Deuteronomy 14

Kalenjin Bible Revised (BUKUIT NE TILIIL Sireet ne Dutero Kanon)

← Chapter 13 Jump to: Chapter 15 →

1“Oo lagogap Kamuktaindet ne Toroor Kamuktaindeng'wong': amowat poorwekwok anan amotuumet agobo chii ne kame.

2Amu ii pororyet ne tiliil eng' Kamuktaindet ne Toroor Kamuktaindeng'ung' ak ki kolewenin Kamuktaindet ne Toroor iegu pororyennyi ne itabaanat kosiir pororyosyek tugul che mi ng'wony.

3“Amat iam kiy age tugul ne kiwechei.

4Chu tyong'ik che oame: teta, keechiiryet, ng'orooryet,

5ak che uu teweretyot, kenyeleet ak chemnyogoset, ng'ororyetap timiin ak kiplelgutyet ak kenyeleet ak sitwet.

6Ome tyony age tugul ne pcheotin siyok, che kipcheunegei aeng' ne itori paroi eng' tyong'ik.

7Ago amat oam chu eng' che itori paroi anan che petotin siyok: tambeesyet, kiplengwet keneryet, amu itori paroi ago ma pcheotin siyok; ng'woneen eng' okweek.

8Moam tooreet amu petotin siyok ago ma itari paroi; ng'waan nooto eng' okweek: Amat oam panyeekwak, amotwaa ye kame.

9“Chu che oame eng' che mi peek: oam age tugul ne tinyei kebebaik ak peerik.

10Ago matoam age tugul ne ma tinyei kebebaik ak peerik; ng'waan nooto eng' okweek.

11“Omuuchi oam toriitik alak tugul che myachen.

12Ago amat oam chu: kipsiichit, motonda ak chelogomyet;

13chepkupkupchyet ak chesirereet, keeret ak tugul che kergei.

14Amat oam chepkuginik ak tugul che kergei;

15tyondap songolik, keeretap kemoi, toriityon ne leel ne po nyanjet ak keeret ak che kergei.

16Ma ki amei sugurut ne ming'in anan sugurut ne oo sugurut ne tinyei kuinoik;

17chebo kibabaa, chepsengwet ak toriityon ne po nyanjet;

18kong'onyot, chelogomyet ak che kergei, ak chesululit ak reresyet.

19Ng'woneen eng' okweek tuguuk tugul che ing'onioti che tinyei kebebaik: ma ki amei.

20Omuuchi oam toriitik alak tugul che myachen.

21Amat oam ne kame ineegei. Imuuchi igoochi kiprutoiyot ne mi kurgotiguk koam anan ialdochi toondet: amu ii pororyet ne tiliil eng' Kamuktaindet ne Toroor Kamuktaindeng'ung'. Amat iyoe aarwetap ng'oroor cheegap kamet.

22“Igoite iman kebebertap taman ne po iyoteet tugul ne po kesweguk che piitu eng' mbar kenyiit age tugul.

23Iamisyei eng' taitap Kamuktaindet ne Toroor Kamuktaindeng'ung', eng' ole leweni konde kainennyi komeny olooto, kebebertap taman ne po peeguk, divaiguk, mwaniguk ak che twatei akweeng'ung' ak keechiireguk, si ineetkei iywei Kamuktaindet ne Toroor Kamuktaindeng'ung' kotugul.

24Ye tuun iberuurin Kamuktaindet ne Toroor Kamuktaindeng'ung' me muuchi iip kebeberwechooto ak kouit panda eng' inyee amu loo eng' olooto ki lewen Kamuktaindet ne Toroor Kamuktaindeng'ung' konde kainennyi,

25ialde anyun iwal koek chepkondok ak irat si iip eng' eung'ung' ak iwe komosta ne leweni Kamuktaindet ne Toroor Kamuktaindeng'ung'.

26Ye iit olooto, iale fedhaisyechooto kiit age tugul ne machei muguleldang'ung' ngo tuuga anan keechiirek anan divaik anan maiyek anan kiy age tugul ne machei saboondang'ung'. Yeityo iam eng' olooto eng' taitap Kamuktaindet ne Toroor Kamuktaindeng'ung' ak ibaibaitu, inyee ak piigap koong'ung'.

27Amebagaakte Lawindet ne mi kurgotiguk; amu ma tinyei kebeberta anan poroteet kobooten.

28Ye igeskei kenyiit age tugul ne po somok inemu kebeberwegap taman che po rurateng'ung' tugul eng' kenyinooto ak igonoree oldang'ung',

29si konyo Lawindet amu ma tinyei kebeberta anan poroteet kobooten. Nyoonei kora toondet ak ne ma tinyei sigiik, ak mosogichooto mi kurgotiguk nyoo koamis ak kobiyong'so, si koberuurin Kamuktaindet ne Toroor Kamuktaindeng'ung' eng' poisyet tugul ne po euneguk.

← Chapter 13 Jump to: Chapter 15 →