩ, o na ta kũndũ gwa kũhandwo mĩthabibu; namo mahiga makuo ngamahurunja kĩanda-inĩ, nacio itina ciakuo ndĩcithikũrie.

7Mĩhianano yakuo yothe ya gwacũhio nĩ kũmemendwo ĩkamemendwo, nakĩo kĩndũ o gĩothe kĩrĩa kĩaheanĩirũo ũmaraya gĩcinwo na mwaki, o nayo mĩhianano yakuo yothe ya kũhoyũo ndĩmĩanangithie; nĩ gũkorũo yathondekithirio na mũcara o ũcio wa ũmaraya, nayo ĩgacoka gũtuĩka o ya mũcara wa ũmaraya o ro ũguo.

8Tondũ ũcio nĩ kũgirĩka ngũgirĩka na ndĩre na kĩgi, na ’thiĩ njaga ndĩĩyaũrĩte nguo; ngũgirĩka o ta ũrĩa mbwe igirĩkaga, o na njakae ta nyaga.

9Nĩ ũndũ nguraro ciakuo itingĩhoneka, tondũ nĩitheete igakinya o Juda, o na igakinya o kĩhingo-inĩ kĩa andũ akwa, o gũkũ Jerusalemu.

10Menyai mũheane ũhoro ũcio Gathu, na mũtikeyonanie mũkĩrĩra, ningĩ kũu Bethi-le-Afara mwĩgaragarie rũkũngũ-inĩ.

11Atĩrĩrĩ, wee ũtũũraga Shafira, wĩthiĩre o ro ũguo njaga, wĩ mũconorithie. Ũrĩa ũtũũraga Zaanani ndangĩeta kuumagara, ningĩ kĩrĩro kĩa Bethi-ezeli nĩgĩgũgũtunya ũikaro waku.

12Nĩ gũkorũo mũndũ ũrĩa ũtũũraga Marothu aikaraga e na gĩthethũko, etereire kana hihi nĩekuona maũndũ mega, nĩ ũndũ ũũru nĩ mũikũrũku uumĩte he Jehova ũgakinya o ihingo-inĩ cia Jerusalemu.

13Atĩrĩrĩ, wee ũtũũraga Lakishi, ngari yaku ya ita-rĩ, mĩoherere mbarathi ĩrĩa ndeng’eri mũno, tondũ nĩwe warĩ kĩhumo kĩa ũhoro wa mwarĩ wa Zayuni wa kwĩhia, tondũ ũhoro wa Isiraeli wa kwagarara watho woimanire nawe.

14Tondũ ũcio no ũhe Moreshethu-gathu nduhi ya kuuganĩra ũhoro. Nyũmba cia Akizibu nĩigatuĩka ũndũ wa kũhenia athamaki a Isiraeli.

15Atĩrĩrĩ, wee ũtũũraga Maresha, nĩ kũrehe ngakũrehithĩrie mũndũ wa gũkwĩgwatĩra ũtuĩke wake; naguo riri wa Isiraeli nĩũgathenga ũkinye o Adulamu.

16Wĩtue kĩhara, na wĩenje kang’aũ, nĩ ũndũ wa ciana iria wĩkenagĩra nĩcio; wĩenje mũno o nginya ũtuĩke ta nderi, nĩ ũndũ ciana icio ciaku nĩirindũrĩtwo igatahwo.

Jump to: Chapter 2 →