Zephaniah 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to:

1Hĩ! Kaĩ itũũra rĩrĩa iremu, o rĩu rĩĩgwatĩtie thahu na rĩkaiyũra maũndũ ma kũhinyanĩrĩria, rĩĩ na haaro-ĩ!

2Andũ arĩo matiigana gwathĩkĩra uuge wa Jehova, o na kana magĩĩtĩkĩra gũtaarũo; matiigana kũmwĩhoka, o na kana magĩthengerera Ngai wao.

3Anene arĩo arĩa marĩ o kũu thĩinĩ warĩo-rĩ, marumaga o ta mĩrũthi, o nao aciri arĩo makorokete ta njũi iria icangaga kĩhwaĩ-inĩ; matirĩ kĩndũ o na kĩ mangĩtigia gĩkinyie rũcinĩ.

4Anabii arĩo nĩ andũ hatarĩ, na nĩ andũ akunyanĩri andũ arĩa angĩ; nao athĩnjĩri-Ngai arĩo nĩmathahĩtie handũ harĩa haamũre, na magathũkia watho, makaũhotomia.

5Jehova ũrĩa ũtũũraga thĩinĩ warĩo nowe mũthingu, na ndarĩ ũũru angĩĩka; rũcinĩ o rũcinĩ-rĩ, nĩguo arokaga kuumĩria ũtuanĩri cira na kĩhooto ũtheri-inĩ, atekũhĩtĩra; no rĩrĩ, andũ arĩa matarĩ athingu matirĩ rũkobe.

6Nĩ kũnina ’ninĩte ndũrĩrĩ, nacio nyũmba ciacio cia mbaara iria ciakĩtwo o kũu matũũra-inĩ nĩ nyanange; o nacio ing’aratua ciacio cia njĩra nĩndũmĩte ikire ihooru, na itirĩ mũgendi ũracigera; matũũra mao nĩmaninĩtwo o nginya makaaga andũ, na matirĩ mũndũ ũmatũũrĩte.

7Niĩ na niĩ ngiuga atĩrĩ, Rĩu nĩ hĩndĩ mũkwĩĩndigĩra, na mwĩtĩkĩre gũtaarũo, nĩ getha ũhoro wa itũũra wa gũtũũrũo ndũkaninũkio, o ta ũrĩa maũndũ mothe matariĩ marĩa nduĩte nĩ ũndũ warĩo; no rĩrĩ, maarokire gũũkĩra rũcinĩ tene magĩthũkia ciĩko ciao ciothe.

8Tondũ ũcio Jehova ekuuga atĩrĩ, Ikaragai mũnjetereire, o nginya mũthenya ũrĩa ngaarahũka ndahane; amu nĩ gũtua nduĩte atĩ nĩngacokanĩrĩria ndũrĩrĩ nĩ getha nyũnganithie andũ a kũndũ guothe kũrĩa gũthamakagwo nĩ athamaki, nĩ getha ndĩmaitĩre mang’ũrĩka makwa, o marakara makwa mothe marĩa meĩ mũno; nĩ gũkorũo thĩ yothe nĩĩkarĩo nĩ ũiru wakwa ũhaana ta mwaki, ĩninwo biũ.

9Nĩ gũkorũo hĩndĩ ĩo nĩguo ngatheria tũnua twa andũ a ndũrĩrĩ ndĩmahe mwarĩrie ũngĩ mwega ũtarĩ wa ndũire, nĩ getha othe makayagĩre rĩĩtwa rĩa Jehova, nĩguo mamũtungatagĩre na kĩrĩko o ro kĩmwe.

10Kuuma o na kũrĩa mbarĩ ĩrĩa ĩngĩ ya njũĩ cia Kushi, andũ akwa arĩa ma’thaithaga a kĩruka kĩa andũ akwa arĩa maahurunjũkire-rĩ, nĩmakandehere indo ciakwa cia magongona.

11Mũthenya ũcio-rĩ, ndũgaconorũo nĩ ciĩko ciaku ciothe iria waneka, o icio cia kũnjũkĩrĩra ũkĩagarara watho wakwa; nĩ gũkorũo hĩndĩ ĩo nĩngakwehereria andũ arĩa makenagĩra mwĩĩkĩrĩro waku, mehere thĩinĩ waku, nawe ndũgacoka kwĩgatha wĩ kĩrĩma-inĩ gĩakwa kĩamũre o na rĩ.

12No rĩrĩ, kũu thĩinĩ waku nĩngatigia andũ arĩa anyamarĩku na arĩa athĩni, nao nĩo magaikaraga mehokete rĩĩtwa rĩa Jehova.

13Nao andũ acio magatigara a Isiraeli matigacoka gwĩka ũũru, o na kana maarie ndeto cia maheni, o na kana rũrĩmĩ rũkwaria mathara ruoneke tũnua-inĩ twao; nĩ ũndũ nĩmarĩrĩaga na magakoma, na maage mũndũ ũkamaguoyohia.

14Atĩrĩrĩ, wee mwarĩ wa Zayuni, ina rũĩmbo, o nawe Isiraeli-rĩ, anĩrĩra mũno; o nawe mwarĩ wa Jerusalemu canjamũka, o na ũkene na ngoro yaku yothe.

15Jehova nĩakuoheire agatiga gũkũhingĩria matuĩro ma cira waku, nacio thũ ciaku nĩacithinĩkanĩtie; mũthamaki wa Isiraeli arĩ thĩinĩ waku, nake nĩwe Jehova; wee ndũgacoka kuonerũo kĩrĩi o na rĩ.

16Mũthenya ũcio Jerusalemu rĩkerũo atĩrĩ, Menya ũkanetigĩra; o narĩo Zayuni rĩĩrũo atĩrĩ, Menya ũkanaregeria moko maku.

17Jehova Ngai waku arĩ thĩinĩ waku, o we ũrĩa hoti ya kũhonokania; nĩarĩgũkenagĩra agũthereire ngoro, na agũkirĩre nĩ ũndũ wa ũrĩa akwendete mũno; agagũkũngũĩra na ndũrũhĩ cia nyĩmbo.

18Nĩngacokanĩrĩria andũ aku arĩa me na kĩeha nĩ ũndũ wa ciathĩ iria njathane, iria ndamũimire, o acio matũire matitikithĩtio rũmena rũrĩa ũmenetwo ta arĩ mũrigo.

19Atĩrĩrĩ, ihinda rĩu-rĩ, nĩngerĩhĩria harĩ andũ othe arĩa makũnyariraga, o nake mũndũ ũrĩa ũgũthua ndĩmũhonokie, o nake ũrĩa ũingatĩtwo ndĩmũhũndũre acoke mũciĩ; o nao arĩa matũire maconorithĩtio gũkũ thĩ guothe ndĩmagoocithie na ndũme magĩe igweta.

20Ihinda rĩu-rĩ, nĩ kũinũkia ngamũinũkia, o hĩndĩ ĩrĩa ngamũcokereria; nĩ ũndũ nĩngatũma mũgĩe igweta, o na mũtuĩke a kũgoocagwo ndũrĩrĩ-inĩ ciothe cia thĩ, hĩndĩ ĩrĩa ngakorũo ’hũndũrĩte andũ anyu arĩa maarindũrirũo ngamacokia mũciĩ, o mũkĩĩonagĩra ũndũ ũcio na maitho manyu; ũguo nĩguo Jehova ekuuga.

← Chapter 2 Jump to: