2 Samuel 23

Kalenjin Bible Revised (BUKUIT NE TILIIL Sireet ne Dutero Kanon)

← Chapter 22 Jump to: Chapter 24 →

1Chu anyun ko ng'aleek che po let che po Daudi. Ng'alaalutigap Daudi weeriitap Jesse, Chuuto ng'aleegap chiito ne ki itoroor Kamuktaindet, ne iilaat ne po Kamuktaindetap Jakobo, ne chamat ne po tyenwogigap Israel.

2Ki ng'alaalena Kabuusetap Kamuktaindet ne Toroor, ak ki mi ng'olyoondennyi ng'elyeptanyu.

3Ki ng'alaal Kamuktaindetap Israel, ki ng'alaalwo Rwandetap Israel kole: “Ineendet ne pou piik eng' imanda, ko ingoboi eng' kaiyweisyetap Kamuktaindet,

4ko kergeitu ak lapkeiyet ne po karon, ye charu asiista eng' karonet ne lapkei, ye piitos susweek che ng'orng'oren, eng' kaluunet ne lapkei ko kamoen ropta.”

5Tos ma uu nooto iman koonnyu eng' Kamuktaindet? Tos ma ki koyomiswa kayomiset ne po koigeny, ne ki kichop eng' tuguuk tugul ak ko ne lumdaat? Amu nooto ko yetunennyu tugul ak ko magennyu tugul, Agot ngo ma yai kotesak.

6Ago kergeitu tugul che ma iywei Kamuktaindet ne Toroor ak katook che ki wiirtoi, amu ma namaksei eng' euut.

7Ago chiito ne namei ko kanyool kotinyei kariik ak irumetap ng'otit; kibeelei eng' maat kogeskei eng' komostanywa.

8Chu ko kainaigap murenik che nyigoonen che ki tinyei Daudi: Joseb-basebet Takemonindet, ne oo eng' kiptainik somok. Ineendet ne kibar piik pogol sisiit eng' ng'otinnyi peetuunak.

9Rubeiywnnyi eng' che kirubei ineendet ko ki Eleazar weeriitap Dodai weeriitap Ahoindet. Ineendet ko ki agenge eng' murenichooto somok nyigoonen che ki mi ak Daudi ye kichotei Philistiik che kiga iyumgei eng' yooto agobo lugeet ak kiga koba murenigap Israel.

10Ki ng'eet kobar Philistiik kot kong'et eunnyi ak koyaam eunnyi koyaamji rotwetap chok. Ki iyai Kamuktaindet ne Toroor katerteeret ne oo peetuunooto. Ak ki week piik kityo koosup ineendet koba konyaban tuguuk.

11Ne rubei ineendet ko ki Shammah weeriitap Agee Hararindet. Kingo yumgei Philistiik koek lugeet, eng' ole ki mi mbareet ne mi sogorik che chaang', komwee piigap Israel icheek.

12Ago ki tonon Shammah eng' kwenutap mbaranooto, koeet mbareet ak ki par Philistiik ak ki yai Kamuktaindet ne Toroor katerteeret ne oo.

13Ki choortagei somogu eng' pounik che eecheen sosom, ak koba ole mi Daudi eng' peetuusyegap kesisyet agoi kebeneetap Adulam ak kiga teech lugeetap Philistiik atebweetap Repaim.

14Eng' kasarata, ko ki mi `Daudi irimeet ak kimi lugeetap Philistiik Bethlehem.

15Ki am melelda `Daudi ak ki le, “Oiye, inaga ng'oo peegap keriingetap peek ne mi Bethlehem ne neegitee ormariichet, aee”

16Kichut lugeetap Philistiik `murenjoto nyigoonen somogu, koba koram peek eng' keriingonooto po peek ne mi Bethlehem, ne ki mi ye neegitee ormariichet yeityo koipchi Daudi. Ago ma cham koe, kitumda eng' taitap Kamuktaindet ne Toroor.

17Ki le, “Ingolooit eng' anee, ee Kamuktaindet ne Toroor, si ma yai kii. Tos ma korotiigap piik che kachut ng'oiyondit saboonwekwak?” Ma cham anyun koe amu nooto. Chuuto anyun tuguuk che ki yai pichooto somogu nyigoonen.

18Ki ne oo eng' chooto somok Abisai ng'eetap kametap Joab weeriitap Zeruiah ak ki nam ng'otinnyi ak kobar piik pogol somok ak ki took kainennyi eng' murenjoto somok.

19Tos ma ineendet ne ki tinyei teegisto miising' eng' chooto somok? Ki kiyai ineendet anyun koek kiptaiyannywa, ago ma ityi chugai somok po tai.

20Benaiah weeriitap Jehoiada, weeriit ne nyigan ne punu Kabseel, ineendet ne ki yai poisyonik che eecheen: ki par weeriik aeng' che po Ariel che po Moab; kichoortagei kogeny kwo kobar ng'etundo eng' kwenutap keriinget eng' peetuusyegap teluji;

21ak ki par Misirindet murenet ne karaaran. Nga ki tinyei misirindonooto ng'otit eng' eunnyi, ko ki choortagei kwo ole mi ineendet ak kirokto yeityo kong'us ng'otit eng' eutap misirindonooto ak kobare ng'otinnyi.

22Ki yai tuguuchuuto Benaiah weeriitap Jehoiada ak ki took kainennyi eng' murenjoto somok nyigoonen.

23Ki sich teegisto kosiir chooto somok, ago ma ityi chugai somok po tai. Ki inde `Daudi ineendet koboi riibiikyik.

24Alak eng' chooto sosom ko ki: Asahel ng'eetap kametap Joab, Elanan weeriitap Dodo ne po Bethlehem,

25Shammah Harodindet, Elika Harodindet,

26Heles Paltindet, Ira weeriitap Ikes Tekoindet,

27Abiezer Anatotindet, Mebunai Husatindet,

28Salmon Aoindet, Maarai Netopatindet,

29Heleb weeriitap Baanah Netopatindet, Itai weeriitap Ribai ne po Gibea ne po lagogap Benjamin,

30Benaiah Piratonindet, Idai ne po ainoosyegap Gaas,

31Abi-albon Arbatindet, Asmabet Baharumindet,

32Eliaba Saalbonindet, weeriigap Jasen, Jonathan;

33Shammah Hararindet, Aiam weeriitap Sarar Ararindet,

34Eliphelet weeriitap Aasbai, weeriitap Maakatindet, Eliam weeriitap Ahitopel Gilonindet,

35Hesro Karmelindet, Paarai Arbindet,

36Igal weeriitap Nathan ne po Soba, Bani Gadindet,

37Selek Amonindet, Naarai Beerotindet, ne ki ipchin kariik Joab weeriitap Zeruiah,

38Ira Itrindet, Gareb Itrindet ak

39Uriah Hitindet. Ki sosom ak tisap pichooto tugul.

← Chapter 22 Jump to: Chapter 24 →

Recommended Reading

Commentary 2 Samuel Commentaries → Devotional 2 Samuel Devotional Guide → Get This Bible Kalenjin Bible Revised (BUKUIT NE TILIIL Sireet ne Dutero Kanon) Study Bible →