Micah 7

Kikuyu Bible (IBUKU RĨRĨA ITHERU RĨA NGAI)

← Chapter 6 Jump to:

1Hĩ! Ĩiya-wakwa-ĩ! Ndariĩ o ta rĩrĩa maciaro marĩkĩtie kũgethwo hĩndĩ ya ũrugarĩ, ngatuĩka o ta thabibu iria icokaga kũhaarũo thutha wa magetha ma thabibu; hatirĩ kĩmanjika gĩa kũrĩo, o na kana ngũyũ iria ciambaga kwĩrua, o iria ngoro yakwa ĩĩriragĩria.

2Andũ arĩa metigĩrĩte Ngai nĩmathirĩte o gũthira gũkũ thĩ, na gũtirĩ mũndũ o na ũmwe mwerekereru thĩinĩ wa andũ; othe maikaraga moheirie arĩa angĩ nĩguo mamaitithie thakame; nao mũndũ o mũndũ akaambĩra mũrũ wa ithe mũtego.

3Merutanagĩria na kĩyo nĩguo mekage ũũru na moko mao merĩ; mũtongoria nĩ gwĩtia etanagia nduhi, nake mũciri agetania ihaki, o nake mũnene akaaria maũndũ ma ũmaramari marĩa moimaga ngoro-inĩ yake; ũguo nĩguo mahĩngĩcanagia maũndũ mao.

4Na mũndũ ũrĩa mwegega kũrĩ arĩa angĩ thĩinĩ wao-rĩ, atariĩ o ta cong’e, nake ũrĩa mwerekereru gũkĩra arĩa angĩ nĩ mũthũku gũkĩra rũirigo rũa mĩigua. Mũthenya ũrĩa arangĩri aku maatũire makuumbũragĩra ũhoro waguo nĩ mũkinyu, o ihinda rĩaku rĩa kũherithio. Andũ rĩu no marigicanio.

5Menyai mwĩhoke mũrata, o na kana mwĩhoke wathiomo; menyerera mĩromo ya kanua gaku ndũkahe mũtumia waku ũcio ũkomaga gĩthũri-inĩ gĩaku ũhoro.

6Nĩ ũndũ mũriũ amenagĩrĩria ithe, nake mũirĩtu akarema nyina, o nake mũtumia wa mũriũ akarema nyaciarawe; ti-itherũ andũ arĩa megũtuĩka thũ cia mũndũ no andũ a nyũmba yake kĩũmbe.

7No rĩrĩ, niĩ hakwa-rĩ, ndĩrĩcũthagĩrĩria o Jehova; Ngai wa ũhonokio wakwa nĩwe ndĩrĩetagĩrĩra, nake Ngai wakwa nĩarĩnjiguaga.

8Atĩrĩrĩ, inyuĩ thũ ciakwa, tigai kũngenerera; ingĩgũa-rĩ, ndirĩ hingo itegũũkĩra, o na hĩndĩ ĩrĩa njikarĩte nduma-inĩ-rĩ, Jehova nĩwe ũrĩtuĩkaga ũtheri wakwa.

9Nĩngũkirĩrĩria mathũgũta ma Jehova nĩ ũndũ nĩndĩmwĩhĩtie; ĩĩ, ti-itherũ, nĩngũmakirĩrĩria o nginya rĩrĩa akandũĩrĩra, na a’hingĩrie matuĩro make ma kĩhooto; ningĩ nĩwe ũkanyumagaria andware ũtheri-inĩ, na niĩ ndĩĩonagĩre ũthingu wake.

10Hĩndĩ ĩo thũ ciakwa nĩikeyonera ũndũ ũcio, ihumbwo nĩ thoni, o icio itũire injũragia atĩrĩ, Kaĩ Jehova Ngai waku akĩrĩ ha? Rĩu nĩ hĩndĩ maitho makwa megũciĩonera irangĩriirio thĩ o ta ndaka ya njĩra-inĩ.

11Mũthenya wa gũcokia thingo ciaku wĩ hakuhĩ, na mũthenya ũcio nĩũkehererio mũgiro ũhirũo haraya.

12Mũthenya ũcio-rĩ, andũ aku magakũũnganĩra moimĩte Ashuri o kinya matũũra ma Misiri, na moime bũrũri wothe ũrĩa wĩ gatagatĩ ka Misiri na rũũĩ rũa Farati, na moime bũrũri wothe ũrĩa wĩ gatagatĩ ka iria rĩrĩ na rĩrĩ rĩngĩ, o na bũrũri wothe ũrĩa wĩ gatagatĩ ga kĩrĩma gĩkĩ na gĩkĩ kĩngĩ.

13No rĩrĩ, o na gwatuĩka nĩ ũguo-rĩ, bũrũri nĩũkaanangwo ũkire ihooru, nĩ ũndũ wa ciĩko cia andũ arĩa matũũraga kuo.

14Riĩra andũ aku na rũthanju rũaku, nĩo rũũru rũa mbũri cia ũgai waku, tondũ rũĩrĩithagia rũĩ ruiki mũtitũ-inĩ wa Karimeli thĩinĩ; nĩrũcoke kũrĩithio Bashani na Gileadi, o ta ũrĩa warĩithagio matukũ marĩa ma tene.

15O ta ũrĩa gwatariĩ matukũ marĩa woimagarire ũkiuma bũrũri wa Misiri-rĩ, ũguo noguo ngamuonia maũndũ ma kũgegania.

16Ndũrĩrĩ nĩikeyonera maũndũ macio, icoke gũconoka nĩ ũndũ wa ũrĩa hinya wacio wothe wĩ wa tũhũ; nacio ciĩhumbe kanua na moko, na ihingare matũ ciage kũigua.

17Igaturumithia kanua tĩri-inĩ ta nyamũ-ya-thĩ, na ciume kũndũ gwacio kwa hitho ikĩinainaga, ikurumĩte ta nyamũ iria ikurumaga cia gũkũ thĩ; nacio ithiĩ ikinye he Jehova Ngai witũ iguoyohete mũno, na ciĩtigire mũno nĩ ũndũ waku.

18Nĩ Mũrungu ũrĩkũ ũtariĩ tawe, ũrĩa wohanagĩra ũũru, o na agakiranĩra ũũru wa kwagarara watho wa matigari ma andũ ake, o arĩa egwatĩire igai? Ndangĩtũũra arakarĩte nginya tene na tene, nĩ ũndũ ekenagĩra nĩ ũhoro wa gũtugana.

19Nĩagatũgarũrũkĩra atũiguĩre tha, o na arangĩrĩrie ũũru witũ thĩ na makinya make; namo mehia mao mothe ũmaikie kũndũ kũrĩa kũriku mũno iria-inĩ.

20Jakubu ũkamwathĩrĩria maũndũ ma ũhoro-wa-ma, na ũtugage Iburahimu, nĩguo ũhingie maũndũ marĩa wehĩtire ũkiuga atĩ nĩũkahe maithe maitũ kuuma o matukũ ma tene.

← Chapter 6 Jump to: