Nehemiah 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to: Chapter 4 →

1Hĩndĩ ĩo Eliashibu, mũthĩnjĩri-Ngai ũrĩa mũnene, agĩgĩũkĩra me na ariũ a ithe arĩa angĩ athĩnjĩri-Ngai, magĩaka Kĩhingo kĩa Ng’ondu; nao magĩkĩamũrĩra Jehova, o nayo mĩrango yakĩo makĩmĩĩkĩra; makĩmĩamũra o nginya mũthiringo-inĩ wa nyũmba ndaya na igũrũ wa Hamea, o hau mũthiringo-inĩ wa nyũmba ndaya na igũrũ wa Hananeli.

2Nao andũ arĩa maariganĩtie nake magĩaka-rĩ, nĩ andũ a Jeriko. Nake mũndũ ũrĩa wariganĩtie na acio agĩaka nĩ Zakuri wa Imuri.

3Nakĩo Kĩhingo gĩa Ciũngũyũ nĩ ariũ a Hasenaa maagĩakire, na nĩo mekĩrire hingĩro ciakĩo, o nayo mĩrango yakĩo makĩmĩĩkĩra handũ hayo, na makĩmĩĩkĩra icuuma cia kũmĩhinga, o na igera ciayo cia kũmĩĩkĩra hinya.

4Ningĩ arĩa maarigainie na acio magĩcokereria rũthingo rũu, nĩ Meremothu, mũrũ wa Uria wa Hakozu. O nake ũrĩa wariganĩtie na acio akĩrũcokereria nĩ Meshulamu, mũrũ wa Berekia wa Meshezabeli. O nake ũrĩa wariganĩtie na acio akĩrũcokereria nĩ Zadoku wa Baana.

5O nao arĩa maariganĩtie na acio makĩrũcokereria nĩ Atekoa; no rĩrĩ, anene ao matiigana kwĩnogia na wĩra ũcio wa mwathi wao.

6Ningĩ Kĩhingo gĩa Tene-rĩ, Joiada wa Pasea, na Meshulamu wa Besodeia, nĩo maagĩcokereirie, na magĩgĩĩkĩra hingĩro ciakĩo; o nayo mĩrango yakĩo makĩmĩĩkĩra handũ hayo na makĩmĩĩkĩra icuuma ciayo cia kũmĩhinga, o na igera cia kũmĩĩkĩra hinya.

7O nao arĩa maariganĩtie nao icokererio-inĩ rĩa rũthingo rũu, nĩ Melatia, Mũgibeoni, na Jadoni, Mũmeronothi, o na andũ a Gibeoni na a Mizipa, namo matũũra macio nĩmo maathagwo nĩ barũthi ũrĩa wa mũrĩmo ũyũ wa rũũĩ rũa Farati.

8Nao arĩa maariganĩtie nao icokererio-inĩ rĩa rũthingo rũu nĩ Ũzieli wa Harihaia, wa aturi a thahabu. Na mũndũ ũrĩa wariganĩtie nao icokererio-inĩ rĩaruo, nĩ Hanania, wa thiritũ ya andũ arĩa ohĩgĩrĩru ũtakania wa ndawa, nao nĩo mekĩrire rũthingo rũu rũa Jerusalemu hinya makĩrũkinyia rũthingo-inĩ rũrĩa rũariĩ.

9Nake mũndũ ũrĩa wariganĩtie nao icokererio-inĩ rĩaruo, nĩ Refaia wa Huri, ũrĩa warĩ mwathi wa nuthu ya bũrũri ũrĩa ũgwataine na Jerusalemu.

10Nake mũndũ ũrĩa wariganĩtie nake icokererio-inĩ rĩaruo, nĩ Jedaia wa Harumafu, nake aarũcokereirie harĩa haariganĩtie na nyũmba yake we mwene. Nake mũndũ ũrĩa wariganĩtie nake icokererio-inĩ rĩaruo nĩ Hatushu wa Hashabuneia.

11Nao Malikija wa Harimu, na Hashubu wa Pahathu-moabi, magĩcokereria gĩcunjĩ kĩngĩ, o na kĩmũthiringo kĩa nyũmba ndaya na igũrũ ya macua ma mwaki wa gũtwekia igera.

12Nake mũndũ ũrĩa wariganĩtie nao icokererio-inĩ rĩaruo, nĩ Shalumu wa Haloheshu, mwathi wa nuthu ĩrĩa ĩngĩ ya bũrũri ũrĩa ũgwataine na Jerusalemu, me na airĩtu ake.

13Nakĩo Kĩhingo gĩa Kĩanda gĩgĩcokererio nĩ Hanuni, me na andũ arĩa maatũũraga Zanoa; nĩo maagĩakire, o nayo mĩrango yakĩo makĩmĩĩkĩra handũ hayo, nacio icuuma cia kũmĩhinga, o na igera ciayo cia kũmĩĩkĩra hinya, magĩciĩkĩra; ningĩ magĩgĩcokereria handũ ha mĩkono ngiri ĩmwe ya rũthingo rũu, makĩrũkinyia Kĩhingo-inĩ gĩa Kĩara-inĩ.

14Nakĩo Kĩhingo kĩu gĩa Kĩara-inĩ gĩgĩcokererio nĩ Malikija wa Rekabu, mwathi wa bũrũri ũrĩa ũgwataine na Bethi-hakeremu; agĩgĩaka, o na agĩĩkĩra mĩrango yakĩo handũ hayo, o na icuuma cia kũmĩhinga; nacio igera ciayo cia kũmĩĩkĩra hinya nĩwe waciĩkĩrire.

15Nakĩo Kĩhingo gĩa Gĩthima gĩgĩcokererio nĩ Shalumu wa Kolihoze, mwathi wa bũrũri ũrĩa ũgwataine na Mizipa; agĩgĩaka, na agĩkĩgita, o na agĩĩkĩra mĩrango yakĩo handũ hayo; agĩcoka agĩĩkĩra icuuma cia kũmĩhinga, o na igera cia kũmĩĩkĩra hinya. O na ningĩ nĩwe waakire rũthingo rũa Karia ga Shela, hakuhĩ na mũgũnda wa mũthamaki, o nginya ngathĩ-inĩ ĩrĩa ĩthiaga ĩikũrũkĩte yumĩte itũũra rĩa Daudi.

16Nake mũndũ ũrĩa wariganĩtie nake icokererio-inĩ rĩu, nĩ Nehemia wa Azibuku, mwathi wa nuthu ya bũrũri ũrĩa ũgwataine na Bethi-zuru, nake agĩkĩrũkinyia handũ harĩa haarigainie na mbĩrĩra cia Daudi, o na karia-inĩ karĩa kenjetwo tene, o na nyũmba-inĩ ya andũ arĩa maarĩ njamba.

17Nao Alawii, aa Rehumu wa Bani, nĩo maariganĩtie nake magĩgĩcokereria rũthingo rũu. Nake mũndũ ũrĩa wariganĩtie nake icokererio-inĩ rĩaruo nĩ Hashabia, mwathi wa nuthu ya bũrũri ũrĩa ũgwataine na Keila, nake aarũcokereirie nĩ ũndũ wĩra waho wakoniĩ andũ a bũrũri ũcio aathanaga.

18Nao andũ arĩa maariganĩtie nake icokererio-inĩ rĩaruo nĩ ariũ a ithe wao, nao nĩ aa Bavai wa Henadadi, mwathi wa nuthu ĩrĩa ĩngĩ ya bũrũri ũrĩa ũgwataine na Keila.

19Nake mũndũ ũrĩa wariganĩtie nake icokererio-inĩ rĩaruo nĩ Ezeri wa Jeshua, mwathi wa Mizipa, nake aakire gĩcigo kĩrĩa kĩringaine na rĩambatĩro-inĩ rĩa ũigo wa indo cia mbaara, rĩĩthiorero-inĩ rĩa rũthingo.

20Nake mũndũ ũrĩa wariganĩtie nake, agĩcokereria gĩcigo kĩngĩ na kĩyo mũno, nĩ Baruku wa Zabai, arutĩtie rĩĩthiorero-inĩ rĩu rĩa rũthingo rũu, o nginya mũrango-inĩ wa nyũmba ya Eliashibu, mũthĩnjĩri-Ngai ũrĩa mũnene.

21Nake mũndũ ũrĩa wariganĩtie nake, agĩcokereria gĩcigo kĩngĩ, nĩ Meremothu, mũrũ wa Uria wa Hakozu, arutĩtie mũrango-inĩ wa nyũmba ya Eliashibu, o nginya harĩa nyũmba ĩo ya Eliashibu yathirĩire.

22Nao arĩa maariganĩtie nake icokererio-inĩ rĩaruo nĩ athĩnjĩri-Ngai arĩa maatũire Bũrũri ũrĩa Mũgũu.

23Nao arĩa maariganĩtie nao, makĩrũcokereria, nĩ Benjamini na Hashubu, nao maakire o handũ harĩa haaringanĩte na nyũmba yao. Nake mũndũ ũrĩa wariganĩtie nao icokererio-inĩ rĩaruo nĩ Azaria, mũrũ wa Maaseia wa Anania, nake aakire o mwena-inĩ wa nyũmba yake we mwene.

24Nake ũrĩa wariganĩtie nake, agĩcokereria gĩcigo kĩngĩ, nĩ Binui wa Henadadi, arutĩtie nyũmba ya Azaria o nginya rĩĩthiorero-inĩ rĩa rũthingo, o na koine-inĩ.

25Na rĩrĩ, Palali, mũrũ wa Uzai, nĩwe wacokereirie handũ harĩa haaringanĩte na rĩĩthiorero rĩa rũthingo rũu, o na mũthiringo wa nyũmba ndaya na ĩgũrũ ĩrĩa yacomokete na mwena o kũu nyũmba-inĩ ya mũthamaki ya na igũrũ, gũkuhĩ na nja ya arangĩri. Nake mũndũ ũrĩa wariganĩtie nake icokererio-inĩ rĩa rũthingo rũu, nĩ Pedaia wa Paroshu.

26(Na rĩrĩ, Anethini nĩo maatũire Ofeli, o nginya Kĩhingo-inĩ kĩa Maĩ, mwena ũrĩa ũrorete irathĩro, o na mũthiringo-inĩ wa nyũmba ndaya na igũrũ ĩrĩa ĩcomokete na mwena.)

27Nao arĩa maariganĩtie na Pedaia, magĩcokereria gĩcunjĩ kĩngĩ, nakĩo nĩ kĩrĩa kĩringanĩte na mũthiringo wa nyũmba ndaya na igũrũ ĩrĩa nene ĩcomokete mwena-inĩ wa rũthingo, nĩ Atekoa; makĩrũcokereria o nginya rũthingo rũa Ofeli.

28Nao athĩnjĩri-Ngai magĩthondeka mwena wa igũrũ wa Kĩhingo kĩa Mbarathi, o mũndũ agĩcokereria harĩa haringaine na nyũmba yake we mwene.

29Nake mũndũ ũrĩa wariganĩtie nao icokererio-inĩ rĩaruo nĩ Zadoku wa Imeri, o handũ harĩa haringanĩte na nyũmba yake mwene. Nake mũndũ ũrĩa wariganĩtie nake icokererio-inĩ rĩaruo nĩ Shemaia wa Shekania, na nĩwe warĩ mũikaria wa Kĩhingo kĩa Mwena wa Irathĩro.

30Nao arĩa maariganĩtie nake, magĩcokereria gĩcigo kĩngĩ, nĩ Hanania wa Shelemia, o na Hanuni, mũrũ wa Zalafu wa atandatũ. Nake ũrĩa wariganĩtie nake icokererio-inĩ rĩa rũthingo rũu, nĩ Meshulamu wa Berekia, o handũ harĩa haringanĩte na kanyũmba gake.

31Nake mũndũ ũrĩa wariganĩtie nake akĩrũcokereria nĩ Malikija, wa aturi a thahabu, nake akĩrũkinyia o nyũmba-inĩ ya Anethini, o na ya onjorithia, kũrĩa kũringaine na Kĩhingo kĩa Hamifikadi, o na ihaicĩro-inĩ rĩa koine.

32Nao andũ arĩa maariganĩtie nake magĩcokereria rũthingo rũu o kũu gatagatĩ-inĩ ka ihaicĩro rĩu rĩa koine na Kĩhingo kĩa Mbũri, nĩ aturi a thahabu o na onjorithia.

← Chapter 2 Jump to: Chapter 4 →