Mark 11

Kalenjin Bible Revised (BUKUIT NE TILIIL Sireet ne Dutero Kanon)

← Chapter 10 Jump to: Chapter 12 →

1Ak ye kingo riikta Jerusalem, ak Bethphage ak Bethania, eng' tulweetap Mseituni, koyookto aeng' eng' kasubikyik,

2ak koleenji, “Oba nganaseet ne mi taing'wong'; ak onyooru eng' sainooto oite, moitap sigiryet ko rataat, ne tomo kolaany chii; otyach, ak ogetu.

3Ak ngo teebenak chii kole, ‘Kalya si oyai ko uu ni?’ Oleenji, ‘Makyingei Kiptaiyat; ak kogoonok ogetu anyun.’ ”

4Ki pa anyun, ak konyoor moitap sigiryet ko rataat, eng' saang'utap ormariich, eng' ole pesiap oor; kotyach.

5Ak kiteebe alak che kitonondos eng' olooto koleenji, “Olyon, ngo tyachi moitap sigiryet?”

6Komwachi icheek ko uu ye ki kamwachi Jeso; ak ki unda `pichooto icheeget koba.

7Ak kiget moitap sigiryet konyo ole mi Jeso, ak kiito ngoroikwak eng' sigiryet; ak ki tebee `Jeso sigiryonooto.

8Ak kiito piik che chaang' ngoroikwak eng' ooreet; ak ki indooti alage mooriigap keetiik, che kiebei eng' mbareenik.

9Ak kimwaoti eng' kutit ne oo che ki indoi, ak che ki isubi, koleen “Hosanna! Iberuurot ineendet ne nyoonei eng' kainetap Kiptaiyat!

10Iberuurot laitornatet ne nyoonei ne po kwandanyo Daudi. Hosanna eng' ole toroor miising'!”

11Ak ki mong'ji Jerusalem, ak kwo Hekaluut oriit; ak ye kingo kagogeerot tuguuk tugul, ak kiga koek koskoleny, kwo anyun Bethania kobooto taman ak aeng'.

12Ak kingo mong' icheeget karon eng' Bethania, koam rubeet ineendet.

13Ak kingo keer eng' ole loo mogoywet ne tinyei sogeek, konyo, koleen tamangap konyoorchi kiy: ak kingo it ye mi keetoto, koma konyoorchi kiy kobatee sogeek kityo; amu kitom koit ye rure logoegap mogoonik.

14Ak ki leenji keetoto, Kobooch nguno koma koamenen chii logoek agoi koigeny. Ak kigasei kasubikyik.

15Ak kiit Jerusalem: ak ki wo Hekaluut oriit, ak kotoi koon che ki aldaisyei ak che ki alisyee Hekaluut, ak kogabui mesosyek che po woliigap silingisyek, ak ng'echerok che po che ki aldoi cheptugenik;

16ak ki ma chamji chii age tugul kobun Hekaluut koibei kiy.

17Ak ki ineet icheek koleenji, “Siraat keele, ‘Koonnyu ko kootap saaet ne po pororyosyek tugul!’ Ago kaoyai okweek koek kebeneetap rebiik.”

18Ak ki kas tisiik che eecheen ak siriik, ak kocheeng' ole partoi ineendet: amu ki iywei ineendet, amu kiga kwong' tuiyet komugul agobo kaneetisyennyi.

19Ak kingo ek koskoleny komanda eng' nganaseet.

20Ak ye kisiirtoi icheek karon, kogeer mogoywonooto ko kogores kot koit tigitik.

21Kobwaat anyun Petero, koleenji, “Kaneetindoni, keero, kogores mogoywondoni koichube.”

22Kowolji Jeso koleenji, “Oyan Kamuktaindet.

23Amwaiwok iman ale, chii age tugul ne leenjin tulwooni, ‘Kitutin ak kewiirchin araraita,’ koma soge eng' muguleldanyi, ago koyan kole, isuldoi tuguuk che kamwa; konyooru tuguuchooto.

24Nooto anyun amwaiwok ale, Tuguuk alak tugul che osoome eng' saaet, oyan ole kaotaach, ak onyooru.

25Ak ngo ting'ee chii ng'olyoo, ko ye otonon osaae, onyochi kaat, si konyoiywok kaat lelutikwok Kwandang'wong' agine ne mi kipsengwet.”

26Ago ngo monyochi kaat okweek, koma nyoiywok kaat lelutikwok Kwandang'wong' agine ne mi kipsengwet.

27Ak ki pwa kogeny Jerusalem: ak kingo ta kowendoti eng' Hekaluut, kobwonji ineendet tisiik che eecheen, ak siriik, ak poisyek;

28ak kiteebe kole, “Nee kimnateet ne iyae tuguuchu? Anan ng'oo ne kigoonin kimnatoni iyae tuguuchuuto?”

29Ak ki leenji `Jeso icheek, “Ateebenok ak anee ng'olyoot agenge, ak owolwo, si amwaiwok kimnateet ne ayae tuguuchuuto.

30Tos ki punu kabatisanetap Johana kipsengwet, anan ki punu piik? Owolwo.”

31Ak kiteebegei icheegei kole, “Ngeele, ‘Ki punu kipsengwet,’ kole ineendet, ‘Kilya anyun si moyan?’

32Ago ngot keele, ‘Ki punu piik’ amu ki iywei `icheek piik, amu kiga koyan piik tugul kole maotyot Johana iman.

33Ak ki wolji Jeso kole, ‘Ma kingen.’ Ak ki leenji Jeso anyun, ‘Ma mwaiwok agane kimnateet ne ayae tuguuchuuto.’ ”

← Chapter 10 Jump to: Chapter 12 →