Deuteronomy 22

Kalenjin Bible Revised (BUKUIT NE TILIIL Sireet ne Dutero Kanon)

← Chapter 21 Jump to: Chapter 23 →

1Ama ye igeer tetap ne otupche anan keechiiryennyi kobetoti iung'egei, ago kwerichi iman ne otupche.

2Ngo ma neegitenen ne otupche anan ngo mengen ineendet, igetu anyun konyo koong'ung' ak kotebee oldang'ung' agoi kocheeng'an ne otupche ak iweekyi.

3Yai ko uu nooto eng' sigiryennyi, eng' ngoryennyi ak yai ko uu nooto anyun eng' kiy age tugul ne kabet ne po tupcheng'ung' ago kainyooru ago ameuny.

4Ama ye igeer sigiryetap tupcheng'ung' anan tennyi ne kagobut eng' ooreet taban iung'egei. Kanyool itoret kong'eet.

5Amat kolaach kobogoryondo che po murenik anan kolaach mureno ngoryeet ne po kobogoryo. Amu age tugul ne yaei tuguuchuuto ko wegot eng' Kamuktaindet ne Toroor Kamuktaindeng'ung'.

6Ngigeer keswetap toriityon eng' ooreet, eng' keet age tugul anan eng' ng'wony komi aarek anan koik ak kosyebei kamet aarek anan koik, ko mat iip kamet kobooto aarek.

7Ago kanyool imete kamet kwo, ago imuuchi iipchigei aarek si komyeeit eng' inyee, ak kochang'a peetuusyeguk.

8Ye iteech koot ne leel, itegel koot parak iyiem kotuiyo si meipchi koong'ung' korotiik, ngo chirkwin chii eng' olooto.

9Ameminji mbareeng'ung' ne po sabibuk kesweek che po ortinwek aeng' che teerchiin, si ma ki istoenen tugul; kesweek che ki igol ak ruroteetap mbareeng'ung' ne po sabibuk.

10Ameratyine eito ak sigiryet ye ibati mbareet.

11Amelaach ngoryeet ne ki kiburuch koroorigap keechiirek ak katanit.

12Napchi sawoinik ngoryeeng'ung' ne itugegei eng' tabanwekyik ang'wan.

13Ngo tun chii osotyot ak kwo ole mi ak kowech,

14ak komwaita ng'aleegap teweernateet agobo ineendet, kotaam eng' ng'aleek che yaach kole, “Ki atun osotyondoni ak ye kinga riikyi koma keer pergeinatennyi.”

15Koipchi anyun kwandap chebooto ak kamet poisyek eng' ormariichetap nganaseet tuguuk che ibooru pergeinatetap chebooto.

16Yeityo koleenji kwanitap chebooto poisyek, “Ki agoochi murenoni cheptonyu kotun ago kowech, ma cham.

17Ne siirei nooto ko ki koteweer kole, ‘Ma keerchi cheptong'ung' tuguuk che ibooru pergeinateet ago chu tuguuk che ibooru pergeinatetap cheptonyu.’ Yeityo koiito ngoryeet eng' taitap poisyegap nganaseet.

18Ingonam anyun poisyegap nganasanooto murenonooto kotigon,

19ak komage ineendet shekelisyek pogol che po fedha, si kogoochi kwandap chebooto, amu ki itaam eng' ng'aleek che yaach pergeiyat ne po Israel ak egu osotyonnyi. Ma imuuchi kobagaakta eng' peetuusyekyik tugul.

20Ago ngo po iman ng'olyoondoniito keele ma ki nyoorchi chebooto tuguuk che ibooru pergeinateet,

21kimut anyun chebooto agoi kurgeetap kootap kwandanyi ak kolage ineendet koik murenigap nganasennyi kot kome. Amu ki yai abusnateet eng' Israel, amu ki yai kugoinatet eng' kootap kwandanyi. Iste anyun ko uu nooto yaityet eng' kwenung'ung'.

22“Nginyooru chii ne ibegei ak kwondo ne ki kitunji chiito age, kebarei tuwai; chiichooto kobooto kwonyooto. Iste anyun ko uu nooto yaityet eng' Israel.

23“Ngo mi chepto ne pergeiyat ne kigeyachi koito ak konyoorchi chii nganaseet ak koruiyo ak ineendet,

24omutu tuwai kobwa kurgeetap nganaseet ak olage koik kobek: chebooto amu ma waach ago kimi nganaseet ak murenonooto amu kagoteweer osotyotap chiitap kokwennyi. Iste anyun ko uu nooto yaityet eng' kwenung'ung'.

25“Ago ngo nyoor mureno chepto eng' timiin, nooto ki keyachi koito ak kosuup koipkei, kebarei murenonooto ineegei.

26Ago meite kiy chebooto amu ma tinyei tengekto ne nyoljin meet. Amu uu chiito ne kang'eetyi chiitap kokwennyi ak kobar, ko uu nooto agine ng'olyoondoniito.

27Amu ki nyoorchi timiin ak ki waach chebooto kiga keyachi koito ama piit chii ne ki sar.

28“Ngo nyoor mureno chepto ne pergeiyat ne tomo kigoochi chii ak kosuup ak koruiyo tuwai ak kenyoor,

29ko ingogoochi murenonooto karuiyo tuwai kwandap chebooto shekelisyek konom che po fedha. Ma imuuchi kobagaakta agoi, ago egu osotyonnyi amu koiteweer.

30“Amat konam chii osotyotap kwandanyi anan kong'aany aach ngoritap kwandanyi.

← Chapter 21 Jump to: Chapter 23 →

Recommended Reading

Commentary Deuteronomy Commentaries → Devotional Deuteronomy Devotional Guide → Get This Bible Kalenjin Bible Revised (BUKUIT NE TILIIL Sireet ne Dutero Kanon) Study Bible →